АНУ-д ажлын айлчлал хийж буй Ерөнхий сайд Ч.Сайханбилэг АНУ-ын Сенатын зэвсэгт хүчний хорооны дарга, сенатор Жон Маккэйнтэй уулзлаа. АНУ-ын нөлөө бүхий улс төрч Жон Маккэйн тус улсын Сенатын танхимын гишүүнээр 1986 оноос дөрөв дэх удаагаа сонгогдоод байна.
Тэрбээр одоо Индиан иргэдийн асуудал, Улс орны дотоод аюулгүй байдал, засаг захиргаа, Сенатын гадаад харилцааны асуудлаарх Хороодын гишүүнээр тус тус ажилладаг. 2015 оны гуравдугаар сард АНУ-ын Конгрессын Сенатын Зэвсэгт хүчний хорооны даргаар томилогдсон байна. Тэрээр Монголд хоёр удаа ирсэн, манай улсад элэгтэй нэгэн ажээ. Ерөнхий сайд Ч.Сайханбилэг Жон Маккэйн нар уулзалтын үеэр хоёр улсын харилцаа, хамтын ажиллагааны талаар ярилцсан байна.
Монгол Улсад анх удаа чөлөөт, ардчилсан сонгууль явуулсны 25 жилийн ой энэ оны долдугаар сард Улаанбаатар хотноо болно. Үүнтэй холбоотойгоор Жон Маккэйн санал оруулж, Монголын ардчиллыг дэмжсэн тухай АНУ-ын Конгрессийн тогтоол гарахаар болжээ.