Month: July 2024

Долдугаар сарын 25-ны өдрийн байдлаар Сэлэнгэ мөрөн Хялгант тосгон Зүүнбүрэн сум Сүхбаатар хот орчимд усны түвшин өмнөх өдрөөс 40-60, Эг гол Хантай баг орчмоор 120 см тус тус нэмэгдэж, үерийн түвшинд 10-40 см дөхсөн байна.

Хэнтий нурууны баруун хажуугийн Туул /Алтанбулаг/, зүүн хажуугийн Хурх, Барх, Эг, Онон, Улз, Хэрлэн /Мөнгөнморьт-Багануур/ зэрэг голуудын усны түвшин өчигдрөөс 10-50 см нэмэгдэж, Туул / нийт уртын дагуудаа/, Хэрлэн / эх болон адаг хэсгээрээ/, Онон, Улз зэрэг голууд үерийн түвшинг 10-25 см, Хурх гол үерийн аюултай түвшинг 15 см даван хүчтэй үерлэж байна. Мөн түүнчлэн Алтай нуруунаас эхтэй Ховд, Увс нуурын савын Хархираа гол үерийн түвшинг 10 см орчим давсан хэвээр байна.

Маргааш буюу 7 дугаар сарын 26-нд Сэлэнгэ мөрөн Хялгант баг, Зүүнбүрэн сум, Сүхбаатар хот орчимд усны түвшин 40-70 см нэмэгдэж, үерийн түвшинг 10-30 см, Хэрлэн гол Мөнгөнморьт сум Багануур дүүрэг орчимд 10-15 см нэмэгдэж, аюул түвшинг 5-15 см , Онон гол Дадал сум орчимд 20 см нэмэгдэж, үерийн түвшинг 20 см тус тус даван үерлэх хандлагатай байна.

Ойрын өдрүүдэд Хэнтийн уулсаар бороотой байх төлөвтэй байгаа тул гол ус цатгалан, хальсан, үертэй буй энэ нөхцөл дээр дахин хур бороо орсноор нөхцөл байдал улам хүндрэх магадлал өндөр байна. Иймд ард иргэд болон холбогдох мэргэжлийн байгууллагуудыг Ус, цаг уурын байгууллагаас өдөр бүр гаргаж буй мэдээлэл, сэрэмжлүүлэгийг байнга, онцгой анхаарч байхыг сануулж байна.

Авто замын өргөтгөл, шинэчлэлтийн ажилтай холбогдуулан нийтийн тээврийн таван чиглэлд түр хугацаанд өөрчлөлт орлоо.

Тодруулбал Баянгол дүүргийн 9, 10, 11, 12, 13, 14, 15, 22, 34 дүгээр хороодын нутаг дэвсгэр, Хасбаатарын гудамжны авто замыг 2024 оны долдугаар сарын 26-ны 23:00 цагаас долдугаар сарын 29-ний 06:00 цаг хүртэл хааж авто зам өргөтгөл, шинэчлэлтийн ажил хийх болсон тул нийтийн тээврийн таван чиглэлд түр хугацаагаар өөрчлөлт оруулжээ.

Зам хаах хугацаанд нийтийн тээврийн хэрэгслүүд дараах зураглалын дагуу иргэдэд үйлчилнэ.

• Ч:25 “Тоосгоны үйлдвэр – Их тойруу – 3,4 хороолол”
• Ч:51 “3,4 хороолол – МУИС – Дүнжингарав худалдааны төв”
• Ч:52 “3.4 хороолол-Тэнгис к/т- Зайсан”
• Ч:18А “3,4 хороолол-6-р бичил хор-Ард кинотеатр – ТЭЦ 3” /Баруунтойрог/
• Ч:18Б “3,4 хороолол-Бичил 6-р хор-ТЭЦ 3 – Цэцэг төв” (Баруун тойрог)

Чингэлтэй дүүргийн 24 дүгээр хороо, Санзайн зам буюу Ар согоотын автобусны буудал орчмын борооны ус зайлуулах шугам угсралтын ажлыг гүйцэтгэж байна.

Энэ хүрээнд зуслангийн чиглэлийн замыг долдугаар сарын 24-ний 00:00 цагаас 25-ны өдрийн 05:00 цаг хүртэл хаасан. Улмаар 400ф хуванцар хоолой 500ф ган хоолой угсарлаа.

Үргэлжлүүлэн тус байршилд 560 метр борооны ус зайлуулах шугам угсарч байна.

Эрүүл мэндийн даатгалын сангийн орлого 2024 оны эхний хагас жилд 953.8 тэрбум төгрөг болжээ, Энэ нь 2023 оны мөн үеийнхээс 178.4 тэрбум төгрөгөөр нэмэгдсэн байна.

Мөн эхний хагас жилд тус сангийн зарлага 1132.4 тэрбум төгрөгт хүрчээ. Энэ нь өмнөх оны мөн үеийнхээс 335.5 тэрбум төгрөгөөр нэмэгдсэн үзүүлэлт юм.

Эрүүл мэндийн даатгалын сангийн орлого 2023 оныхоос нэмэгдэхэд:

• шимтгэлийн орлого 56.2 тэрбум төгрөг,
• төр даатгалыг хариуцах иргэдэд улсын төсвөөс төлсөн шимтгэл 68.6 тэрбум төгрөг,
• төр төлбөрийг нь хариуцах эрүүл мэндийн тусламж, үйлчилгээний зардлыг эрүүл мэндийн даатгалын байгууллагаар дамжуулан санхүүжүүлэхэд улсын төсвөөс олгох хөрөнгө 53.1 тэрбум төгрөгөөр нөлөөлжээ.

Улсын хэмжээнд эхний хагас жилд эрүүл мэндийн даатгалд давхардаагүй тоогоор 3140.7 мянган хүн даатгуулав.

Нийт даатгуулагчийн тухайд:

• 2258.5 мянга нь шимтгэлийг улсын төсвөөс хариуцсан иргэд,
• 714.0 мянга нь ажил олгогч, даатгуулагч хариуцан төлсөн иргэд,
• 168.2 мянга нь шимтгэлийг өөрөө хариуцан төлсөн иргэд байна.

Цагдан хорих 461 дүгээр ангид хоригдож байгаад нас барсан 21 настай залуугийн талаар ЦЕГ-аас мэдээлэл хийж байна

ЦЕГ-ын Урьдчилан сэргийлэх газрын хэлтсийн дарга, цагдаагийн хошууч Г.Мөнхбаяр “Амь хохирогчийн ар гэрийнхэнд гүн эмгэнэл илэрхийлье. Амь хохирогч О нь 2024 оны нэгдүгээр сарын 29-ны өдөр АТГ-д гомдол гаргасан. Үүний дагуу Авлигатай тэмцэх газрын Мөрдөн шалгах хэлтсээс хүний эрх зөрчигдсөн эсэхэд мөрдөн шалгах ажиллагаа явуулж байгаа. О нь 2024 оны дөрөвдүгээр сараас цагдан хоригдож эхэлсэн. Долоодугаар сарын 12-ноос хэвлий, нуруу өвдөж байна гэх шалтгааны улмаас хорих ангийн эмнэлэгт хэвтэн эмчлүүлж байсан. Энэ сарын 22-ны өдөр бие нь муудаж, гуравдугаар эмнэлэгт хүргэгдэн ирсэн. Долоодугаар сарын 23-ны өдөр цөсны шалтгаант нойр булчирхайн цочмог үрэвсэл, үжил, үжлийн шок зэрэг эмнэлгийн байгууллагын урьдчилсан оноштойгоор нас барсан. Үхлийн шалтгааныг дахин шалгуулахаар ажиллаж байна. Хорих ангид очиход тухайн хоригдогчдын биед үзлэг хийдэг. 461 дүгээр ангиас нийт 16 удаа үзлэг шинжилгээ хийсэн” гэв.

Өнөөдөр буюу долдугаар сарын 25-ны 08:00 цагийн байдлаар Төв аймгийн зүүн, Хэнтий, Дорнод аймгийн нутгуудаар аадар орж байна. Улаанбаатар хот орчмоор аадар бороо өнөөдөр шөнөдөө үргэлжилж орно. Маргааш долоодугаар сарын 26-ний үдээс хойш зогсох төлөвтэй байна. Харин долдугаар сарын 27-оос агаарын хэм дулаарч долоодугаар сарын 28, 29-ны өдрүүдэд түр зуурын бороо орох төлөвтэй байна. Хэнтийн уулархаг нутгаар аадар бороо үргэлжилж орно.

Иймд Хэнтийн уулсаас эхтэй томоохон голууд үерлэх магадлалтай учир голын ай сав дагуу нутаглаж байгаа иргэд болзошгүй үер усны аюулаас сэрэмжтэй байхыг анхааруулж байна.