Дундговь аймаг дахь ганц хувийн цэцэрлэг болох “Оюуны хөгжил”-ийн яслийн ангийн туслах багш арван сартай хүүхдийг “Хоолоо идсэнгүй” гэх шалтгаанаар харгислан зодож байгаа гар утасны бичлэг цахим ертөнцөд шуугиан тарьж байна. Зодуулсан охин ихэд цочирдсон бөгөөд биеийн байдал нь сайнгүй байгаа гэнэ. Мөн унтаж чадахгүй байгаа тул эцэг эх нь хүүхдээ эмнэлгээр авч үзүүлж харуулж байгаа гэдгийг эх сурвалж мэдээллээ.
Бяцхан охины нүүр рүү нь алгадаж, толгой руу нь халбагаар цохиж, улмаар модон орны хашлагыг мөргүүлж байгаа туслах багшийн харгис үйлдэл олон эцэг эхчүүдийг эмзэглүүлж байна. Тухайн үйл явдлын процессыг хэн нэгэн гар утсаа зориудаар байрлуулан бичиж авчээ. Тэгэхээр туслах багш хүүхдийг нэлээд удаан мөн байнга зоддог болохыг тэрхүү бичлэг хийсэн хүн мэддэг болохоор гар утсаараа баримтжуулж авсан гэж харагдахаар. Нөгөөтэйгүүр тэр харгис багш хүүхдийг зодсоор байхад хажууд нь гар утсаараа бичлэг хийж байсан хүн яагаад болиулсангүй вэ. Хэрвээ түүний хүүхдийг хэн нэгэн ингээд зодоод сууж байвал тэвчээд хараад байхгүй нь лавтай. Насанд хүрсэн том хүн өөдөсхөн чинээ хүний балчир үрийг хайр найргүй зодож байгаад үүнээс аюултай зүйл болбол яах байсан юм бол.
Ямартай ч харгис багшийг аймгийн Мэргэжлийн хяналт болон цагдаагийн газраас шалгаж эхэлжээ.