Дэлхийн худалдааны талбаруудад нефтийн үнэ огцом уналаа. Лондонгийн бирж дээр Brent маркийн хоёрдугаар сарын фьючерсийн арилжаа 4,71 хувиар бууран нэг баррель нь 53.14 ам.доллараар зарагдан даваа гаригийн худалдаа төгсчээ.
Нью-Йоркийн түүхий эдийн бирж дээр WTI нефтийн үнэ бараг таван хувиар бууран баррель нь 50,14 доллараар зарагдсан байна. Хар алтны үнэ Европ, Америкийн биржүүд дээр ийм багаар сүүлийн таван жилд үнэлэгдээгүй байв.
Ираны Нефтийн сайд Бижан Намдар Зангане өчигдөр энэ тухай ярихдаа ойрын саруудад баррель нефтийн үнэ 70-90 долларын хэлбэлзэлд байна гэлээ. Нүүрс устөрөгчийн үнэ өнгөрсөн оны сүүлчээс эрс унаж байгаа аж. Шинжээчид нефтийн санал нь эрэлтээс энэ онд давсан байна гэж таамаглажээ.