Өнөөдөр нийслэлийн Засаг дарга буюу хотын захирагч Э.Бат-Үүл нийслэлд хийгдэж буй зам засварын ажилтай танилцсан юм. Зураг дээр харагдаж буй замууд засварын ажилтай байна. Шаргаморьтын уулзвар хүртэл 4,6 км авто зам,
Шаргаморьтын уулзвараас Хандгайтын зам хүртэл 6,75 км авто зам болон
Шаргаморьтын 50 м урт төмөр бетон гүүрийн барилгын ажлыг гүйцэтгэж байгаа аж. Энэ
хэсгийн замуудад гэрэлтүүлэг, явган хүний зам болон дугуйн замыг хийж
байгаагаас гадна ус зайлуулах шинэ төрлийн замын хашлага тавьж байгаа юм байна.
Шаргаморьтын 50 метр урт төмөр бетон гүүрийг энэтхэг технологиор барьж байгаа
бөгөөд хүнд даацын машин зорчиход ямар ч аюулгүй байхаар хийж байгааг албаныхан
онцлов. Одоогоор ажлын явц 70 гаруй хувьтай, энэ оны 10 сар гэхэд бүрэн дуусна
гэж гүйцэтгэгч компаниуд хэлэв. Мөн Гачууртын чиглэлийн 11 км авто замын
шинэчлэлтийн ажил өрнөж байгаа бөгөөд “Үйлсийн зам” ХХК засварын ажлыг
гүйцэтгэж байгаа аж. Нарны замыг 19-р хорооллын арын замтай холбох
1,5 км автозам, 58 метр урт гүүр болон төмөр зам доогуурх 22 м туннелийн хамт барих ажил он дамжин хэрэгжиж байгаа бөгөөд
энэхүү зам ашиглалтад орсноор Энх тайвны гүүр орчмын замын хөдөлгөөний ачаалал
10 гаруй хувиар буурах боломжтой гэнэ. Барилгын ажлыг “Оч наран” ХХК
гүйцэтгэж байна.
