Өнгөрөгч бямба гаригт Балбын төв хэсэгт 7.9 магнитудын хүчтэй газар хөдөлж олон хүн амиа алдсан харамсалтай явдал болоод байна. Одоогийн байдлаар аврах албаныхан нурангид дарагдсан хүмүүсийг аврах ажиллагаа зохион байгуулаад байгаа юм. Гэсэн ч амиа алдсан иргэдийн тоо нэмэгдсээр 2500 хүрээд байна. Газар хөдлөлтийн улмаас 5000 орчим хүн гэмтэж бэртсэн бөгөөд эмнэлгүүдийн ачаалал эрс нэмэгджээ. Газар хөдлөлтийн голомт Катманду болон Похара хотын хооронд байсан учир хор хохирол их хэмжээгээр амссан байна.
Хүчтэй газар хөдлөлтийн үеэр нийслэл Катмандуд 6.7 магнитудын чичирхийлэл мэдрэгдсэн байна. Дахин газар хөдөлж болзошгүй хэмээн албаныхан үзэж байгаа учир иргэдийг нүүлгэн шилжүүлж эхлэжээ. Хүчтэй газар хөдлөлтийн улмаас Эверест ууланд нуранги үүсч, 17 уулчин амь үрэгдэж, 61 хүн гэмтэж бэртсэн байна. Балбын хөрш орнуудад газар хөдлөлтийн чичирхийлэл мэдрэгдэж, Энэтхэгт 44, Түвдэд 17 хүн амь үрэгджээ. Энэхүү газар хөдлөлт нь “Сүүлийн 80 жилд болоогүй гамшиг учрууллаа” хэмээн нутгийнхан ярьж байва. Газар хөдлөлтийн улмаас сүйдсэн хотуудад тусламжийн цувааг хөрш орнуудаас явуулж эхэлжээ. Тухайлбал, Пакистан улс дөрвөн ширхэг “C-130” нисэх онгоцоор 30 эмнэлгийн орыг, эмч, мэргэжилтэн, үнэрч нохой болон хоол хүнс, майхан зэрэг тусламжийн хэрэгслүүдийн хамт Балба руу илгээсэн талаар BBC агентлаг онцолжээ.
