Модны тарьц, суулгацын үзэсгэлэн худалдаа өнөөдөр МҮЭСТ ордонд 11.30 цагаас нээлтээ хийх гэж байна. Энэ сарын 29-нийг дуустал үргэлжлэх уг үзэсгэлэнгийн үеэр мод тарьж ургуулах шинэ дэвшилтэт арга технологийг нийтэд сурталчлах, стандартын шаардлага хангасан мод, сөөгний тарьц, суулгацаар иргэдийг хангах, мод тарьж ургуулах талаар мэргэжлийн зөвлөмж, зөвлөгөө өгөх юм. Энэ жилийн үзэсгэлэн худалдааг БОНХАЖЯ, “Ойн судалгаа хөгжлийн төв” УТҮГ, Улаанбаатар хотын захирагчийн ажлын алба Нийслэлийн байгаль орчин, ногоон хөгжлийн газар, Монгол, Солонгосын “Ногоон хэрэм” төсөл, Монголын үйлдвэрчний эвлэлийн соёлын төв ордон, “Монголын цэцэрлэгжүүлэлтийн мэргэжлийн байгууллагуудын холбоо” ТББ, Монголын байгаль орчны иргэний зөвлөл, “Монголын ойчид, цэцэрлэгжилтийн холбоо” ТББ зэрэг байгууллагууд хамтран зохион байгуулж байна.
БОНХАЖЯ-наас өрнүүлж эхэлсэн “Нэг сая мод ургуулах” хөдөлгөөний хүрээнд болж буй энэ удаагийн үзэсгэлэн худалдаа өмнөхөөс өргөн хүрээнд болох аж.