Их эзэн Чингис хааны мэндэлсэн өдөр буюу Монгол бахархлын өдрийг жил бүр тэмдэглэн өнгөрүүлж байхаар тогтсон. Тэгвэл Чингис хааны мэндэлсэн өвлийн тэргүүн сарын шинийн нэгэн энэ жил арваннэгдүгээр сарын 12-нд тохиож байна. Тиймээс энэ өдөр бүх нийтээрээ амарна. Харин тус өдөр төр, засгийн удирдлагууд Чингис хааны хөшөөнд хүндэтгэл үзүүлэхээс гадна “Чингис хаан” одон гардуулах ёслол Төрийн ордонд болно. Энэ удаа “Чингис хаан” одонг зохиолч, яруу найрагч Г.Мэнд-Ооёод хүртэхээр болсон билээ.