Хөлбөмбөгийн алтан түнш “Хүрхрээ” брэндийн 100 сая
төгрөгийн шагналын сантай Үндэсний дээд лигийн ээлжит тоглолтууд
өнөөдрөөс эхэлж байна.
Хоёрдугаар тойргийн гурав дахь 7 хоногийн эхний тоглолт хүснэгтийн
хамгийн сүүлийн байранд бичигдэж буй “Соёмбын Барсууд” баг болон 5-р
байранд бичигдэж буй “Улаанбаатарын Унаганууд” багуудын хооронд өнөөдөр
болох юм.
Хоёр багийн тоглолтыг сонирхолтой болгох хэд хэдэн зүйл байгаа нь
мэдээж “Соёмбын барсууд” баг хэдийгээр лигт анхны жилдээ тоглож байгаа ч
хараахан оноо авч чадаагүй байгаа явдал юм. Тиймээс хожил тэнцээ аль
аль нь маш чухал байх бол Унаганууд багийн тухайд тэргүүлэгчээс даруй 8
оноо хоцроод байна. Хэрвээ лигийн тэргүүлэгчийн төлөө өрсөлдөхийг хүсэж
байгаа бол хожихоос өөр үр дүн тэдэнд хэрэггүй. 2 баг эхний тойргийн
хүрээнд 5-р сарын 30нд таарч “Улаанбаатарын Унаганууд” баг 10:0
харьцаатай ялж байсан удаатай.
Харин энэ өдрийн сүүлийн тоглолт энэ тойргийн хамгийн сонирхолтой
тоглолт байх юм. Өөрөөр хэлбэл улирлын 2 дахь хожлоо өнгөрөгч тойрогт
байгуулсан, тэр дундаа лигийн тэргүүлэгч багийг ялсан “Дэрэн” клуб болон
лигийг тэргүүлж эхлээд байгаа “ФС Улаанбаатар” багуудын тоглолт байх
болно. 2 багийн лигийн эхний тойрогт 5-р сарын төгсгөлд таарч 5:2
харьцаатай “ФС Улаанбаатар” багийн ялалтаар өндөрлөж байсан. Гэхдээ энэ
бол 2-р тойрог. Хэрвээ “Дэрэн” дээд лигт үлдэхийг хүсэж байвал “ФС
Улаанбаатар” багаас оноо салгах ёстой. Тэдний хагас хамгаалалтанд
Гандэлгэр ирсэн нь үр дүнгээ өгөөд байгаа. Ач холбогдол болон агуулга
хүснэгтийн байрлал гээд олон ч зүйлээр сонирхол татах ширүүн тоглолт бид
бүхнийг хүлээж байна.
Ням гарагт ч мөн СэлэнгэПресс, Эрчим гэсэн лигийн топ багууд хоорондоо
таарч хүснэгтийн байрлалыг сонирхолтой болгох болно. Хэрвээ та бүхэн
эдгээр тоглолтыг үзэхийг хүсэж байвал МХБХ-ны талбайд хүрэлцэн ирж
дэргэдээс нь амьд орчинд үзэх боломжтой. Мөн NTV Телевиз болон TIME.MN
сайт та бүхэндээ тоглолтыг шууд дамжуулан хүргэх болно.
Дашрамд дуулгахад Хоромхон клубын хувьд АХБХ-ны цомын тэмцээний
урьдчилсан шатны тоглолтоо хийн Бутан улсад байгаа учир Улаанбаатарын
Мазаалайнууд багтай хийх тоглолт Лхагва гарагт болж хойшиллоо.
