УИХ-ын чуулганы өнөөдрийн үдээс хойших нэгдсэн хуралдаанаар Монгол Улсын 2016 оны төсвийн төслийн анхны хэлэлцүүлгийг хийлээ. Гишүүдийн зүгээс 2016 оны төсөв хэт тэнгэрт хадсан, орлого биелэгдэх боломжгүй байгааг шүүмжилсэн. Мөн яам, агентлагийн тоог цөөрүүлнэ гэж байгаа ч энэ нь бодитой хэмнэлт болохгүй. Хэрэв цөөрүүлье гэж байгаа бол 2016 оны нэгдүгээр сарын 1-нээс хэрэгжүүлэх шаардлагатай гэсэн. Түүнчлэн төсвийн төслийг улстөржилгүйгээр тал бүрээс нь хэлэлцэх, мөнгөний бодлоготойгоо уялдуулах, зарим аймагт буй дуусгах шаардлагатай бүтээн байгуулалтыг үргэлжлүүлэх талаар саналуудаа хэлсэн юм. Ингээд гишүүд үг хэлж, асуулт асуусны дараа Монгол Улсын 2016 оны төсвийн төслийг хоёр дахь хэлэлцүүлэгт шилжүүллээ.