Казахстаны нийслэл Астана хотод болж буй жүдо бөхийн ДАШТ-ий хоёр дахь өдрийн барилдаан Улаанбаатарын цагаар 14.00 цагт эхэллээ. Энэ өдөр эрэгтэйчүүдийн 66 кг, эмэгтэйчүүдийн 52 кг-ын жингийн барилдаанууд болж, медальтнууд тодорно. Өнөөдөр манай дөрвөн жүдоч барилдахаас 66 кг-д хөдөлмөрийн баатар, дэлхийн аварга Х.Цагаанбаатар салхийг хагалан барилдаж эхний тойрогт Аргентинийн П.Гонзалесыг дарах мэхээр цэвэр хожсон ч хоёрдугаар тойрогт ОХУ-ын Х.Камалд цэвэр ялагдсан. Түүнийг хожсон Х.Камал дараагийн тойрогт БНСУ-ын бөх Ан Баулд хожигдсоноор Х.Цагаанбаатарын тэмцээн дууссан юм. 66 кг-д “D” хэсгийг тэргүүлсэн Д.Төмөрхүлэг эхний тойрогт гоц мөргөсөн бөгөөд хоёрдугаар тойрогт Сербийн В.Марког 3 минут 35 секундэд цэвэр хожлоо.
Эмэгтэйчүүдийн 52 кг-д А.Цолмон “В” хэсэгт, гавьяат тамирчин М.Бундмаа “С” хэсэгт багтсан. А.Цолмон эхний тойрогт хийлж, Канадын Г.Екатринатай барилдан эхний ялалтаа авлаа. Харин дараагийн тойрогт ОХУ-ын бөх Юлий Ризховаг гурван торгуулиар хожсоноор Туркменстаны бөх Бабамуратоватай барилдахаар боллоо. Дэлхийн аваргад найм дахь удаагаа оролцож буй М.Бундмаа гавьяат эхний барилдаанаа АНУ-ын Д.Ажеликатай хийж, 37 секундэд цэвэр хожоод байна.