Нийслэлийн төв цэвэрлэх байгууламж эвдрэлд орж, эвдрэлийг засахын тулд
тэг зогсолт хийхээс өөр аргагүй болоод байгаа. Энэ хүрээнд өнөөдөр
Байгаль орчин, ногоон хөгжил, аялал жуулчлалын сайд Д.Оюунхорол болон
албаны бусад хүмүүс Төв цэвэрлэх байгууламж дээр очин, байдалтай нь
танилцлаа.
Төв цэвэрлэх байгууламжийн засварын ажлын бэлтгэл өнөөдөр орой 00:00
цагаас эхэлнэ. Харин маргааш өглөө 10:00 цаг гэхэд тэг зогсолт хийж,
засварын ажлыг эхлүүлэхээр болсон байна. Энэ үеэр зөвхөн архи, пиво
болон арьс ширний үйлдвэрүүдийн хэрэглээний усыг хязгаарлана. Харин
цэцэрлэг, сургууль, талх, сүү, сүүн бүтээгдэхүүний үйлдвэрүүд болон
иргэдийн хэрэглээний усыг ч таслахгүй гэдгийг сайд Д.Оюунхорол
мэдэгдлээ.
Засварын ажлыг 24 цагт багтаан хийхээр төлөвлөсөн ба энэ хугацаанд
бохир усыг 50 хувийн цэвэршүүлэлт хийн Туул голд цутгахаар болжээ.
Энэ удаагийн засварт нийтдээ 40 сая төгрөг зарцуулахаар болж, уг мөнгийг Ус сувгийн удирдах газраас гаргаж байгаа аж.