“Эрдэнэс Тавантолгой”-н ажилтан С.Эрдэнэ өөрийгөө шатаах гэсэн хэрэг гарсантай холбоотойгоор Ерөнхий сайд холбогдох албан тушаалтнуудыг яаралтай дуудаж, үүрэг даалгавар өгсөн байна. Энэ тухай Уул уурхайн сайд Р.Жигжид Төрийн ордонд хийсэн хэвлэлийн хурлын үеэр мэдээллээ.
Үүсээд буй нөхцөл байдалтай холбоотойгоор “Эрдэнэс Тавантолгой” компанийн гүйцэтгэх захирлыг үүрэгт ажлаас нь чөлөөлж, улмаар хуулийн дагуу шинэ удирдлага томилогдтол “Эрдэнэс Монгол” компанийн Хууль эрх зүйн асуудал эрхэлсэн захирал Т.Билгээ “Эрдэнэс Тавантолгой” компанийн гүйцэтгэх удирдлагыг түр орлохоор болжээ.
Мөн Эрүүл мэнд, спортын сайдын үүргийг гүйцэтгэж буй Ц.Оюунбаатар сайдад өөрийгөө шатаахыг завдсан С.Эрдэнийн эрүүл мэндэд анхаарахыг үүрэг болгосон байна. Мөн түүний эмчилгээнд гарах зардлыг “Эрдэнэс Тавантолгой” компаниас гаргахыг чиглэл болгосон тухай Р.Жигжид сайд дуулгалаа.