“Төрийн орон сууцны корпораци”-ийн захиалгаар “Үндэсний бүтээн байгуулалтын корпораци”-ийн гүйцэтгэж буй 6500 айлын “Буянт-Ухаа 2” хорооллын эхний ээлжийн захиалга эхлэх гэж байгаатай холбогдуулан товыг өнөөдөр зарлахаар болжээ. Төслийн нэгдүгээр ээлжийн 2592 айлын есөн давхар 48 ширхэг орон сууцны барилга, 240 хүүхдийн цэцэрлэг, 409 машины долоон давхар нэгдсэн автограж, зургаан ширхэг таван давхар үйлчилгээний төв, инженерийн дэд бүтцийн ажлуудыг 2014 оны 6-р сард эхлүүлсэн юм. Төслийн гүйцэтгэл 62.3 хувьтай явагдаж байна. “Буянт-Ухаа 2” хорооллын 48 барилгаас 43 барилгын үндсэн бүтээцийн ажил дууссан бөгөөд эхний ээлжинд ашиглалтад орох 30 барилгын нийт ажлын явц 74.6 хувь, дараагийн ээлжинд ашиглалтад өгөх 18 барилгын ажлын явц 44.9 хувийн гүйцэтгэлтэй байгаа гэдгийг албаныхан онцолжээ. Орон сууцны нэг метр квадратын үнэ 1 сая 350 мянган төгрөг байх ажээ.