Өнөөдөр Нийслэлийн Иргэдийн Төлөөлөгчдийн Хурал, Нийслэлийн Засаг Даргын Тамгын Газар, Нийслэлийн татварын Газар хамтран татвар төлөгчдийн өдрүүдийг тохиолдуулан “Дэлхийн хот-Улаанбаатар” арга хэмжээг зохион байгуулж байна. Энэхүү арга хэмжээний нээлтийн ажиллагааны үеэр Нийслэлийн татварын газрын дарга Б.Ганболд УИХ-ын гишүүн Ц.Оюунгэрэлд нийслэлийн “Шилдэг татвар төлөгч иргэн” хэмээх хүндтэй шагналыг гардуулжээ.
УИХ-ын гишүүн Ц.Оюунгэрэл 2008 онд “Хан-Уул дүүргийн шилдэг татвар төлөгч иргэн” шагналыг мөн хүртэж байжээ. Тухайн үед Хан-Уул дүүргийн Татварын албаны хамт олон хуулийн дагуу шударгаар хөдөлмөрлөж олсон орлогоосоо цаг хугацаандаа хэрхэн, ямар татвар төлөх ёстой талаар нарийн зөвлөгөө өгч байсныг Ц.Оюунгэрэл гишүүн онцлон дурдлаа. Тэрбээр Монгол улсын иргэн, эх орондоо хайртай хүн бүрийг татвараа шударгаар төлж байхыг уриалсан юм.