Шинэ жил айсуй энэ өдрүүдэд томчуудаас илүү хүүхэд багачууд хөөр баяр болж, зул сарын өдрийг хоног тоолон хүлээдэг. Багачууд өвлийн өвгөнийг цана чаргандаа цаа бугаа хөлөглөн цасан охин, ан амьтдаа дагуулсаар ирэх болно хэмээн дор бүрнээ ургуулан бодож, хүсэл мөрөөдөлдөө автаж суугаа болов уу. Ингээд бяцхан уншигчидтайгаа уулзаж зул сарын талаарх сэтгэгдлээс нь хуваалцсанаа хүргэж байна.
23 дугаар сургуулийн 6е ангийн сурагч Ц.Ананда:
Өвлийн өвөө байдаг эсэхийг сүүлийн удаа туршиж үзнэ ээ
Би өвлийн өвгөн байдаг гэдэгт итгэдэг. Өвлийн өвгөн цасан охинтойгоо хамт Хойд туйлд амьдардаг байх. Тэр газарт нь байнга цас орж чаргаар гулгаад их л хөгжилтэй байдаг гэж боддог. Жил болгон би өвлийн өвгөнд захиа бичдэг. Захиандаа авахыг хүсч байгаа бэлгээ бичээд ээжтэйгээ хамт хаягаар нь явуулдаг. Өнгөрсөн жил би “I Phone5” гар утастай болмоор байна гэсэн чинь надад яг тэр утсыг өвлийн өвгөн бэлэглэсэн ш дээ. Гэхдээ энэ жилээс итгэхээ больсон. Яагаад гэвэл саяхан өвлийн өвгөн их дэлгүүрээс хүүхдүүдэд өгөх бэлгээ бөөний
үнээр авч байсан гэж ээж хэлсэн. Мөнгө муутай, хямарчихсан байгаа гэж ээж хэлсэн. Ямар ч байсан сүүлийн удаа өвлийн өвөөгөөс мотортой чарга гуйж захиа бичиж туршиж үзнэ дээ. Хэрвээ надад бэлэг маань ирэхгүй бол үнэхээр өвлийн өвгөн байдаггүй гэж бодох болно. Хүмүүс өвлийн өвөө байдаггүй гэж ярьдаг. Харин өвлийн өвөө өөрт нь итгэж захиа бичсэн хүүхдэд л бэлэг явуулдаг юм шиг санагддаг. Би өвлийн өвөөгөөс бэлэг авахын тулд хичээлдээ онц сурч, ээжийнхээ үгэнд ч сайн орж байгаа.
CXД-ийн Үндэсний лаборатори бүрэн дунд 12 дугаар сургуулийн 1в ангийн сурагч Ш.Эрхсаран:
Өвлийн өвөө маш олон хүүхдэд бэлэг тараадаг
-Шинэ жил миний хамгийн дуртай баяр. Хүүхдийн баяраас ч гоё. Манайх гацуураа засчихсан. Өвлийн өвөө надад барби, гоё эрвээхийтэй даашинз бэлэглэсэн. Би одоо цасан охиных шиг цагаан өнгөтэй, пони морины зурагтай даашинз авахыг хүсч байна. Дүүдээ өгөх гэж байгаа юм. Миний дүүг Анхзул гэдэг. Намайг сургуульд орсон гээд ээж тийм даашинз авч өгсөн. Харин дүүг цэцэрлэгт явдаг гээд авч өгөөгүй. Дүү маань миний даашинзыг өмсөх их дуртай. Ээж намайг хүслээ бичээд оймсон дотор хийгээд дэрэн дороо хийгээд унтаарай гэсэн. Тэгвэл өгнө. Би орой болгон өвлийн өвөөгөөс гуйж байгаа. Шинэ жил болохоос олон хоногийн өмнө хэлэхгүй бол өвлийн өвөө олон хүүхдэд бэлэг тараагаад амждаггүй гэсэн.
3а ангийн сурагч Ч.Хишигтөгөлдөр:
Ээж “өвлийн өвөөгөөс хамаагүй үнэтэй бэлэг гуйж болохгүй шүү” гэж хэлсэн
-Би дээлтэй өвлийн өвөөд дуртай. Гадаадын улаан хувцастай санта клаус гоё л доо. Гэхдээ монгол дээлтэй нь илүү гоё. Манай ангийн найзууд “Өвлийн өвөө байдаггүй. Намайг худалч” гээд байсан. Миний бодлоор өвөө байдаг. Бас хүүхэд бүрт хайртай болохоор хичнээн хүнд, хэцүү байсан ч хүссэн бэлгийг нь заавал хүргэж өгдөг юм. Өвлийн өвөөгийн хүүхдүүдэд өгөх бэлгийг хийдэг одой хүмүүс хүртэл байдаг юм билээ. Би зурагтаар гарсан киноноос харсан. Бас их хөгжилтэй амьдардаг санагдсан. Би хоёр дүүтэй. Ээж “Манайд гурван хүүхэд байгаа учраас өвлийн өвөөгөөс хамаагүй үнэтэй, том бэлэг гуйж болохгүй шүү” гэж хэлсэн. Олон хүүхдэд бэлэг тараадаг болохоор их мөнгө ордог байх. Тийм болохоор би нэг их том бэлэг гуйхгүй. Уг нь унадаг дугуй бэлгэнд авах бодолтой байсан юм.
“Шинэ Эрин” сургуулийн 7б ангийн сурагч Г.Зөнбилэг:
Манай аав өвлийн өвөө байсан
-Өвлийн өвөө Хойд туйлд амьдардаг гэж боддог байсан. Шинэ жилээр захиа бичиж, тавган дээр амттай жигнэмэг тавиад хонодог байсан. Харин жилийн өмнөөс өвлийн өвөө байдаггүйг мэдсэн. Нэг удаа манай гэрт санта клаус орж ирээд надад машин бэлэглэсэн. Яг тийм машин авахыг хүсч би захидал бичсэн юм. Тэгэхэд үнэхээр их баярласан. Гоё санагдсан. Харин өнгөрсөн жил миний захиаг ээж өвлийн өвгөний хувцас өмссөн хүнд өгөөд надад өгүүлдэг болохыг нь мэдсэн. Тийм болохоор жаахан урам хугарсан. Би бусад хүмүүсээс асуусан чинь өвлийн өвөөгөөс бэлэг авсан хүн бараг байдаггүй юм билээ. Манай аав санта клаусын хувцас өмсөөд л надад бэлэг өгдөг. Гэхдээ л шинэ жилийн баярт би дуртай.
Монгол III сургуулийн нэгдүгээр ангийн сурагч Б.Лхагважаргал:
Би дээлтэй өвлийн өвөөхарсан
-Манай өвөө надад цасан охин, өвлийн өвгөний тухай үлгэр ярьж өгсөн. Өвлийн өвөө цасан охиноос гадна их олон амьтадтай хамт явдаг. Би дээлтэй өвөө харсан. Манай хажуу айлын хүүхдэд бэлэг өгч байсан юм. Өвлийн өвгөнөөс гоё барби бэлэглээч гэж гуйна.
Нийслэлийн 16 дугаар сургуулийн 2д ангийн сурагч У.Номин:
Цасан охины даашинзтай болохыг хүсч байна
-Шинэ жилээр ээж амттан дүүрэн ширээ засаад гэр бүлээрээ тойрч суугаад зураг авахуулдаг. Би өвлийн өвгөн, цасан охины тухай хүүхэлдэйн кино зурагтаар зөндөө үзсэн. Цасан охин нь их гоё цагаан даашинзтай. Харин өвөө нь цагаан сахалтай. Яг тийм цагаан сахалтай өвөө манай сургууль дээр ирж бид нарт бэлэг өгсөн. Дотор нь алим, ундаа гээд олон гоё амттан байсан ш дээ. Онц сурах юм бол дахиад ирнэ гэж багш хэлсэн. Би өвлийн өвөөдөө олон хувцастай барби авах хүсэлтэй байгаа талаараа захиа бичих бодолтой байна. Өвлийн өвөөгөөс юу авмаар байна түүнийгээ л хэлчих гэж ээж хэлсэн.
14 дүгээр цэцэрлэгийн ахлах анги О.Ирмүүн:
Өвлийн өвөөгөөс робот машин авахыг хүсч байна
-Манай гэрт өвлийн өвөө, цасан охин бас баавгай, бар, сармагчин, туулай гээд олон амьтадтайгаа орж ирээд надад уралдааны машин өгсөн. Удахгүй шинэ жил болохоор робот машин өвлийн өвөөгөөс авмаар байна. Аав өвлийн өвөө удахгүй хүслийг чинь биелүүлнэ гэж хэлсэн гэсэн.
Монгол III сургуулийн 4г ангийн сурагч Н.Чингис:
Өвлийн өвөө үнэхээр байдаг бол надад захидал бичээрэй
-Өвлийн өвөөг бүхэлдээ цас мөсөөр хучигдсан оронд амьдардаг гэж боддог. Тэгээд шинэ жил болохоор дээгүүр цаа бугатай чаргаар нисээд л. Би эвлүүлдэг онгоцтой болмоор байна гээд өвлийн өвөөд захидал бичсэн чинь захидлын хариу манай эмээд ирсэн. Өвлийн өвөө байдаггүй юм байна лээ. Цэцэрлэгт байхад ээж өвлийн өвөөд миний бэлгийг өгөөд явуулчихдаг байсан юм билээ. Өвлийн өвөө үнэхээр байдаг бол надад захидал бичээрэй. Уг нь унадаг дугуйтай болохыг би маш их хүсч байгаа юм.
Баянгол дүүргийн 85 дугаар цэцэрлэг Ж.Сүбээдэй:
Томоотой байвал бэлэг өгнө
-Манай найз өвлийн өвөөтэй уулзсан гэсэн. Би бас зүүдэлсэн. Аав өвлийн өвөө надад бэлэг өгнө гэж хэлсэн. Харин намайг үймүүлж болохгүй томоотой байгаарай гэсэн. Би сүлд модонд дуртай. Гоё гэрэл асдаг. Аав, ээж хоёр авч өгсөн.
Гэрэл зургуудыг Ц.МЯГМАРСҮРЭН