Торонтогийн хөрөнгийн биржид бүртгэлтэй “Centerra Gold” компани хоёрдугаар улирлын үйл ажиллагааны тайлангаа танилцууллаа. Энэ хугацаанд тус компани 31.7 сая ам.долларын алдагдал хүлээснийг marketwired.com цахим хуудсанд мэдээлэв. “Centerra Gold” 92.124 унци алт үйлдвэрлэснээс 77.860 нь Кыргызийн Кумтор, 14.265 нь Бороогийн ордод ногджээ. Энэ нь өнгөрсөн оны мөн үед 99.426 унци алт үйлдвэрлэснээс буурсан үзүүлэлт гэнэ.
Бас өмнөх оны хоёрдугаар улиралд Бороогийн ордод 27.061 унци алт үйлдвэрлэж байсантай харьцуулахад хоёр дахин багассан үзүүлэлт юм. Хоёрдугаар улиралд “Centerra Gold”-ын орлого 119.5 сая ам.доллар болж доошилсон нь өмнөх жилийнхээс 8.7 саяар буурсан дүн бөгөөд энэ нь бүтээгдэхүүний борлуулалт муудан, үнэ хямдарсантай холбоотой аж. Бас бүтээгдэхүүний борлуулалтын зардал нь 29 хувиар өссөнийг тайландаа дурджээ.
Дашрамд дурдахад, энэ оны эхний хагаст “Centerra Gold” компани нийт 208.794 унци алт (2013 онд 214.646 унци байсан) үйлдвэрлэсэн байна.