“Нийтийн үйлчилгээний Улаанбаатар нэгтгэл” ОНӨААТҮГ, Нийслэлийн Авто замын газартай хамтран үзлэг шалгалт хийж, гудамж талбайн шаардлага хангахгүй болсон хашлагуудын судалгаа гаргадаг аж. Энэ онд Үйлдвэрчний Эвлэлийн Гудамж, Энхтайваны Өргөн Чөлөө, Дамдинсүрэнгийн гудамж, Хувьсгалчдын гудамж \Тасганы овооны уулзвараас Зурагтын буудал хүртэл\ зэрэг байршлын шаардлага хангахгүй байгаа авто замын хашлагуудыг солих ажлыг 187 сая төгрөгийн төсөвтэйгээр гүйцэтгэж байна гэж Нийтийн үйлчилгээний Улаанбаатар нэгтгэлээс мэдэгдэв.
Замын хашлага бүрэн бүтэн байх нь авто замаар зорчиж байгаа жолоочийн өөртөө итгэх итгэлийг сайжруулдаг. Ингэснээр жолооч өөрийгөө болон өрөөлийг осолд орохоос сэргийлж чадах бөгөөд замын хөдөлгөөний ачааллыг бууруулж, замын нэвтрүүлэх чадварыг нэмэгдүүлдэг онцлогтой. Мөн эвдэрч хэмхэрсэн хашлага нь авто замын зорчих хэсэг, явган хүний зам хооронд тусгаарлах байдлыг алдагдуулж, явган зорчигчдын аюулгүй байдалд сөргөөр нөлөөлөх, гудамжны өнгө үзэмжийг бууруулдаг тул эвдэрсэн 2400 хашлагыг сольж шинэчлэх ажил хийгдэж байна.
Харин энэ ажлын хүрээнд эвдрээгүй буюу ашиглалтын шаардлага хангаж байгаа хашлагануудыг огт солиогүй болно. Мөн хашлага солих явцад хуулсан явган замын хавтанг буцаан суулгаж байгаа бөгөөд ямар нэгэн зардал гаргаагүй гэж тус нэгтгнэлээс тайлбар хийв.