1. “Онлайн эрх чөлөө” эвслийн Сайд нарын 5 дугаар бага хурал тус эвслийн дарга Монгол Улсын удирдлага дор 2015 оны 5 дугаар сарын 4-5-ны өдрүүдэд Монгол Улсын нийслэл Улаанбаатар хотноо боллоо.
2. “Онлайн эрх чөлөө“ эвслийн гишүүд бид “Интернэтийн бодлого: Онлайн эрх чөлөөг хөхиүлэн дэмждэг шилдэг арга ажиллагаа” сэдвийн хүрээнд Чөлөөтэй, найдвартай интернэт, Цахим технологийн хөгжил ба илт тод байдал, Онлайн орчин дахь хувь хүний нууц ба ил тод байдал” зэрэг гурван чиглэлээр өргөн хүрээнд үр дүнтэй хэлэлцлээ. “Онлайн эрх чөлөө” эвслийн оролцогчдоос бүрдсэн Ажлын хэсгүүдийн үйл ажиллагаа ч эдгээр чиглэлд түлхүү хандлаа.
3. Хүний үндсэн эрх, эрх чөлөөг цахим орчинд хүндэтгэх, интернэтийг цаг хугацаа, орон зайны эрхшээлгүйгээр найдвартай, хүртээмжтэй, мэдээ мэдээлэл солилцдог, үзэл бодол, сүсэг бишрэл, итгэл үнэмшлээ илэрхийлдэг, эвлэлдэн нэгддэг, бизнес эрхэлдэг, нийгмийн амьдралд оролцох өргөн боломжийг бүгдэд олгодог чөлөөт индэр болгохыг тууштай эрмэлзэгч төр, засгийн газрууд, хувийн хэвшлийн компаниуд, иргэний нийгмийн байгууллагууд зэрэг өргөн бүрэлдэхүүнтэй олон талын төлөөлөл Улаанбаатарын Бага хуралд оролцлоо.
4. Интернэтийн ашиг тусыг нээлттэй, хүртээмжтэй болгоход харилцаа холбооны хууль, бодлого,зохицуулалтаар дэмжихийг эрмэлздэг улс орнуудад тулгарч буй сорилтуудын талаар Эвсэл хэлэлцлээ. Бид хүний эрхийг хамгаалах бодлогыг цахим орчинд нэвтрүүлэхэд тохиолддог бэрхшээлүүдийг авч хэлэлцэн, интернэтийн эрх чөлөөг хөхиүлэн дэмжих бодлого боловсруулсан шилдэг үлгэр дуурайллыг онцлон тэмдэглэхийг зорьсон бөгөөд хуулийг дээдлэх зарчимд нийцсэн, бүх нийтийн оролцоонд түшиглэсэн, ил тод, ардчилсан үйл явцын үр дүнд интернэтийн дэвшилтэт бодлого боловсруулан хэрэгжүүлэхэд улс орнуудыг уриаллаа.
5. Бид Монгол Улсад болон тус бүс нутаг дахь интернэтийн эрх чөлөөний ач холбогдлыг хэлэлцээд цахим орчинд үзэл бодлоо илэрхийлэх, эвлэлдэн нэгдэх, хувь хүний нууцыг хамгаалахын ач холбогдлыг мөн цохон тэмдэглэсэн. Иргэний нийгэм, хувийн хэвшлийн оролцогчдын хувь нэмэр, үзэл бодол энэ тал дээр онцгой үнэ цэнэтэй байсан. Интернэтийн эрх чөлөөг тус бүс нутагт хамгаалах, хөхиүлэн дэмжих талаар тууштай байр суурь баримталж буйгаа бид дахин илэрхийллээ.
. Интернэтэд өдөр бүр сая сая хүн шинээр холбогдон, эдийн засгийн өсөлт, хөгжил, иргэний оролцоонд урьд үзэгдээгүй өргөн боломж нээгдэж байна. Энэхүү асар их боломж нь хүний эрхийг хамгаалж хөхиүлэн дэмжих, хил хязгаарыг алгасуулан мэдээ мэдээллийг чөлөөтэй солилцоход тууштай хандахыг шаардаж байна. Цахим орчинд хяналт тогтоох, хууль бус тагнах, хавчин хориглосон хууль тогтоомж батлах замаар хүний үндсэн эрх, эрх чөлөөг хавчин боогдуулах явдал интернэтийн асар их боломжийг үгүйсгэхэд хүрнэ. “Эвслийн гишүүд бид ийм оролдлогыг эсрэг, хүний эрх цахим орчинд ч бүрэн хэрэгждэг байхын төлөө тууштай ажиллах болно”.
7. Сүүдийн үед зарим улс орон, харилцан адилгүй нөхцөл байдалд нийгмийн сүлжээний хүртээмжийг хязгаарлаж буй хэлбэр, тооны хувьд нэмэгдэж байгаа, “сошиал медиа-ийн хүртээмжийг хязгаарлаж буйд “Онлайн эрх чөлөө“ эвсэл 2014 оны наймдугаар сарын мэдэгдэлд дурдсанчлан бид сэтгэл түгшиж байна. Сошиал медиа-аар тарж буй контентийн талаар хүний эрхийн олон улсын хуулиудыг зөрчин ялангуяа сошиал медиа-г хомроглон хааж, хувь хүмүүс цахим орчинд эрхээ эдлэхийг хориглон хязгаарлаж буйг бид дахин буруушаалаа [“Онлайн эрх чөлөө” эвслийн Сошиал медиа-ийн талаарх мэдэгдлийн 1.6 дугаар догол мөр].
8. Тагнан чагнах техник технологи хэрэглэсэн, экспортод нийлүүлсэн талаар “Онлайн эрх чөлөө” эвслийн 2014 оны аравдугаар сарын мэдэгдэлд дурдсанчлан хувь хүний нууцад халдах талаар хүний эрхийн олон улсын хуульд заасныг зөрчин тагнаж чагнах техник төхөөрөмж хэрэглэдэг явдал даамжирсанд бид урьдын адил сэтгэл түгшиж байна. Тагнаж чагнах техник төхөөрөмжийн хэрэглээг хязгаарлахад улс орнууд, төрөл бүрийн оролцогч нар хүчин чармайлтаа чиглүүлэхийн сацуу ийм техник тоног төхөөрөмжийн хэрэглэээ, экспортыг зохицуулах үндэсний хууль тогтоомж, бодлого боловсруулах нь зүйтэй гэж үзлээ. (Тагнаж чагнах техник төхөөрөмжийг хэрэглэх, экспортлох асуудлаар “Онлайн эрх чөлөө” эвслийн мэдэгдлийн 2 дугаар догол мөр )
9. Хүний Эрхийн Түгээмэл Тунхаглалд дурдсан, ”Онлайн эрх чөлөө” эвслийн анхны Тунхаглалд тэмдэглэсэнчлэн хүний үндсэн эрх, эрх чөлөөг хүндэтгэх, хамгаалахад болон Эвслийн үйл ажиллагааны ерөнхий хүрээ хийгээд тэрүүлэх чиглэлүүдийг тодорхойлсон Найробын нөхцлүүд, Таллины асуудлуудад тууштай тууштай байгаагаа бид дахин нотоллоо.
10. Хүний үндсэн эрх, эрх чөлөөг цахим орчинд хөхиүлэн дэмжих, хамгаалахад тус дөхөм үзүүлэх хөтөлбөр, санал санаачилга, техик технологиудад туслалцаа үзүүлэхийн төлөө бид тууштай байгаа бөгөөд эдгээр хүчин чармайлтад нэгдэн нийлэхийг оролцогч бусад талд зөвлөлөө.
11. Цахим орчинд эрх чөлөөг хөхиүлэн дэмжих шилдэг арга ажиллагааг цаашид ч хамтран ашиглахад “Онлайн эрх чөлөө” эвсэл болон бусад чуулга уулзалтаар уламжлан дэлхий дахины төр, засгийн газрууд, хувийн хэвшил, олон улсын байгууллагууд, иргэний нийгмүүдийг уриаллаа.
12. Эвсэлд нэгдсэн Литва, Австрали, Норвеги улсуудад баяр хүргэж, хүний үндсэн эрх, эрх чөлөөг хүндэтгэх хамтын хариуцлагад тулгуурлан цахим орчинд эрх чөлөөг хамгаалах, хөхиүлэн дэмжих үйлсэд тэд өөрсдийн хувь нэмрийг оруулна гэж итгэж буйгаа илэрхийллээ.
13. Бид “Онлайн эрх чөлөө” эвслийн Сайд нарын 5 дугаар Бага хурлыг амжилттай зохион байгуулсанд болон интернэтийн эрх чөлөөг дэлхий дахин түгээн дэлгэрүүлэхэд үйлсэд үнэтэй хувь нэмэр оруулсанд Монгол Улсын Засгийн газарт, нийт оролцогчдод, илтгэгч нарт болон дэмжигчдэд чин сэтгэлийн талархал илэрхийлсэн бөгөөд цахим орчинд эрх чөлөөг хөхиүлэн дэмжихэд цаашид ч шаргуу ажиллахыг оролцогч талуудад уриаллаа.
14. “Онлайн эрх чөлөө” эвсэл Сайд нарын 6 дугаар бага хурлаа 2016 онд хийнэ гэж итгэж буйгаа бид илэрхийллээ.