“Цацраг идэвхт ашигт малтмалын эсрэг нэгдэгтүн” уриатай жагсаал Чингисийн талбайд болж байна. Монголд уран олборлох, цөмийн хаягдал булшлахыг эсэргүүцсэн уг жагсаалд Босоо хөх Монгол ТББ, Гал үндэстэн холбоо, Ногоон Хас ТББ, Голомт цөмийн эсрэг хөдөлгөөн, Гол нууруудын нэгдсэн хөдөлгөөн зэрэг байгууллагууд нэгджээ. Тэд “Монгол ураны 101 хайгуулын лиценз өгсөн. Одоо бүр цөмийн хаягдал булшлах гэж байна. Хүн малгүй хүнд хэцүү, дайны байдалд орлоо” хэмээн мэдэгдэж байна. Мөн Ногоон хөдөлгөөний тэргүүн А.Саруул тэдэнтэй нэгдэж, урангүй Монголын төлөө нэгдэхийг уриалж байна. Жагсагчид Чингис хаан, Галданбошигт, Хатанбаатар Магсаржав нарын хэлсэн газар шорооны тухай үг болон Үндсэн хуулийн зүйл заалтаас иш татсан лоозон барьж, 2400 жилийн дараа задардаг цөмийн хаягдлыг Монгол булшлахыг эсэргүүцэж байгаагаа илэрхийлж байна.