Сүхбаатар аймгийн Түмэнцогт сумын нутагт гарсан хээрийн түймрийг цурамд бүрэн оруулсан хэмээн мэдээлж байсан ч үдээс хойш салхины хүч ширүүсч тус сумын ойролцоо зарим газруудад хээрийн түймэр дахин дэгджээ.
Түмэнцогт сумын Баянцагаан, Булан гэх газруудад цурамд оруулсан түймэр дэгдээд байна. “Үдээс хойш салхины хүч ширүүсч байна. Одоогоор 22 м/с хүчтэй, шороон шуургатай байна. Хоёр газар түймэр дахин хүчээ авлаа. Түймэр дэгдсэн газруудадайл байхгүй ч өвөлжөө, хаваржаа их байгаа гэж орон нутгийн эх сурвалж мэдээлж байна.
Одоогоор сумаас 216 хүн, Онцгой байдлын ерөнхий газраас 116 хүн, цэргийн гурван анги түймэртэй тулалдаж байна. Хүчтэй салхитай байгаа учраас юмаар цохиж унтраана гэдэг бараг боломжгүй болчихоод, түймэр дийлдэхгүй шахуу хүндхэн байгаа гэнэ.
Сумын төв рүү орж ирсэн галыг унтраасан ч битүү хар утаа бүрхээд байна. 100 метрээс цаашхи юм харагдахгүй, амьсгалахад хүртэл хүндрэлтэй байна гэж эх сурвалжууд хэлжээ.