Хүндийн өргөлтийн залуучуудын улсын аварга шалгаруулах тэмцээний эхний өдөр эрэгтэйчүүдийн 62 кг-д ОУХМ Ө.Чагнаадорж залуучуудын улсын дээд амжилтыг нийлбэр дүнгээр 16 кг-аар ахиулж, шинэчлэн тогтоожээ. Ө.Чагнаадорж огцом өргөлтөөр 106 кг, түлхэлттэй өргөлтөөр 140 кг-ыг өргөжээ.
Хошой “Алтан гадас” одонт Т.Самбуу агсны нэрэмжит 2016 оны улсын аварга шалгаруулах залуучуудын тэмцээнд төв, орон нутгийн 13 байгууллагын 80 гаруй тамирчин өрсөлдөж байгаа юм.
Спортын ордонд явагдаж байгаа уг тэмцээнийг 21 хүртэлх насны залуусын дунд зохион байгуулж байна. Эрэгтэйчүүдийн долоо, эмэгтэйчүүдийн зургаан жинд аваргууд тодрох юм.
Эмэгтэйчүүдийн 48 кг-д “Самбуу сан” клубийн тамирчин спортын мастер Ч.Нямзул огцом өргөлтөөр 63 кг-ыг өргөж өсвөр, залуучууд, насан хүрэгчдийн улсын рекорд амжилтыг ахиулсан байна. Мөн тус жинд Өвөрхангай аймгийн тамирчин А.Энхбаяр Спортын дэд мастерын болзол хангажээ.