Month: July 2024

Прокурорын байгууллага 2024 оны долоодугаар сарын 22-ноос 26-ны өдрүүдэд гэмт хэрэг, зөрчил үйлдэгдэхэд нөлөөлсөн шалтгаан, нөхцөлийг арилгуулах, дахин үйлдэгдэхээс урьдчилан сэргийлэх зорилгоор 9 байгууллага, албан тушаалтанд  мэдэгдэл хүргүүллээ. Тухайлбал:

• Сүхбаатар дүүргийн прокурорын газраас иргэн Ц нь гадаад улсын хуурамч мөнгөн тэмдэгтийг “Х” банкны салбарт солиулж, гүйлгээнд оруулсан гэх хэрэгт “Х” банкны салбарын захиралд Валютын тухай хууль, Гэмт хэрэг, зөрчлөөс урьдчилан сэргийлэх тухай хууль тогтоомжийг нэг мөр хэрэгжүүлж ажиллах талаар;
• Сэлэнгэ аймгийн прокуророос газраас сумын ерөнхий боловсролын сургуулийн сурагч хичээлийн танхимд бусадтай маргалдан, эрүүл мэндэд нь хөнгөн хохирол учруулсан хэрэгтэй холбоотойгоор тухайн сургуулийн захиргаанд сурагчдад чиглэсэн эерэг нөлөөллийн болон хууль тогтоомж сурталчлах ажил хийх талаар,
• Тус аймгийн прокурорын газраас аймгийн хэмжээнд зөрчлийн хэргийн гаралт, шалтгаан нөхцөлийг судлан үзэхэд Шаамар суманд 2024 оны эхний хагас жилд үйлдэгдсэн зөрчлийн хэргийн гаралт урьд оноос 5.1 дахин өссөн байна. Тиймээс гэмт хэрэг, зөрчил гарахад нөлөөлж буй шалтгаан нөхцөлийг арилгуулах, урьдчилан сэргийлэх ажил, арга хэмжээ зохион байгуулах талаар сумын Засаг даргад;
• Баянгол дүүргийн прокурорын газраас иргэн О нь нэр бүхий буудалд үйлчлэгчээр ажиллаж байхдаа үйлчлүүлэгчийн цүнхнээс бэлэн мөнгө хулгайлж, хохирол учруулсан гэх хэрэгт гэмт хэрэг гарахад нөлөөлсөн шалтгаан нөхцөлийг арилгах, гэмт хэрэг, зөрчлөөс урьдчилан сэргийлэх ажил, арга хэмжээ зохион байгуулах талаар тухайн аж ахуйн нэгжид тус тус прокурорын мэдэгдэл хүргүүлжээ.

Прокурорын мэдэгдлийг хүлээн авсан байгууллага, албан тушаалтан тухайн зөрчил, гэмт хэргийн шалтгаан, нөхцөлийг арилгах арга хэмжээ авч, нэг сарын дотор бичгээр хариу өгөх үүрэгтэй юм.

Сүүлийн жилүүдэд зуны улиралд орох борооны хэмжээ нэмэгдэж буйтай холбоотой суурьшлын бүсэд бамбай хоншоорт хортой могой олноороо орж ирэх болсон.

Хэрхэн сэргийлэх вэ?

– өндөр өвс, буттай газраар явахаас аль болох зайлсхийх,

– ой мод, хадтай газар явахдаа урт түрийтэй гутал, өмд, бээлий өмсөх,

– хүүхдийн тоглоом, тэрэг гэх мэтийг сайтар шалгах,

– бага насны хүүхдийг хараа хяналтгүй орхихгүй байх,

Могойд хатгуулсан тохиолдолд Гэмтэл согог судлалын үндэсний төвийн салбар эмнэлэг Түлэнхийн төвд нэн яаралтай хандана уу.

Хаяг: Сүхбаатар дүүрэг, 7-р хороо, 100 айлын урд талын 11 дүгээр хороолол, Ерөнхий боловсролын 2 дугаар сургуулийн зүүн урд талд байрлаж байна.

Сургуулийн өмнөх болон бага боловсролын сургалтын хөтөлбөрийг шинэчлэн боловсруулах, сурах бичгийн эх зохиох, хянах багийг 254 гишүүний бүрэлдэхүүнтэйгээр батлав.

“Сургуулийн өмнөх болон ерөнхий боловсролын сургалтын хөтөлбөрийн үзэл баримтлал”-г Засгийн газрын 2024 оны 04 дүгээр сарын 24-ий өдрийн тогтоолоор баталсныг удирдлага болгов.

Энэхүү баг нь удирдлага, зохион байгуулалтын баг, сургалтын хөтөлбөр боловсруулах баг, сурах бичиг боловсруулах баг, сургалтын хөтөлбөр, сурах бичгийг хянах баг зэрэг дэд багуудаас бүрдэж байна.

Эдгээр багууд нь сургалтын хөтөлбөр, сурах бичиг боловсруулах, хэрэгжүүлэхэд төр, хувийн хэвшил, олон нийтийн оролцоог хангаx зарчимд үндэслэн Боловсролын яамны харьяа мэргэжлийн байгууллага (30%), их, дээд сургууль (19%), ерөнхий боловсролын сургууль (25%), сургуулийн өмнөх боловсролын байгууллага (8%), хувийн хэвшил, иргэний нийгмийн байгууллага (13% хувь), олон улсын байгууллага (2%), хувь судлаачид (3%)-н төлөөллөөс бүрдүүлэв.

Багийн бүрэлдэхүүний 17% доктор, 53% магистр, 30% нь бакалавр зэрэгтэй байна. Бага боловсролын сургалтын хөтөлбөр боловсруулах, сурах бичгийн эх зохиохдоо  хичээл тус бүрээр нэг баг 1-5 дугаар ангийг бүрэн, цогцоор нь боловсруулах тул анги хоорондын залгамж, уялдаа холбоо сайжрах болно. Сурах бичгийн агуулга 10-12 жил тогтвортой байхаар төлөвлөж ажиллахыг үүрэгдэв.

Цаашид суурь, бүрэн дунд боловсролын сургалтын хөтөлбөр, сурах бичгийг шинэчлэн боловсруулах багийг байгуулж, сургуулийн өмнөх болон ерөнхий боловсролын сургалтын хөтөлбөрийг залгамж холбоотой, үе шаттайгаар шинэчлэх, нэвтрүүлэх ажлыг эрчимжүүлнэ гэж Боловсролын яамнаас мэдээллээ.

Усны ослоос урьдчилан сэргийлэх ажлын хүрээнд Онцгой байдлын байгууллагын алба хаагчид томоохон гол, мөрөн, нуурын эрэг, ойр орчимд хөдөлгөөнт болон завьт эргүүлийн үүргийг 6-р сарын 10-ны өдрөөс эхлэн гүйцэтгэж байна.

Улаанбаатар хотын хэмжээнд Туул гол дагуу Хар усан тохойгоос Маршлын гүүр хүртэл, Маршлын гүүрнээс Яармагийн гүүр, Яармагийн гүүрнээс Сонсголонгийн гүүр хүртэл автомашин болон завьтайгаар өдөр бүр хөдөлгөөнт эргүүлийн үүрэг гүйцэтгэж байна. Үүрэг гүйцэтгэж эхэлсэн өдрөөс хойш нийслэлийн хэмжээнд давхардсан тоогоор нийт 1035 алба хаагч голын эргийн дагуу 70 гаруй мянган иргэнд сэрэмжлүүлэг, анхааруулга өгч ажилласан.

Орон нутагт Архангай, Баянхонгор, Баян-Өлгий, Булган, Говь-Алтай, Дархан-Уул, Завхан, Дорнод нийт 13 аймгийн 16 нуур, 21 гол, Сэлэнгэ, Дэлгэн мөрний эрэг дагуу өдөр бүр 131 алба хаагч, 24 техник, 20 завьтайгаар хөдөлгөөнт эргүүл хийж иргэдэд сэрэмжлүүлэг мэдээ мэдээлэл хүргэн ажиллаж байна.

“Даншиг наадам-Хүрээ цам 2024” наадам ирэх сарын 3,4-ний өдрүүдэд зохион байгуулагдана.

Энэ үеэр дараах арга хэмжээ болно.

• Хурдан морины уралдаан /Хязаалан, Их нас/
• Цам харайх ёслол
• Мандал өргөх ёслол
• Урлагийн тоглолт
• Морьтны үзүүлбэр
• Балин, тосон урлалын тэмцээн
• Унзад, голч лам нарын тэмцээн
• Номын мэтгэлцээний тэмцээн
• Хүчит бөхийн барилдаан /Үндэсний бөх, Буриад, Өвөрмонгол/
• Монгол үндэсний хувцасны үзүүлбэр
• Үндэсний сур харвааны тэмцээн
• Уухай шагайн харвааны тойром
• Морьт харвааны тэмцээн
• Морьтон баатрын үзүүлбэр
• Сээр цохих тэмцээн зэрэг арга хэмжээ болно

Аялал, зугаалгын үетэй холбогдуулан иргэд хөдөө, орон нутгийг зорих нь ихсэж тэр хэрээр Онцгой байдлын байгууллагад төөрсөн, сураггүй болсон дуудлага мэдээлэл бүртгэгдсээр байна.

Тиймээс иргэд, аялагч, амрагч та бүхэнд болзошгүй аюул, эрсдэл тохиолдсон үед 3 үгт хаягаар дуудлага, мэдээлэл өгөх боломжтой программыг зөвлөж байна.

Энэхүү программын тусламжтайгаар иргэн та болзошгүй аюул, эрсдэл тохиолдсон үед 3 үгт хаяг буюу what3word-аар дуудлага, мэдээлэл өгөх боломжтой бөгөөд өөрийн барьж байгаа гар утаснаасаа хамааран Playstore болон Appstore-оос татаж суулган ашиглах боломжтой юм.

Тодруулбал мэдээлэл, дуудлага өгч байгаа иргэн өөрийн байгаа газрынхаа хаягаа мэдэхгүй, координат өгөх боломжгүй тохиолдолд өөрийн ухаалаг гар утсан дээрээ интернэттэй болон интернэтгүй үед “what3word” программыг ашиглан 3 үгт хаягаа ирүүлснээр дуудлагын байршлыг нарийвчлалтайгаар тогтоож, цаг алдалгүй шуурхай мэдээллийг хүлээн авах боломжийг бүрдүүлдэг юм.

Мөн та тухайн газар, орныхоо онцлогийг судалж, цаг агаарын урьдчилан сэргийлэх мэдээ, мэдээллийг тогтмол хүлээн авч, техник хэрэгсэл болон хувийн бэлтгэл, бэлэн байдлаа сайтар ханган болзошгүй эрсдэлээс урьдчилан сэргийлээрэй.

Дорнод аймгийн Сэргэлэн сумын Очир хүрээ багийн “Шар бүрд” гэдэг газар 07.25-ны өдрийн 15:00 цагийн орчим малчин С нь малаа хариулж яваад сураггүй алга болжээ.

Энэ  тухай дуудлагыг мөн өдрийн 21:21 цагт хүлээн авсан. Тус аймгийн Онцгой байдлын газрын Эрэн хайх, аврах ангийн алба хаагчид  малчин С /45 настай, эмэгтэй/-ыг мөн өдрийн 21:49 цагаас эрэн хайх ажиллагааг зохион байгуулж, 07.26-ны өдрийн 00:24 цагт аймгийн төвөөс хойд зүгт 2 км-т хээрээс эсэн мэнд олж, ар гэрийнхэнд нь хүлээлгэн өгсөн байна.