Month: July 2024

Энэ жил 75 жилийнхээ ойг тэмдэглэж байгаа “Улаанбаатар төмөр зам” ХНН энэ оны эхний хагас жилийн байдлаар 16.4 сая тонн ачаа тээвэрлэсэн нь өнгөрсөн оны мөн үеэс 3.3 хувиар илүү байна.

Тодруулбал импортын 1.9 сая тонн, экспортын 5.5 сая тонн, орон нутгийн 6.4 сая тонн, дамжин өнгөрөх 2.6 сая тонн ачааг тус тус тээвэрлэжээ.

Тус нийгэмлэг нь өнгөрсөн онд 32.4 сая тонн ачаа тээвэрлэж түүхэн дээд амжилт тогтоож байсан бөгөөд энэ онд амжилтаа улам ахиулах зорилттой ажиллаж байна.

“УБТЗ” ХНН нь Монгол Улсын хөгжилд чухал хувь нэмрээ оруулдаг тээврийн тэргүүлэгч компанийн нэг бөгөөд өнгөрсөн онд төмөр замаар тээвэрлэсэн нийт ачааны 92.5 хувийг дангаараа тээвэрлэсэн юм.

Шинээр сонгогдсон УИХ-ын 126 гишүүний тангараг өргөх ёслол Төрийн ордонд боллоо.

Тус ёслолын үеэр УИХ-ын гишүүн Н.Номтойбаяр цаг үеийн асуудлаар хэвлэлийн байгууллагуудад мэдээлэл  өгөв.

Тэрбээр “Ард иргэд сонголтоо МАН-д өгсөн. МАН дангаараа засгаа байгуулах ёстой гэж үзэж байна. Бидэнд ямар нэгэн хамтрах урилга ирээгүй. Дөрвөн жилийн хугацаа байна, харна. Ямар ч нөхцөлд Үндэсний эвсэл хуулийн зөрчил, элдэв хулгайтай хатуу тэмцэх болно.

Иргэд, сонгогчид Үндэсний эвслийг УИХ-д байх ёстой улс төрийн хүчин гэж үзсэн. Би МАН-аас гурвантаа хөөгдсөн хүн. Дахин тийшээ зүглээд байх сэтгэл алга.

Миний өнгөрсөн 12 жилийн улс төр ямар нэгэн байдлаар хувийн эрх ашиг хөөцөлдөж яваагүй гэдгийг нотолдог. Ашиг сонирхлын зөрчил үүсэх санал хураалтад би оролцдоггүй.

Өнгөрсөн УИХ-аар сонсгол нэртэй нүглийн нүдийг гурилаар хуурах дайны юм болсон. Дийлэнх олонхоороо байсан МАН-ын хувьд хавтсыг нь харуулаад хуудас руу орж чадахгүй хаасан. Сонсгол нэртэй олон асуудлыг эргээд сөхнө.

Намрын чуулган эхлэхэд Үндэсний эвсэл хяналтын байр сууринаас үйл ажиллагаагаа явуулна. Төлөвлөсөн ажлууд байгаа.

Ерөнхийлөгч намын дарга нартай уулзахдаа дотоодод улс төржилтөөс үүсээд буй асуудалд цэг тавихыг хүссэн. Мөн гадаад бодлогыг илэрхийлэгч ерөнхийлөгч хүний хувьд нөхцөл байдлын талаар мэдээлэл өгсөн” гэв.

Үргэлжлүүлэн сэтгүүлчид түүнээс ерөнхийлөгч У.Хүрэлсүхтэй эвлэрсэн үү гэж асуухад тэрбээр “Өнгөрсөн улс төрийн он жилүүдэд У.Хүрэлсүх ерөнхийлөгчтэй зарчмын зөрүүтэй байр суурь, үл ойлголцлууд маш их болж байсан. Үүнийг нуугаад байх зүйл байхгүй. У.Хүрэлсүх болон миний буруутай үг, үйлдэл бий.

Үүнийг улс орны төлөө ойлголцоод ярилцаж, цэг тавих зүйл дээр цэг тавина. Нэгэнт баримталдаг зарчим итгэл үнэмшлээсээ ухрахгүйгээр түүнийгээ хадгалж, ойлголцоод урагшлахыг би хувь улс төрчийн хувьд барина. Ерөнхийлөгч У.Хүрэлсүх ч гэсэн ийм зарчмыг баримталж байгаа” хэмээн хариулав.

Улаанбаатар хотын ойрын өдрүүдийн болон баяр наадмын үеийн цаг уурын төлөв байдлыг ЦУОШГ-ын Урьдчилан мэдээлэх хэлтсийн Ахлах мэргэжилтэн О.Оюунчимэг “Улаанбаатар хот орчмоор долоодугаар сарын 2, 3-ны өдрүүдэд бороо орохгүй. Агаарын температур өдөртөө 24-28 хэмийн халуун байх төлөвтэй байна. Харин долоодугаар сарын 4-6 өдрүүдэд өдөртөө бага зэргийн хур тунадас орох төлөвтэй байна. Наадмын өдрүүдээр буюу долоодугаар сарын 10, 11-ний өдрүүдэд бороо орж сэрүүсэх төлөвтэй байна. Гэхдээ энэ нь арав хоногийн өмнөх урьдчилсан мэдээ учраас нарийвчилсан мэдээллийг бид цаг алдалгүй гаргах болно. Баяр наадмын өдрүүдээр ихэнх нутгаар хур тунадас орох төлөвтэй байгаа учраас мэргэжлийн байгууллагуудаас өгч буй сэрэмжлүүлэг мэдээллийг цаг тухай бүрд нь авч, болзошгүй үер ус, аянга цахилгаан, мөндөр, нөөлөг салхины аюулаас сэрэмжтэй байхыг анхааруулж байна” гэв.

Дэлхийн улс орнуудын  соёл, ёс заншил манай оронд түгээн дэлгэрч байгаа нь биднийг даяарчлалд хөтөлж буй нэг хэлбэр юм. Харин тэр соёлыг таниулах үйлчилгээний газрууд манай улсад үүд хаалгаа нээсээр байна. Тиймээс бид энэ удаагийн сурвалжилгаа Японы соёлын нэг хэсэг болох Анимэ, манга зохиолыг ихээр таниулж буй “ Café the L0lita” кафенаас хүргэж байна. Үүдээр нь ороход кафен дотоод засал, өнгө, төрх бусдаас нэлээд сонирхолтой харагдлаа. Хүүхэд, залуусын зурсан Анимэ, манга зохиолын гол дүрийн баатруудын зургаар нэг талын ханаа дүүргэсэн нь нүдэнд тусна. Анимэ, манга сонирхогчдыг ихээр татдаг тус кафе 2023 оны дөрөвдүгээр сард үүд хаалгаа нээжээ. Өмнө нь зөвхөн сонирхогчид үйлчлүүлдэг байсан бол одоо дотоод орчин, үйлчилгээний соёл, бүтээгдэхүүний чанараас нь хамаараад илүү олон хүн ирдэг болжээ.

Тэнд очсон хүмүүсийг татах бас нэг сонирхолтой газар нь “Manga room” юм. Үйлчлүүлэгчдийг амрах, тайван тухтай ном зохиол унших боломжийг олгосон энэ өрөө манга шимтэн уншигчдын ирэх хамгийн гол шалтгаан болдог гэж зарим үйлчлүүлэгчид ярилаа. Уг өрөөнд 5000 төгрөг төлөөд 30 минутын турш хүссэн зохиолоо сонгож унших боломжтой.

– Café the L0lita-н байнгын үйлчлүүлэгч С.Дөлгөөнзаяа: Би  манга унших  дуртай. Ийм кафе байдгийг мэдээд их баярласан. Хамгийн анх ирж үйлчлүүлэхэд  дотоод орчин, ажилтнуудынх нь хандалга үнэхээр таатай байсан болохоор дахин дахин ирэх хүсэл цаанаасаа төрдөг. Эднийхээр үйлчлүүлэх бас нэг том шалтгаан бол тэр бүр олдоод байдаггүй манга зохиолууд зөвхөн энд л байдаг.

“Café the L0lita”-ын ажилтан н.Нандин-Эрдэнэ “Би ажилд ороод 7 сар болж байна. Ажлаа хийхдээ үнэхээр жаргалтай байдаг. Яагаад гэвэл манай дотоод орчин, хамт олны хандлага нь ажилчдаа, үйлчлүүлэгчдээ маш сайн татаж чаддаг.  Захирал маань хичээлийнхээ хажуугаар ажлаа тухтай хийх боломжийг олгодог.   Цагийн хуваарь, ажлын ачааллын хувьд илүү уян хатан байдаг. Тийм болохоор ажилдаа дуртай байхын нэг шалтгаан” хэмээн ярилаа.

Сонирхуулахад “L0lita” кафе өөрийн гэсэн хэд хэдэн нэрийн бүтээгдэхүүнтэй. Тэдгээрийг Анимэ, Манга зохиолын нэр, гол дүрийн баатруудаар нэрлэжээ. Жишээлбэл, манго, гадилтай shake-ийг Midori, мача сүүтэй shake-ийг Elizabeth гэсэн байна.

Б.АНУ

Цагдаагийн ерөнхий газраас Олон Улсын Эрүүгийн цагдаагийн байгууллага Интерполын “Улаан булант” зар мэдээгээр эрэн сурвалжлагдаж байсан Монгол Улсын иргэн “У”-г Бүгд Найрамдах Киргиз Улсын Интерполын Үндэсний төв товчоотой хамтран ажилласны үр дүнд тус улсын нутаг дэвсгэрт саатуулан баривчилж, шилжүүлэн авчрах ажиллагааг зохион байгуулж байна.

Дээрх этгээд нь 2023 онд Мансууруулах сэтгэцэд нөлөөт бодисыг бусдад худалдаалах зорилгоор Монгол Улсын хилээр нэвтрүүлсэн гэх гэмт хэрэгт холбогдон шалгагдаж байгаа бөгөөд Киргиз улсад мөн хар тамхи мансууруулах бодис худалдаалах шинжтэй үйл ажиллагаа явуулж байсан талаар Бүгд Найрамдах Киргиз Улсын Дотоод хэргийн яамнаас мэдээлсэн байна.