“МИАТ” компани ажилчдаа хохироосон гэж үзэн, тус компанийн ууган ажилчид мэдээлэл хийв. Мэдээллийн үеэр “Жи Ти Эм Жи Эл” компанийн захирал Б.Пүрэвтогтох “МИАТ” компани ажилтнуудынхаа ажлын байрыг булааж байна гэв. Тус компанийн ажилтнууд “МИАТ” компанийн Хангамж үйлчилгээний хэлтэст тасралтгүй 15-25 жил ажилласан юм байна. 2014 оны есдүгээр сард тэд Засгийн газрын 147 дугаар тогтоолоор цомхотголд оржээ. Хуулийн этгээд болсноор ажлын байраа хадгалах боломжтой гэсний дагуу “Жи Ти Эм Жи Эл” компанийг байгуулсан аж. Ингэхдээ ажил үйлчилгээний гэрээгээр бус түрээсийн гэрээ хийсэн нь компанийнхан хохирох эхлэлийг тавьжээ.
Харин “МИАТ” компанийн хэвлэлийн төлөөлөгч Б.Золжаргал эл мэдээллийг үгүйсгэв. Тэрээр хэлэхдээ “Жи Ти Эи Жи Эл” компани анхан болон давж заалдах шатны шүүх дээр заргаа алдсан. “Жи Ти Эм Жи Эл” компанийн ажилтнуудын асуудлыг шууд “МИАТ” компанид хамаатуулах нь учир дутагдалтай гэсэн юм.
“Жи Ти Эм Жи Эл” компани нь “МИАТ” компанийн нэгдүгээр давхрын зоогийн газар нисэх бүрэлдэхүүн, ажилчид болон бусад үйлчлүүлэгчид хоол хүнс бэлтгэн нийлүүлэх үйлчилгээ үзүүлдэг ажээ. Компанийнхан эрх ашиг нь зөрчигдөж буй талаар Зам тээврийн яам болон “МИАТ” компанийн удирдлагад өнгөрсөн аравдугаар сард мэдэгдэл хүргүүлсэн аж. Cалбарын сайд он удаан жил ажилласан хүмүүсийн эрх ашгийг хангаж, ажлын байрны гэрээг сунган, тогтвор суурьшилтай ажиллуулах талаар мэдэгдсэн байна. Гэвч “МИАТ” компани сайдынхаа үгийг үл тоомсорлосон гэж хэвлэлийн хурал хийгчид үзэж байгаа юм байна.
О.Нямсүрэн