Хамгийн хямд хонины мах 3500 төгрөг гэж байна

Хонины ястай мах нэг килограмм нь дунджаар 3875 төгрөг, үхрийн ястай мах нэг килограмм нь дунджаар 5505 төгрөгийн үнэтэй байна. Үхрийн ястай махны үнэ өмнөх долоо хоногтой харьцуулахад 0.3 хувиар буюу 15 төгрөгөөр буурч, харин үхрийн цул мах 0.5 хувиар буюу 35 төгрөгөөр өсчээ. Ажиглалтаар үхрийн мах “Баянзүрх”, “Хархорин” хүнсний захуудад хамгийн хямд буюу 5000 төгрөг, “Номин” супермаркетад хамгийн өндөр үнэтэй буюу 7600 төгрөг байна.

Хонины ястай махны үнэ өмнөх долоо хоногтой харьцуулахад 1.1 хувиар буюу 45 төгрөг, хонины цул мах 1.6 хувиар буюу 80 төгрөгөөр тус тус буурсан байна. Ажиглалтаар хонины мах “Хархорин” хүнсний захад хамгийн хямд буюу 3500 төгрөгөөр, харин “Меркури”, “Номин”, “Таван-Эрдэнэ” хүнсний захуудад хамгийн өндөр үнэтэй буюу 5500 төгрөгөөр худалдаалж байна.