ОХУ-ын Эрхүү хотын “Ир-Аэро” авиакомпани Улаан-Үд хотоос Улаанбаатар руу шууд нислэг үйлдэж эхэллээ.
Энэ талаар “Ир-Аэро” компанийн Ачаа тээврийн зохицуулалтын албаны дарга Александр Макин, ОХУ-ын Улаан-Үд хотын “Байкал” нисэх онгоцны буудлын гүйцэтгэх захирал Евгиний Сивцов, “Ир-Аэро” компанийн Монгол дахь төлөөлөгч Максим Цыдендоржиев, Монгол дахь ОХУ-ын ЭСЯ-ны Хэвлэл мэдээллийн атташе Анна Акулова нар мэдээлэл хийлээ.
Улаан-Үд – Улаанбаатар – Улаан-Үд чиглэлийн анхны нислэгийг өнгөрсөн баасан гаригт үйлджээ. Цаашид долоо хоног бүрийн даваа, баасан гаригт тогтмол нислэг хийхээр болжээ. “Ир-Аэро” компани Канадын Bombardier CRJ-200 маркийн тохилог онгоцоор зорчигчдод үйлчлэх юм байна. Нислэгийн үргэлжлэх хугацаа 1 цаг байна аж.
Өмнө нь тодорхой шалтгааны улмаас Улаан-Үд – Улаанбаатар – Улаан-Үд чиглэлийн нислэг зогсоод байсан. Харин өнөөдөр энэ чиглэлийн нислэг сэргэснээр “Чингис хаан” олон улсын нисэх буудалд тун удахгүй ашиглалтад орох Транзит заалыг ашиглан Буриадын зорчигчид Сөүл, Токио, Бээжин, Гонгконг, Шанхай хотууд руу, манай улсын иргэд Улаан-Үд хотын онгоцны буудлаар дамжин хойд хөршийн Хабаровск, Красноярск, Новосибирск, Владивосток, Москва хотууд руу транзит нислэг хийх боломжтой болж байна.