“МАК” компани шохойн чулууны ордод геологи, хайгуулын нарийвчилсан судалгааны ажлуудыг 1998 оноос хийж,108 сая тонн нөөц бүхий ордыг нээн илрүүлжээ. “Хөх цавын шохойн чулууны орд”-ыг түшиглэн жилд 1 сая тонн цемент үйлдвэрлэх хүчин чадалтай үйлдвэрийн зураг төсөл боловсруулах, тоног, төхөөрөмжийг нийлүүлэх ажлыг Данийн “FLSmidth” компани гүйцэтгэж байгаа бөгөөд барилгын ажлын гүйцэтгэгчээр БНХАУ-ын компани ажиллаж байна.
Үйлдвэрийн хүчин чадлыг хоёр үе шаттайгаар зохион байгуулж, эхний ээлжинд 1 сая тонн цемент үйлдвэрлэх бөгөөд цаашдаа төслийг өргөтгөх аж. “Хөх цавын цементийн үйлдвэр” нь хуурай аргын технологитой төдийгүй бүрэн автоматжуулсан орчин үеийн дэвшилтэт техник технологийн шийдэл бүхий үйлдвэр болох юм.
Үйлдвэр ашиглалтад орсноор 340 гаруй ажлын байр шинээр бий болохоос гадна улс, орон нутгийн төсөвт жилдээ 40 орчим тэрбум төгрөгийн татварын орлого төвлөрүүлнэ.