Монголын Үндэсний Худалдаа Аж Үйлдвэрийн Танхим үүсгэн байгуулагдсаны 55 жилийн ойн арга хэмжээг угтан тус МҮХАҮТанхимын гишүүн байгууллагуудын ажилтан, албан хаагчдын эрүүл, идэвхтэй амьдралын хэв маягийг дэмжих, спортын талбарт шударгаар өрсөлдөж бизнесийн байгууллагуудын сагсан бөмбөгийн шилдэг багийг шалгаруулах, байгууллагуудын харилцан ойлголцол, хамтын ажиллагааг өргөжүүлэх зорилготой “BUSINESS LEAGUE” сагсан бөмбөгийн шилжин явах цомын төлөөх тэмцээнийг анх удаа зохион байгуулах гэж байна.
Тус тэмцээнийг спортын холбоодтой хамтран зохион байгуулж байгаа бөгөөд 20 компанийн 250 гаруй тамирчин оролцохоор бүртгүүлсэн байна. Тэмцээнд тэргүүн байр эзэлсэн багт шилжин явах цом, медаль, өргөмжлөл, мөнгөн шагнал, хоёр, гуравдугаар байр эзэлсэн баг, тамирчдад медаль, өргөмжлөл, мөнгөн шагнал олгоно.
МҮХАҮТ-аас сагсан бөмбөгийн спортод хурд хүч, авхаалж самбаагаа уралдуулж, шилдгээ тодруулах шилжин явах цомын төлөөх тус тэмцээнийг цаашид жил бүр уламжлал болгон зохион байгуулах гэнэ.
Тэмцээний нээлт 2015 оны 5 дугаар сарын 23-ны 12.00 цагт, хаалт 5 дугаар сарын 31-ний ням гаригт Этүгэн Дээд сургуулийн спорт зааланд болно.
Top of Form