-НДЕГ-ын санаачлагаар Монголын Хөдөлмөрийн Аюулгүй Ажиллагаа Эрүүл Ахуйн Менежментийн Хүрээлэнгээс “Эрүүл, Эрүүл Аюулгүй Ажлын Байр” форум болон үнэ төлбөргүй сургалтын арга хэмжээнүүдийг өнөөдөр зохиохоор болжээ-
Монгол улс гурван сая дахь иргэнээ ирэх оны эхээр хүлээн авах гэж байна. Бид олуулаа болохоор чармайж байгаа хэдий ч харамсалтай нь осол гэмтлийн улмаас иргэд амиа алдсаар.
МХЕГ-аас энэ оны есдүгээр сарын байдлаар үйлдвэрлэлийн ослоор амь насаа алдсан иргэдийн талаарх мэдээллийг гаргажээ.
2010-2013 онууд, мөн 2014 оны эхний есөн сард бүртгэгдсэн ослын тоог нэгтгэж үзвэл нийт 1,414 удаагийн үйлдвэрлэлийн осол бүтгэгдэж, 237 иргэн ажлын байран дээрх ослоор амиа алдсан дүн гарчээ.
Түүнчлэн 2010-2014 онуудын нэгтгэсэн дүнгээр 301 иргэн үйлдвэрлэлийн ослын улмаас хөгжлийн бэрхшээлтэй болж, 958 иргэн хөдөлмөрийн чадвараа түр хугацаанд алдсан харамсалтай дүр зураг харагдаж байгаа юм.
МХЕГ-т бүртгэгдсэн ослын дүнгээс харахад үйлдвэрлэлийн осол нь дараах салбарт илүү байна. Үүнд:
- Уул уурхай,
- Барилга,
- Зам тээвэр,
- Боловсрол,
- Эрүүл мэнд
Мөн үйлдвэрлэлийн ослын тэргүүлэх ТАВАН шалтгаанд:
- Уналт нуралтын осол
- Ажлын байран дээрх аюулгүй ажиллагааны арга барилд хангалтгүй суралцсан,
- Тээврийн хэрэгслийн эвдрэл, гэмтэл,
- Технологийн процес зөрчсөн,
- Өргөх механизмийн эвдрэл гэмтэл зэрэг тодорхойлолтууд багтаж байна.
Ажлын байрны осол, мэргэжлээс шалтгаалсан өчвнөөс урьдчилан сэргийлэх удирдлагын тогтолцоог нэвтрүүлж, гүйцэтгэл, хяналтыг сайжруулахад аж ахуйн нэгжүүдэд дэмжлэг үзүүлж, урьдчилан сэргийлэх арга хэмжээ авахуулах үүднээс НДЕГ-ын санаачлагаар Монголын Хөдөлмөрийн Аюулгүй Ажиллагаа Эрүүл Ахуйн Менежментийн Хүрээлэнгээс “Эрүүл, Эрүүл Аюулгүй Ажлын Байр” форум болон үнэ төлбөргүй сургалтын арга хэмжээнүүдийг өнөөдөр буюу арванхоёрдугаар сарын 4-ний өдөр зохион байгуулахаар болжээ.