НҮБ-ын Хүн амын сангийн Гүйцэтгэх Захирал Др.Бабатундэ Осотимехин тус сангаас жил бүр гаргадаг “Дэлхийн хүн амын байдал 2014” тайлангийн Лондон дахь албан ёсны нээлтэн дээр “Залуу хүн ам урьд өмнө байгаагүй олуулаа болжээ- Эдийн засаг, нийгмийн хөгжилд ахиц гаргах ийм таатай боломжөмнө нь хэзээ ч бүрдэж байгаагүй, цаашид ч бүрдэхгүй биз ээ” хэмээн онцлов.
Тэрбээр залуучуудын боловсрол, эрүүл мэнд, хүний эрх, сайн сайхан амьдралд зориулж хангалттай хөрөнгө оруулалт хийж чадвал тухайн улс орны эдийн засаг асар хурдацтайгаар хөгжих боломжтой хэмээн уг тайланд тусгасан байгааг тэмдэглэв.
Учир нь аливаа улс оронд хөдөлмөрийн насны хүн амын тоо нь бусдаар тэжээн тэтгүүлэгч хүн амын тооноос давсан тохиолдолд тус улс “Хүн ам зүйн урамшуулал”- ын ашгийг хүртэж, айл өрх нь хуримтлал үүсгэн, эрүүл мэнд, боловсрол, амьжиргаагаа сайжруулахад түлхүү хөрөнгө оруулж, эдийн засгийн бүтээмж нэмэгддэг байна.
Өнөөдөр дэлхийн 1,8 тэрбум залуучуудын 10 хүн тутмын ес нь боловсрол, эрүүл мэндийн үйлчилгээ хүртэх, хүчирхийллээс ангид амьдрахад бэрхшээлтэй буурай хөгжилтэй орнуудад амьдарч байна. Тиймээс жендерийн тэгш байдлыг хангаж хүний эрх түүний доторнөхөн үржихүйн эрхийг хамгаалж, бэлгийн болон нөхөн үржихүйн эрүүл мэндийг сайжруулж, залуучуудын мэдлэг, чадварыг хөгжүүлэн төлөвшүүлэхийн төлөө илүү ихийг хийх хэрэгтэйг НҮБ-ын Хүн амын сангаас мэдээлжээ.