Америкийн телевизийн академийн гол шагнал болох “Эмми”-г гардуулах ёслол энэ өдрүүдэд Лос- Анжелес хотноо болох гэж байна. Атомын бүтцийг гартаа атгаж дээш өргөсөн далавчтай бүсгүйн дүрс бүхий энэ шаргал шагнал нь кино урлагтаа бол “Оскар”, дуу хөгжмийн салбарт бол “Грэмми” гэдэгтэй адил нэр хүндтэй, алдар цуутай ёслолын ажиллагаа бөлгөө. “Эмми”-гийн шагналыг олгох зарчим нь ерөнхийдөө Америкийн телевизүүдийн дэлгэцнээ тухайн жилийнхээ тавдугаар сар хүртэл гарсан бүтээлүүдийг шүүн хэлэлцэн долдугаар сарын дундуур горлигчдын нэрсийг зарлан есдүгээр сард ялагчдыг зарладаг горимтой. Энэ жилийн нэр дэвшигчдийг долдугаар сарын 16-нд зарласан бөгөөд оргил цагийн нэвтрүүлэг, кино, өдрийн цагийн кино, нэвтрүүлэг, спортын нэвтрүүлэг гэх мэтчилэн нилээн олон төрлөөр шилдгүүдийг шалгаруулдаг. Эдгээр шагналуудыг Америкийн телевизийн академи, Америкийн үндэсний телевизийн академи, Олон улсын телевизийн академи гэх гурван өөр байгууллага хуваан авч хэнд юугаа “бэлэглэх” вэ гэдгийг шийддэг билээ. Жишээ нь эхнийх нь үдшийн нэвтрүүлгийн шилдгүүдийг шалгаруулдаг бол хоёр дахь нь спортын, өдрийн, мэдээний нэвтрүүлгүүдийг гурав дахь нь гадаадад цацагдаж байгаа програмуудын шилдгүүдийг шалгаруулах эрхтэй. 67 дахь удаагаа зохиогдож байгаа энэ жилийн “Эмми”-гийн хамгийн их шагнал “хураах” магадлалтай бүтээлээр Game of Thrones хэмээх олон ангит кино нэрлэгдээд байна.
Б.Хулан