Month: July 2024

Долоодугаар сарын 20-ны өдрийн байдлаар Хөвсгөлийн уулсаас эхтэй Үүр, Алтай нуруунаас усжих Согоог голын усны түвшин өмнөх өдрийнхөөс 10-20 см нэмэгдсэн байна.

Хангай нурууны арын Орхон, Сэлэнгэ, Хойттамир, Урдтамир болон өврийн Хожуул, Завхан, Зүйл, Алтай нуруунаас эхтэй Дундцэнхэр, Долооннуур, Булган, Үенч, Ховд /Баяннуур/, Хэнтий нурууны баруун хажуугийн Туул, Сэлбэ, Хүдэр, Ерөө зүүн хажуугийн Хурх, Барх, Эг, Балж, Онон, Хэрлэн, Улз, Их Хянганы нуруунаас эхтэй Халх, Увс нуурын савын Намир, Хариг зэрэг голууд олон жилийн дундаж түвшинг 5-55 см, Туул /Заамар/, Хэрлэн /Чойбалсан /, Буянт /Ховд/, Ховд /Мянгад/ , Хархираа /Тариалан/ зэрэг голууд үерийн түвшинг 5-20 см давсан байдалтай байна.

Өнөөдөр Хөвсгөл, Булганы нутгаар, маргааш төв аймгийн хойд, Сэлэнгэ аймгийн баруун өмнөд хэсэг, Хэнтий болон Сүхбаатар аймгийн нутгаар бороо, дуу цахилгаантай аадар бороо орох тул дээрх голууд болон гол мөрний усны түвшин тухайн хугацаанд орсон хур борооны эрчимшил хэмжээнээс шалтгаалан богино хугацаанд огцом нэмэгдэж үерлэх мөн түүнчлэн хуурай сайр, гуу, жалгаар УРУЙН ҮЕР буух нөхцөл бүрдэж байгаа тул малчид, аялаж амарч яваа ард иргэдийг голын эрэг хөвөө дагуу бууж отоглохгүй байж үерийн аюулаас сэрэмжтэй байхыг онцгойлон анхааруулж байна.

Нийслэл хотол өчигдөр орсон борооны улмаас өнөөдөр 13:00 цагийн байдлаар нийслэлийн хэмжээнд Налайх дүүрэгт гурван удаагийн дуудлага мэдээлэл бүртгэгдэж давхардсан тоогоор 34 алба хаагч үүрэг гүйцэтгэж, усанд боогдсон 20 иргэний аюулгүй байдлыг хангаж ажиллажээ.

Тус дүүргийн найман хороонд байрлах “Ану” хотхоны үерийн даланд урсаж орж ирсэн элс, хайргыг зөөж гарган, ус зайлуулах суваг шуудуу босгох ажлыг зохион байгуулсан байна.

“Парис-2024” зуны 33 дахь удаагийн зуны олимпын наадам эхлэхэд тав хоног үлдлээ.

Олимпын нээлтийн үйл ажиллагаа ирэх баасан гарагт буюу долоодугаар сарын 26-нд болно. Харин ёслолын арга хэмжээнээс өмнө буюу 24-25-нд байт харваа, хөл бөмбөг, регби зэрэг төрлүүдийн тэмцээн эхэлсэн байх болно.

Монгол Улс өнгөрсөн хугацаанд зуны олимпын наадмаас 30, паралимпын наадмаас 4 медаль хүртсэн амжилттай билээ. “Парис-2024” зуны 33 дахь удаагийн олимпод монгол тамирчид байт харваа, усанд сэлэлт, жүдо, бокс, чөлөөт бөх, дугуй, буудлага, хөнгөн атлетик, хүндийн өргөлт зэрэг 9 төрөлд 34, паралимпын наадмын пара пауэрлифтинг, пара байт харваа, пара таеквондо, пара усанд сэлэлт, пара жүдо, пара хөнгөн атлетик зэрэг 6 төрөлд 10 эрх, нийт 44 эрхтэйгээр оролцоно.

Буриад түмний өв соёл, уламжлал, зан заншлыг хадгалж, өвлүүлэн уламжлуулах, дэлхийгээр тархсан Буриад зоныг нэгтгэх зорилготой “Алтаргана-2024” их наадмыг долдугаар сарын 26-28-нд Булган аймагт зохион байгуулна.

Зохион байгуулагчдын зүгээс наадамд 34 орны 50 мянга гаруй буриад хүн хүрэлцэн ирнэ гэж тооцоолжээ.

Энэ жилийн наадмыг Монгол Улсын Ерөнхийлөгчийн Тамгын газар, Соёлын яам, Гадаад харилцааны яам, Байгаль орчин, аялал жуулчлалын яам, Булган аймгийн Засаг даргын тамгын газар хамтран зохион байгуулах юм. Энэ жилийн Олон улсын наадмын гол зорилго нь залуучууд, хүүхдүүдэд буриад үг хэллэгийг таниулан сурталчлах, өвлүүлэн үлдээх зорилготой аж.

Алтаргана наадмыг анх Хэнтий аймгийн Дадал суманд 1994 онд буриад дууны уралдаан нэртэй эхлүүлснээс хойш өдгөө олон улсыг хамарсан буриад ардын урлаг, уламжлалт зан заншлын баяр болгон 15 дахь удаагаа зохион байгуулна.

Эхний жилүүдэд Хэнтий, Дорнод аймгийн буриадууд амьдардаг сумдын хэмжээнд уламжлалт дуу хуур, бүжиг наадмаа сурталчилсан шинжтэй наадам болж байсан ч жилээс жилд өргөжин, дэлхийн өнцөг булан бүрд амьдарч буй буриад зон оролцдог болжээ.

Нэгдүгээр хорооллын дулааны магистраль шугамыг шинэчлэх ажлыг өчигдөр хийсэн билээ. Тэгвэл өнөөдөр зорчих хэсгийн хөдөлгөөнийг нээхээр болжээ.

Дулааны шугамын шинэчлэлийн ажлыг Тэргүүн жинст ХХК хийж буй юм.