Монголын Хөлбөмбөгийн холбоо, Пэпси брэндтэй хамтран зохион байгуулж буй футзалын “ПЭПСИ ЛИГ” эхлээд хэдийнэ дөрвөн тойргийн тоглолт явагдаад байна.
Амралтын өдрүүдээр хөлбөмбөг сонирхогч та бүхэнд хүрч буй “ПЭПСИ ЛИГ” ирэх амралтын бямба, ням гаригт буюу хоёрдугаар сарын 6-7-ны өдөр ямар нэгэн тоглолтгүй өнжих юм.
Учир нь сар шинийн баяр тохиож буй учир хоёр долоо хоногийн дараа буюу хоёрдугаар сарын 13-аас эхлэн хэвийн үргэлжлэх болно.
Өнгөрөгч дөрөвдүгээр тойргийн тоглолтын хувьд “Улаанбаатарын Мазаалайнууд” болон “Эрчим” багууд тоглож, “Улаанбаатарын Мазаалайнууд” 10:4-ийн харьцаатайгаар ялалт байгуулжээ. “Эрчим” баг хүснэгтийн 10 дугаар байрт эрэмблэгдэж буй бол Мазаалай долдугаар байранд жагсаж явна.
“Дэрэн” багийн А.Тэмүүжин, Ам.Тэмүүжин нар “Арвис”-ийн хаалганд хоёр гоол оруулсанаар ялалтыг авах боломжтой болсон юм. Ингэснээр “Дэрэн” клуб чимээгүйхэн явсаар сүүлийн гурван тоглолтыг ялалтаар дуусгалаа.
“Баянгол ФС”, “Континентал” багтай энэ тойрогт таарч лигийн эхний хожлоо авах боломжтой байсан ч ялагдлаа. “Континентал” энэ тойрогт хоёр тоглолтыг дараалан хийсэн бөгөөд ганц ч ялагдалгүй яваа “Унаганууд”-тай тоглосон юм. “Улаанбаатарын Унаганууд” баг “Континентал”-ийг 15-0 гэсэн илт давуу байдлаар хожил байгууллаа. “Сэлэнгэпресс” баг “Соёмбын Барсууд” багтай таарч 10-7 харьцаатай яллаа.
“ПЭПСИ ЛИГ” –ийн 4-р тойргийн дараачаар 12 оноотой “Улаанбаатарын Унаганууд” ганцаар тэргүүлж байгаа бол 9 оноотой таван баг шил даран бичигдэж байна. Тэгвэл мэргэн буучдын жагсаалтанд “Улаанбаатарын Унаганууд” болон “Хоромхон” клүбийн гурав гурван тамирчин бичигдэж байна.