УИХ дахь Бие даагчдын зөвлөлөөс энэ долоо хоногт нэгдсэн чуулган, байнгын хороодоор хэлэлцэх хуулийн төслүүдийн талаар байр сууриа илэрхийлж мэдээлэл хийлээ.
УИХ-ын гишүүн Ц.Даваасүрэн “Тавантолгойн гэрээний төслийг түргэвчилсэн горимоор хэлэлцэх боломжгүй. Тавантолгойг ашиггүй ажилласан мэтээр ярьж байгаа. Гэтэл энэ компани Хятад руу гаргаж буй нүүрсийн 40 хувийг нийлүүлсэн байгаа юм. Ер нь ашиггүй ажилласан мэтээр ярьж бичиж байгаад хувьчилдаг жишиг байх шиг байна. Тавантолгойн болон хөрөнгө оруулагч компаниудтай холбоотой хэд хэдэн асуудлыг дахин нягтлах шаардлагатай. Оюутолгойн үйл ажиллагааг үргэлжлүүлэх нь зөв. Гэхдээ 100 төгрөгийн борлуулалтын орлогоос 5 төгрөгийг авч үлддэг төсөл байхыг бид хүсээгүй. Эхний хөрөнгө оруулалтын үр дүнг тооцох, гарсан алдаа байвал баримт нэг бүртэй нь танилцах, Засгийн газар ямар дүгнэлт хийж, алдаагаа засч залруулж байгаатай танилцана. Алдаа гарсан бол Уул уурхайн сайдаас Засгийн газрыг хүртэлх хариуцлагын асуудлыг хөндөнө” гэлээ.
Бие даагч гишүүдийн хувьд “Авлигатай тэмцэх, хариуцлага, шударга ёсыг бэхжүүлэх үндэсний хөтөлбөрийг батлах тухай” Улсын Их Хурлын тогтоолын төсөл, Худалдааны тухай хуулийг төслийг дэмжиж байгаагаа илэрхийллээ.
Уг тогтоолд намын нөлөөлөлгүй өндөр албан тушаалтныг томилно гэх мэтээр заасан байна. Гэхдээ өмнөх шиг хэрэгждэггүй хөтөлбөр болчих вий хэмээн болгоомжилж байгагаа мөн хэлсэн юм. УИХ-ын гишүүн С.Ганбаатар Оюутолгойн татварын маргаантай асуудлаас ҮТЕГ-ын зургаан байцаагч ажилгүй, зарим нь орон нутаг шилжиж ажиллаж байгаа асуудлыг холбогдох байнгын хорооны хуралдаанд танилцуулна гэлээ.