Month: April 2024

Архангай аймгийн Тариат сумын “Чулуут” голоор хоёр хүн мотоциклтой гарч байгаад нэг хүн нь голын усанд осолдсон тухай дуудлагыг дөрөвдүгээр сарын 6-ны 21:40 цагт онцгой байдлын байгууллагад ирүүлжээ.

Дуудлагын дагуу тус аймгийн Онцгой байдлын газрын Тариат сум дахь Эрэн хайх, аврах бүлгийн алба хаагчид 47 км замыг туулан дөрөвдүгээр сарын 7-ны 00:40 цагт очсон байна. Алба хаагчдыг очиход иргэн Э /52 настай, эрэгтэй/ голын усаар мотоциклоо түрж гарч байгаад осолдсон байсан бөгөөд үзэгдэх орчин хязгаарлагдмал тул тандалт хийж эрэн хайх ажиллагааг 01:30 цагт зогсоожээ. Улмаар өчигдөр 07:00 цагаас эрэн хайх ажиллагааг эхлүүлж, 09:10 цагт тус багийн “Хавчигийн-Ам” гэдэг газар /анх осолдсон газраас зүүн зүгт 2 км/-аас цогцсыг олж уснаас гарган Цагдаагийн байгууллагад шилжүүлж өгсөн байна.

2024 оны 04 сарын 01-ний 08 цагаас 2024 оны 04 сарын 08-ны 08 цаг хүртэлх 7 хоногийн цаг агаарын тойм мэдээ хүргэе.

Цасны зузаан: Өнөө өглөөний цаг уурын станц, харуулын цасны зузааны мэдээгээр Увсын хойд хэсэг, Ховд, Говь-Алтайн нутгийн зарим газар, Баянхонгорын өмнөд хэсгээр 0.0-21.0 см зузаан цасан бүрхүүл тогтсон байна. Үүнээс хамгийн их нь Баянхонгорын Баянцагаанд 21.0 см, Шинэжинстэд 16.0 см, Увсын Давстад 18.0 см, Сагилд 14.0 см, Ховдын Мөстөд 17.0 см, бусад хэсгээр 0.0-10.0 см цасан бүрхүүл тогтсон байна.

Хур тунадас: 01-нд төвийн аймгуудын зүүн хэсэг, зүүн аймгуудын ихэнх нутаг, говийн аймгуудын баруун өмнөд болон зүүн хойд хэсгээр 0.0-7.0 мм, 02-нд Говь-Алтайн нуруу, Хэнтийн уулархаг нутаг, Сэлэнгэ голын хөндий, говийн бүс нутгийн баруун хэсгээр 0.0-9.0 мм, 03-нд баруун аймгуудын нутгийн зарим газар, төвийн аймгуудын баруун өмнөд хэсэг, говийн аймгуудын нутгийн баруун хэсгээр 0.0-10.0 мм, 04-нд баруун болон төв аймгуудын нутгийн зарим газар, говийн аймгуудын нутгийн өмнөд хэсгээр 0.0-8.0 мм, 05-нд Завханы зарим нутаг, Дорнодын зүүн хэсгээр 0.0-0.3 мм, 06-нд Ховдын өмнөд, Төв аймгийн хойд хэсэг, Хэнтий, Дорнодын зарим газар, Говь-Алтай, Сэлэнгийн ихэнх нутгаар 0.0-9.0 мм, 07-нд баруун аймгуудын нутгийн ихэнх хэсэг, төвийн болон зүүн аймгуудын нутгийн хойд хэсэг, говийн аймгуудын нутгийн зарим газраар 0.0-19.0 мм бороо, нойтон цас орсон байна. Үүнээс хамгийн их нь Ховдын Цэцэгт 19.0 мм, Мөстөд 13.4 мм, Алтайд 13.3 мм, Баянхонгорын Баянцагаанд 19.0 мм, Шинэжинстэд 15.0 мм, Баянлигт 12.0 мм, Баянговьд 11.0 мм, Завханы Цагаанхайрханд 12.0 мм, Өмнөговийн Даланзадгадад 11.4 мм, Говь-Алтайн Тонхилд, Жинстэд 11.0 мм, бусад нутгаар 0.0-10.4 мм бороо, нойтон цас орсон байна.

Агаарын хамгийн их температур: Ихэнх хугацаанд Увс нуур болон Дархадын хотгор, Хангайн уулархаг нутаг, Тэс, Халх голын хөндийгөөр 3 хэм хүйтнээс 2 хэм дулаан, Алтай, Хангай, Хөвсгөл, Хэнтийн уулархаг нутаг, Байдраг, Туул, Тэрэлж голын хөндийгөөр 5-10 хэм, говийн бүс нутгийн өмнөд хэсэг болон Орхон-Сэлэнгийн бэлчирээр 13-18 хэм, бусад нутгаар 8-13 хэм дулаан байв.

Агаарын хамгийн бага температур: Хугацааны эхэн үед Монгол-Алтайн уулархаг нутгаар 10-13 хэм, Увс нуур болон Дархадын хотгор, Хангай, Хөвсгөл, Хэнтийн уулархаг нутаг, Завхан голын эх, Идэр, Тэс, Байдраг, Эг, Үүр, Туул, Тэрэлж голын хөндийгөөр 5-10 хэм хүйтэн, говийн бүс нутгийн өмнөд хэсгээр 2 хэм хүйтнээс 3 хэм дулаан, бусад нутгаар 2-6 хэм хүйтэн байв. Хугацааны сүүлчээр ихэнх нутгаар 1-9 хэмээр дулаарч Монгол-Алтайн уулархаг нутаг, Увс нуур болон Дархадын хотгор, 5-11 хэм, Хангай, Хөвсгөл, Хэнтийн уулархаг нутаг, Завхан голын эх, Идэр, Тэс, Байдраг, Эг, Үүр, Туул, Тэрэлж, Хэрлэн, Онон, Халх, Улз голын хөндий, Дорнодын тал нутгаар 0-5 хэм хүйтэн, говийн бүс нутгийн өмнөд хэсэг, Хараа голын сав газраар 3-8 хэм дулаан, бусад нутгаар 1 хэм хүйтнээс 4 хэм дулаан байв.

Cалхи: Ихэнх нутгаар секундэд 5-10 метр, 01-нд говь, тал, хээрийн нутгаар секундэд 13-18 метр, түр зуур секундэд 22-24 метр, 04-нд Алтайн салбар уулс, болон тал, хээрийн нутгаар секундэд 12-14 метр, 05-нд говь, талын нутгаар секундэд 12-16 метр, 06, 07-нд зүүн аймгуудын нутгаар зарим үед секундэд 12-14 метр хүрч ширүүсэж, нутгийн өмнөд хэсгээр шороон шуурга шуурсан байна.

Улаанбаатар хот орчмоор:

Хур тунадас: 4 сарын 01-нд, 07-нд 0.0 мм бороо, нойтон цас орсон байна.

Cалхи: Ихэнх хугацаанд секундэд 3-8 метр.

Агаарын температур: Хугацааны эхэн үед шөнөдөө 0-5 хэм хүйтэн, өдөртөө 3-8 хэм дулаан байв. Хугацааны сүүлээр шөнөдөө Яармаг-Сонгины орчмоор 6 хэм хүйтэн,  бусад хэсгээр 1 хэм хүйтнээс 2 хэм дулаан, өдөртөө 10-14 хэм дулаан байв.

Нийслэлийн Баянгол, Баянзүрх дүүргийн нутаг дэвсгэрт 2024 оны 04 дүгээр сарын 04-ний өдөр иргэн З, Ц нар нь орон сууцны хорооллын дунд, гудамж талбайн явган хүний зам дээр тээврийн хэрэгслийг тус бүр байрлуулж явган зорчигчийн хөдөлгөөнд саад учруулсан байна.

Цагдаагийн байгууллагаас дээрх үйлдэлд зөрчил шалган шийдвэрлэх ажиллагаа явуулж 2024 оны 04 дүгээр сарын 04-ний өдөр Зөрчлийн тухай хуулийн 14.7 дугаар зүйлийн 35 дахь хэсгийн 35.2-д зааснаар зөрчилд холбогдогч нарт тус бүр 20 нэгжээр торгох шийтгэл оногдуулжээ.

Цагдаагийн байгууллагаас Монгол Улсын замын хөдөлгөөний дүрэм зөрчсөн үйлдлийг нисгэгчгүй нисэх төхөөрөмж “DRON”-ийн тусламжтай илрүүлж, хариуцлага оногдуулах ажлыг зохион байгуулж байгаа. Мөн иргэд замын хөдөлгөөний аливаа зөрчлийн талаарх мэдээллийг гар утасны E-Police апликейшн ашиглан цагдаагийн байгууллагад мэдээлэх боломжтой.

ЦХХХЯ, ЭМЯ, НҮБ-ын Хүүхдийн сан хамтран “Төрийн бүтээмжийн сэргэлт- Эрүүл мэндийн салбарын цахим шилжилт” үндэсний зөвлөлдөх уулзалт зохион байгууллаа.

Уулзалтын эхэнд ЦХХХ-ны сайд Н.Учрал, “Эрүүл мэндийн салбарт цахим шилжилтийг эрчимжүүлж, систем хооронд мэдээлэл солилцох боломж бүрдүүлэхийг судалж санал боловсруулах ажлын хэсэг байгуулсан. Эрүүл мэндийн салбарт идэвхтэй үйл ажиллагаа явуулж буй программ хангамж үйлдвэрлэгч ААН-тэй хамтран эрүүл мэндийн төрөлжсөн мэдээллийн санг бодит цагийн горимд нэгтгэх нөхцөл бүрдүүлж, үндсэн систем “ХУР”-тай холбогдон, иргэний зөвшөөрлөөр эрүүл мэндийн байгууллага хооронд эрүүл мэндийн мэдээллийг дамжуулах боломжтой болсон. Төрийн цахим үйлчилгээний нэгдсэн систем “И-Монгол”-д эрүүл мэндийн нэн шаардлагатай “Эмийн жор”, “Шинжилгээний хариу”, “Дүрс оношилгооны дүгнэлт”, “Хүүхдийн урьдчилан сэргийлэх тарилгын гэрчилгээ”, “Амбулаториор эмчлүүлэгчдийн карт”, “Жирэмсэн эмэгтэйн хяналтын хөтөч карт”, “Эх, хүүхдийн эрүүл мэндийн дэвтэр”-ийг цахимд шилжүүлэн, 5 дугаар сарын 4-өөс өмнө нэвтрүүлнэ. Ингэснээр иргэд цаг, мөнгө хэмнэх, хүнд суртал, аливаа эрсдэлийг багасгах боломжтой”-г илтгэлдээ онцолсон юм.

Эрүүл мэндийн дэд сайд С.Энхболд Эрүүл мэндийн салбарын цахим шилжилтийн талаар танилцуулж, Дэлхийн эрүүл мэндийн байгууллагын Эрүүл мэндийн хамтын ажиллагааны зөвлөлийн шинжээч, АНУ-ын Карнеги Меллон их сургуулийн зөвлөх Диксон Памела Грахам ДЭМБ, Олон улсын цахилгаан холбоо хамтран гаргасан “Цахим эрүүл мэндийн хүрээ”-ний талаарх мэдээлэл өглөө. Уулзалтаар ЦХХХЯ-ны Цахим хөгжлийн бодлогын хэрэгжилтийг зохицуулах газрын дарга Б.Билэгдэмбэрэл “Салбар хоорондын мэдээлэл солилцоо” , Азийн цахим эрүүл мэндийн холбооны олон улсын зөвлөх Амийра Хамидын “Монгол Улс дахь “Цахим эрүүл мэнд”-ийн нөхцөл байдлын хөндлөнгийн үнэлгээний үр дүн”-г танилцуулав. Мөн “Их өгөгдлийн дүн шинжилгээ”, “Алсын зайн анагаах ухааны олон улсын сайн туршлага”, “Эрүүл мэндийн мэдээллийн аюулгүй байдал”, “Хиймэл оюун ухааныг эрүүл мэндийн салбарт ашиглах нь”, “Зүрх судасны өвчний оношилгоо эмчилгээг сайжруулахад телемедицин ашигласан туршлага” илтгэлийг сонсож, хэлэлцүүлэг өрнүүлж байна.

Улсын Их Хурлын дэд дарга Л.Мөнхбаатар 2024 оны дөрөвдүгээр сарын 05-ны өдөр Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төслийг Монгол Улсын Их Хурлын дарга Г.Занданшатарт өргөн мэдүүлэв.

1992 оны 01 дүгээр сарын 13-ны өдөр ардчилсан шинэ Үндсэн хуулийг баталсан бөгөөд гуравдугаар бүлэгт төрийн эрх мэдлийн хуваарилалтыг хийж шүүх эрх мэдлийн талаар тусгайлан зохицуулсан. Шинэ Үндсэн хуулийн үзэл баримтлалд нийцүүлэн Монгол Улсын Их Хурлаас 1993 оны 06 дугаар сарын 14-ний өдөр Шүүх байгуулах тухай хуулийг анх баталсан хэмээн хуулийн төсөл санаачлагч танилцуулав.

Тэрбээр, Шүүх байгуулах тухай хууль батлагдсан өдөр буюу 06 дугаар сарын 14-ний өдрийг “Шүүхийн өдөр” хэмээн тэмдэглэлт өдөр болгох тухай заалтыг Нийтээр тэмдэглэх баярын болон тэмдэглэлт өдрүүдийн тухай хуульд нэмсэн. Ингэснээр шүүхийн үйл ажиллагааг олон нийтэд сурталчлан таниулах, шүүхийн үйл ажиллагааны талаар олон нийтэд үнэн зөв, бодит мэдээллийг хүргэх зэрэг иргэдэд чиглэсэн арга хэмжээг зохион байгуулах зэргээр шүүхэд итгэх иргэдийн итгэлийг нэмэгдүүлэх ач холбогдолтой гэлээ.

Хуулийн төсөл нь нэг зүйлтэй байх бөгөөд Нийтээр тэмдэглэх баярын болон тэмдэглэлт өдрүүдийн тухай хуулийн 5 дугаар зүйлд “Шүүхийн өдөр” гэсэн “5.1.18.Шүүхийн өдөр, 6 дугаар сарын 14” заалт нэмэхээр тусгажээ.

Хуульд нэмэлт оруулах тухай төслийг 2023 оны 05 дугаар сарын 22-ны өдрөөс эхлэн цахим хуудсанд санал авахаар байршуулахад иргэд, олон нийтээс санал ирүүлээгүй бөгөөд хуулийн төсөл батлагдаж, хэрэгжсэнээр улсын төсвөөс нэмэлт хөрөнгө шаардлагагүй гэж Улсын Их Хурлын Хэвлэл мэдээлэл, олон нийттэй харилцах газраас мэдээлэв.

Чингэлтэй дүүргийн 20 дугаар хороо, Баянхошууны шинэ буудалд “Миний” дэлгүүрийн агуулахад гарсан гал түймрийг унтраах ажиллагаа үргэлжилж байна.

НОБГ-ын тэргүүн дэд дарга, хурандаа Д.Мөнхсайхан “Анх дөрвөн хүнтэй тасаг ирж галыг унтраах ажиллагааг эхлүүлсэн. Үүнээс хоёр албан хаагч хөнгөн бэртэл аваад эмнэлгийн анхан шатны тусламж авахаар явсан. Онцгой байдлын алба аюулгүй байдлыг сайтар ханган ажиллаж байна” гэв.