Эдийн засгийн хөгжлийн сайд Н.Батбаярыг огцруулах бичгийг Ардын намынхан өргөн барьсан билээ. Хуулиараа бол бичиг өргөн барьснаас хойш долоо хоногийн дотор УИХ асуудлыг хэлэлцэж эхлэх ёстой. Тэр хугацаа нь өнгөрсөн лхагва гаригт дуусчихлаа. Уг нь энэ өдөр Эдийн засгийн байнгын хороо хуралдах товтой байсан ч ирц хүрээгүйн улмаас хойшилсон юм. Гэвч хуулийн хугацаандаа амжаагүй тул асуудлыг хэлэлцэхгүй гэдэг дүрэм байхгүй. Тиймээс Эдийн засгийн байнгын хороо өчигдөр хуралдах байх хэмээн хүмүүс харж байв. Гэтэл асуудлын эзэн өөрөө эзгүй байгаа юм байна. Учир нь Н.Батбаяр сайд эмчийн акт үзүүлж, Ерөнхий сайдаас хоёр хоногийн чөлөө авчээ. Түүний даралт ихэсч бие нь муудсан гэнэ.
Ямартай ч Н.Батбаяр сайдын чөлөө өнөөдрөөр дуусч байгаа юм байна. Залгуулаад амралтын өдрүүд үргэлжлэх учраас Н.Батбаяр сайд нэг мөсөн даваа гаригт ажилдаа ирэх бололтой. Ерөнхий сайд гадагшаа томилолтоор явах тул бямба гаригт Засгийн газрын хуралдаан ч болохгүй. Тэгэхээр Н.Батбаяр сайдыг огцруулах эсэх асуудлыг хэлэлцэх хугацаа ирэх долоо хоногоос наашгүй болжээ. УИХ-ын хууль зөрчсөн үгүйн асуудал ч ирэх долоо хоногт оволзох бололтой.
Я.ЦЭЦЭГ