Ази тивийн аварга шалгаруулах бодибилдинг, фитнессийн 48 дахь удаагийн тэмцээн Макао улсад энэ сарын 27-31-ний өдрүүдэд зохион байгуулагдаж байна. Тэмцээний эхний өдрүүдэд хурал, семинар үргэлжилсэн бол өнөөдрөөс тэмцээн албан ёсоор эхэлж байгаа юм.
Манай улсын дөрвөн тамирчин өнөөдөр Азийн аварга шалгаруулах тэмцээний тайзан дээр гарснаас 55 кг-ын жинд өрсөлдсөн Ч.Мянганбилэг, 65 кг-д оролцсон Л.Саруулбат нар хүрэл медаль хүртлээ. Мөн эмэгтэй бодибилдингийн 49 кг-ын жинд н.Гансаруул дөрөвдүгээр байрт шалгарсан амжилтыг үзүүллээ.
Энэ удаагийн ААШТ-д 30 орны тамирчид өрсөлдөж буй аж. Маргааш манай тамирчдаас эрэгтэй фитнесст н.Хүсэлтүвшин, эрэгтэй бодибилдингийн 70кг-д н.Дорж, 75 кг-д н.Сумьяа, 80кг-ын жинд н.Ганзориг нар өрсөлдөнө. Харин эмэгтэй модель 160 см-т н.Насанбуян, н.Оюунгэрэл нар 165 см-т н.Саруул тайзан дээр гарах юм байна.