Засгийн газар энэ бямба гаригаас эхлэн ирэх долоо хоногийн мягмар гаригийн 22:00 цаг хүртэл “Монгол Улсын 2015-2016 оны хөгжлийн замаа хамтдаа сонгоё” нэрийн дор ард иргэдээсээ мессэжээр санал авахаар болоод байна. Энэхүү ажлыг зохион байгуулах журам, техникийн нөхцөлийн талаар Мэдээллийн технологи, шуудан, харилцаа холбооны газрын дарга Ц.Жадамбаа мэдээлэл хийлээ. Санал авах ажилд хяналт тавих ажлын хэсгийг байгуулжээ. Хяналтын ажлын хэсэг нь харилцаа холбооны үйлчилгээ эрхлэгч компаниудаар дамжуулан энэ сарын 31-нээс хоёрдугаар сарын 03-ны өдрүүдэд явагдах саналын үйл ажиллагаанд хяналт тавьж, дүнг хоёрдугаар сарын 04-ний өдөрт багтаан Засгийн газрын хэрэг эрхлэх газарт хүргүүлэх аж
Санал асуулгын тестийг үүрэн холбооны оператор компаниас 1515-1111 тусгай дугаараар иргэдийн гар утас руу илгээх ба хариуг “1” эсвэл “2” гэсэн тэмдэгтээр хүлээн авах юм байна. Харин өөр хариулт ирсэн тохиолдолд саналыг хүчингүйд тооцох аж. Нэг дугаараас санал асуулгад зөвхөн нэг санал өгөх эрхтэй. 1515-1111 дугаарт хариу мессеж илгээхэд үнэгүй, иргэн таны гар утас нэгжгүй байсан ч мессеж явах боломжтой. Гэхдээ санал асуулга эхлэхээс долоо хоног буюу түүнээс бага хугацааны өмнө шинээр авсан дугаараас болон гадаадын үүрэн холбооны операторын хэрэглэгч санал өгөх боломжгүй юм байна.