Өнгөрсөн баасан гаригийн орой буюу 2015 оны 1 дүгээр сарын 9-ний үдшийн 19 цагаас Монголын Үндэсний Пресс Клубээс санаачлан Францын террорист халдлагад өртөж, амь насаа харамсалтайгаар алдсан сэтгүүлч, шог зураачдын дурсгалыг хүндэтгэх ёслолыг Монголын Сэтгүүлчдийн Холбоо, Монголын Хэвлэлийн Хүрээлэн, Францын ЭСЯ-тай хамтран зохион байгууллаа. Ёстой л дүн өвлийн хүйтэнд гэдэгчлэн гадаа жавартай, -22 хэм хүйтэн байсан ч үүнийг үл ажран үзэг нэгт, бийр нэгт андуудын гэгээн дурсгалыг хүндэтгэхээр ирсэн сэтгүүлч, хэвлэл мэдээллийн байгууллагын ажилтнууд, Улаанбаатарт амьдарч байгаа франц иргэдийг харахад үнэхээр хүндэтгэл төрмөөр.
Ёслолын ажиллагааг Өдрийн сонин, Eagle TV, MongolHD, МҮОНТВ-ийн MM Агентлаг, Bloomberg TV, NTV, МОНЦАМЭ Агентлаг, OK! Монгол сэтгүүл, MPA фотор зургийн агентлаг зэрэг олон хэвлэл мэдээллийн байгууллагууд сурвалжиллаа. Нийт зуу гаруй хүмүүс оролцсон ёслолын цуглааны үеэр амь үрэгдсэн хүмүүсийн нэрсийг чангаар хэлж, лаа асаан, нэг минут дуугүй зогсон хүндэтгэл үзүүлэв.
Х.БАТ
Гэрэл зургийг
Ц.МЯГМАРСҮРЭН