Month: August 2024

Монгол Улсын Засгийн газар, Бүгд Найрамдах Франц Улсын Засгийн газар хооронд байгуулсан санхүүгийн хэлэлцээрээр хэрэгжиж байгаа “Монгол Улсын Онцгой байдлын байгууллагын агаараас аврах ажиллагааны нэгжийн чадавхийг бэхжүүлэх төсөл”-ийн хүрээнд ОБЕГ-ын харьяа Агаараас эрэн хайх, аврах 111 дүгээр ангиас “Агаарын хөлгөөр усны мандлаас болон усан тээврийн хөлгөөс аврах ажиллагаа”-ны сургалт, дадлагыг Хөвсгөл аймгийн Хатгал сумын “Хөвсгөл нуур” бүсэд зохион байгууллаа.

Сургалт, дадлагыг БНФУ-аас Монгол Улсад суугаа Иргэний хамгаалалтын асуудал хариуцсан төлөөлөгч, хошууч Кристоф Бауманн удирдан явуулж, ЕС-145 С2 загварын МТ-1110, МТ-1112 дугаартай агаарын хөлгүүдээр тус ангийн аврах ажиллагааны мэргэжилтэн, аврагчид нислэг үйлдсэн юм.

Энэ удаагийн дадлага сургууль нь “Хөвсгөл нуур”-т зохион байгуулагдсан гэдгээрээ анхны тохиолдол бөгөөд цаашид жил бүр зохион байгуулахаар боллоо.

Халуун орны хар шуурга Тайфү 5 /Мария/ ойрын хэдэн цагт Японы зүүн хойд бүс нутгийг /Тохоку/ дайрах төлөвтэй байна. Үүний улмаас даваа гарагийн өглөөнөөс эхлэн Иватэ, Мияги, Аомори мужуудад ялангуяа Номхон далай дагасан бүс нутгуудаар ширүүн бороо орж болзошгүйг Цаг агаарын албанаас анхааруулж байна.

Даваа гарагийн шөнөөс өглөөний 6 цаг хүртэл Иватэ мужийн Күжи хотод 357.5 мм бороо орсон нь Цаг уурын байгууллагын статистик мэдээлэл авч эхэлснээс хойшхи рекорд үзүүлэлт юм. Ширүүн борооны улмаас Иватэ мужид хөрсний гулгалт үүсэх өндөр эрсдэлтэй байгаа тул “хөрс гулгалтын аюулаас сэрэмжил” гэсэн анхааруулга гарчээ. Тайфү салхи Мияги мужийн далай дээгүүр баруун тийш нүүж байснаа эх газрыг нэвт дайрч гарна гэж цаг уурын албанаас үзэж байна.

Японы хойд хэсгээр даваа гарагаас эхлэн аадар бороо орж, мягмар гарагт хүчтэй аянга цахилгаантай бороо орох төлөвтэй байна. Бороо мягмар гарагийн өглөө хүртэл 300 мм, дараагийн 24 цагт нэмж 150 мм орохоор байгаа нь 8 дугаар сарын турш ордог хур тунадастай дүйж байна.

Өнгөрсөн сард дээд амжилт тогтоосон хур тунадастай байсан Япон Тэнгисийн эрэг дагасан Тохоку бүс нутагт дахин удаан хугацаагаар ширүүн бороо үргэлжлэн орох төлөвтэй байна. Хоккайдод мөн ширүүн бороо орж, Японы хойд нутгаар хүчтэй салхи шуургатай байна. Даваа гарагт Тохокуд цагт 90 километр, Хоккайдод цагт 65 километрт хүрсэн хүчтэй хар салхи болж, Тохокуд зарим үед цагт 126 км, Хоккайдод цагт 90 км хүрч болзошгүй.

Далайн давалгаа Тохоку бүсийн эрэг дагуу 7 м, Хоккайдогийн эрэг дагуу 6 м-т хүрэх магадлалтай. Цаг агаарын албанаас хөрсний гулгалт үүсэх,  нам дор газар руу үер буух, гол мөрөн эргээсээ халих аюултай байгааг анхааруулж байна. Мөн иргэдийг хүчтэй салхи, хүчтэй давалгаа, аянга цахилгаан, хуй салхинаас сэрэмжтэй байхыг уриалжээ.

Цаг уурын албанаас иргэдэд хандан “Бат бөх байшин барилгад хоргодож, ширүүн борооны эсрэг аюулгүй байдлын зохих арга хэмжээг авах, шуурганы замд өртөх нутгуудад ч бороо, салхи гэнэт ширүүсэх магадлалтайг анхаарах, үер болж байх үед нүүн шилжих нь аюултай бөгөөд олон хүн ингэснээс болж нас бардгийг анхаарах, хадан цохио, хавцалаас хол байж, аюулгүй байдлаа хангах”-ийг зөвлөжээ.

Эх сурвалж: https://tokyo.embassy.mn/

Нийслэлийн Засаг даргын захирамжийн хүрээнд иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, нийтийн эзэмшлийн талбайг тохижуулах ажил үргэлжилж байна.

Тухайлбал, дүүргийн хөрөнгө оруулалтаар Баянзүрх дүүргийн IV хорооны 112, 114 дүгээр байрны зүүн талд 2,198 м.кв талбайд авто зогсоол, явган хүний зам, шат, гэрэлтүүлэг хийлээ. Уг ажлыг “Елбата” ХХК хийж гүйцэтгэж, нийслэлийн Хөрөнгө оруулалтын газар захиалагчийн техникийн хяналтыг хэрэгжүүлэн ажиллалаа.

Наймдугаар сарын 12-ны өдрийн байдлаар Хэнтий нуруунаас эхтэй Туул, Хангай нурууны өврөөс усжих Онги зэрэг голуудын усны түвшин өмнөх өдрийнхөөс 5-10 см нэмэгдсэн байна.

Орхон /Сүхбаатар/, Туул /Алтанбулаг/ Онон, Хурх, Улз /Дашбалбар/, Хэрлэн /Багануур-Мөнгөнморьт- Чойбалсан/ болон Увс нуурын савын Хархираа зэрэг голууд үерийн түвшинг 5-30 см даван үерлэсэн хэвээр байна.

Харин Туул /Лүн/, Орхон /Орхонтуул/, Онон, Балж, Хэрлэн /Өндөрхаан/, Халх /Баянхошуу/ зэрэг голууд үерийн аюултай түвшинг 10-100 см даван хүчтэй үерлэсэн хэвээр байна.

Иймд дээрх сав голдрил дүүрэн элбэг устай байгаа голуудын саваар нутаглаж буй малчид, аялаж амарч яваа ард иргэдийг үерийн аюулаас сэрэмжтэй байхыг онцгойлон анхааруулж байна.

“Нүүдэлчин” дэлхийн соёлын фестивалийн нээлтийн үйл ажиллагаа наймдугаар сарын 16-ны өдрийн 13:00 цагт Налайх дүүргийн Тайж хайрхны бэлд болно.