“Хавдрын эсрэг үндэсний аян 2015”-ны нээлтийн ажиллагаа өнөөдөр Хавдар судлалын үндэсний төвд болно. Дэлхий дахинд жил бүр 12 сая хүн хорт хавдартай гэж оношлогдож, 7,6 сая хүн энэ өвчний улмаас нас барж байна. Хорт хавдрын өвчлөл нас баралт дэлхий дахинд жилээс жилд өсөн нэмэгдсээр байгаа юм. Үүнтэй адил манай улсад ч хорт хавдраар өвчлөх хүний тоо өсөн нэмэгдаж байгааг бид мэднэ. Тухайлбал Монгол Улсад дунджаар жилд 4200 орчим хорт хавдар шинээр оношлогдож байгаа бөгөөд 3000 орчим хүн хорт хавдрын улмаас нас барж байна. Өөрөөр хэлбэл нийт хүн амын нас баралтын хоёр дахь шалтгаан нь хорт хавдар болж байгаа юм. Шинээр оношлогдсон хорт хавдрын 75 хувь нь төгс эмчилгээгүй буюу хавдрын эцсийн шат болох гурав, дөрөвдүгээр үедээ орсон хойно эмнэлэгт хандаж байгааг мэргэжлийн эмч нар анхааруулдаг.Нийгмийн эрүүл мэндийн тулгамдсан асуудал болоод буй хорт хавдартай тэмцэхэд хорт хавдраас урьдчилан сэргийлэх, эрсдэлт бүлгийг үзлэгт хамруулах, эрт илрүүлэх, хорт хавдар үүсгэгч халдвараас сэргийлэх тухай хүн амын мэдлэгийг дээшлүүлэх зэрэг нь ихээхэн ач холбогдолтой юм.