Чөлөөт нислэгийн ДАШТ Налайх дүүргийн Дархан ноёны худаг хэмээх газар болж буй. Энэхүү тэмцээнд Монгол Улсын баг тамирчид амжилттай оролцож байна. Өчигдөр ДАШТ-ий үндсэн гурван төрлийн сүүлийнх болох хугацаат нислэг буюу F1C ангилалын тэмцээн өнөөдөр болж, багийн дүнгээр БНХАУ 3951 оноогоор тэргүүлж, Монгол 3873, Их Британи 3872 оноогоор мөнгө, хүрэл медаль хүртжээ.
Энэ ангилалд 19 орны 47 тамирчин өрсөлдсөнөөс 19 нь эхний 7 нислэгийг амжилттай хийж, финалд өрсөлдөх эрхийг авсан байна. Манай тамирчдаас ОУХМ Э.Эрдэнэбат финалд өрсөлдөх эрхийг авсан бөгөөд шийдвэрлэх нислэгүүд өнөөдөр өглөө 09.00 цагт эхэлнэ.
Харин резинэн хөдөлгүүрт буюу F1B ангилалд ОУХМ М.Гонгор түрүүлж, нисэхийн спортын анхны дэлхийн аварга цолыг эх орондоо авчирсан бол манай тамирчид багийн анхны мөнгөн медалийн болзол хангаад байна. Монгол Улсын багийн бүрэлдэхүүнд ОУХМ Э.Эрдэнэбат, ОУХМ Т.Хишигбат, спортын мастер Э.Намдүү нар багтжээ.
Чөлөөт нислэгийн ДАШТ өнөөдөр бүх төрөл багтсан багийн “Миксмэн” тэмцээнээр үргэлжилж, өндөрлөх юм. Тэмцээний хаалтын ажиллагаа ням гаригт 18.00 цагаас Цонжин болдогт болно.