Month: February 2024

Баян-Өлгий аймгийн Дэлүүн суманд энэ сарын 12-нд уулын цасны нурангид дарагдсан иргэний цогцсыг нуранги үүссэн газраас 300 метрийн зайд дөрвөн метрийн гүнээс өнөөдөр буюу 17-ны 16:05 цагт олджээ.

Эрлийн ажиллагаанд тус аймгийн Онцгой байдлын газрын дарга, дэд хурандаа З.Азатаар ахлуулсан Онцгой байдлын газрын Эрэн хайх, аврах бүлэг, Хилийн 0165 дугаар ангийн 0135 дугаар салбар, Зэвсэгт хүчний 331, 340 дүгээр анги, аймгийн Цагдаагийн газрын нийт 70 орчим алба хаагч, гурван эрэлч нохой, 10 орчим тусгай зориулалтын автомашин ашиглаж оролцсон юм.

Мөн Ховд аймгийн Алтай, Булган, Үенч, Сүхбаатар аймгийн Эрдэнэцагаан, Түмэнцогт, Дундговь аймгийн Дэлгэрцогт, Баян-Өлгий аймгийн Булган суманд сураггүй болсон долоон дуудлага бүртгэгдсэн.

Алба хаагчид Ховд аймгийн Алтай суманд өчигдөр буюу 16-нд сураггүй болсон нэг иргэн болон Дундговь аймгийн Дэлгэрцогт суманд сураггүй болсон иргэнийг эсэн мэнд оллоо.

Бусад таван иргэнийг эрэн хайх ажиллагаа үргэлжилж байна гэж Онцгой Байдлын Ерөнхий Газараас мэдээллээ.

Нийслэл хотод энэ сарын 17 буюу өнөөдөр зам талбайн цэвэрлэгээ үйлчилгээний 24 байгууллагын 620 ажилтан албан хаагчид авто замын халтиргаа гулгаа үүсэхээс сэргийлэн 123 тусгай зориулалтын машин, техникээр хусалт хийжээ.

Мөн урьдчилан сэргийлэн 173.5 тонн тусгай зориулалтын бодис, 98.5 тонн давс цацсан аж.

Энэ амралтын өдрүүдэд нийт нутгаар эрс хүйтрэх төлөвтэй байгааг албаныхан анхааруулж байгаа билээ.

Цас дагтаршиж халтиргаа үүсэхээс өмнө орчны 50 метрийн талбайгаа цэвэрлэхийг байгууллага аж ахуйн нэгж, иргэддээ уриалж байна.

Цаг агаар, авто замын нөхцөл байдалтай холбогдуулан Улаанбаатар хотоос урагшаа чиглэлд Өлзийт, баруун чиглэлд Эмээлтийн товчоогоор тээврийн хэрэгслийн хөдөлгөөнийг өнөөдөр/2024.02.17/ 13:30 цагаас хязгаарлажээ.

Хязгаарлалт 15:30 цаг хүртэл үргэлжилнэ хэмээн УОК-оос мэдээллээ.

Дийлэнх чиглэлд тэнгэр бүрхэг, цасаар шуурч үзэгдэх орчин хязгаарлагдмал байгаа тул авто замын хөдөлгөөнд оролцогч жолооч, тээвэрлэгчид анхаарал болгоомжтой зорчихыг анхааруулж байна.

Архангай аймгийн хойд сумдаар цас үргэлжлэн орж байна. Өөрөөр хэлбэл, Тариат, Булган сумаас бусад сумын нутагт 1-8 см зузаан цас нэмж орсон ба нэмэгдэх хандлагатай байна.

Өчигдөр өдөр Эрдэнэмандал, Жаргалант, Хайрхан, Цэцэрлэг сумын нутгаар 0.0-4.0 мм, өнгөрсөн шөнө Булган сумаас бусад сумдын нутгаар 0.0-4.0 мм цас оржээ.

Өнөө өглөөний 08.00 цагийн цаг уурын харуулын мэдээгээр Эрдэнэмандал, Батцэнгэл, Хайрхан сумын нутгаар 24-28 см, Тариат, Төвшрүүлэх, Жаргалант, Өгийнуур, Өлзийт, Өндөр-Улаан, Хангай, Хашаат, Хотонт, Цахир сумдын нутгаар 10-17 см, Эрдэнэбулган, Булган, Цэцэрлэг, Чулуут сумын нутгаар 3-9 см зузаан цасан бүрхэцтэй байна гэлээ.

Салхи нийт нутгаар секунтэд 3-16 метр хүрч ширүүссэн байна. Үүний дотор урд шөнө Эрдэнэмандал, Батцэнгэл, Булган, Өгийнуур, Хангай сумын нутгаар секунтэд 11-12 метр, өчигдөр өдөр Эрдэнэбулган, Тариат, Эрдэнэмандал, Төвшрүүлэх, Батцэнгэл, Булган, Өлзийт, Хангай, Хотонт, Цэцэрлэг, Цахир сумдын нутгаар секунтэд 11-16 метр хүрч, ширүүсчээ.

Сургууль, цэцэрлэгийн хүртээмжийг нэмэгдүүлэх, боловсролын чанарыг дээшлүүлэх чиглэлээр нийслэлээс хийж, хэрэгжүүлж байгаа ажлын талаар Нийслэлийн Засаг даргын орлогч О.Номинчимэг мэдээллээ.

Тэрээр “Сүүлийн хоёр жилийн хугацаанд сургууль, цэцэрлэгийн асуудлыг ихэд анхаарч, төсөвт тусгаж ирсэн. Газар зохион байгуулалт, төлөвлөлтийн алдаанаас болоод тухайн хэсэгтээ сургууль цэцэрлэгийн хүртээмж багатайгаар байгуулагдсан газруудад газар чөлөөлөлт хийж, улсын сургууль, цэцэрлэг байгуулах зорилгоор төсвийн тодотгол хийгээд байгаа.

Ингэхдээ 11 сургууль, цэцэрлэгийн асуудлыг төсвийн тодотголд тусгаж, нийт 26.3 тэрбум төгрөгийг төсөвлөсөн. Тухайлбал,

• Баянгол дүүргийн 24 дүгээр хороо буюу Алтай хотхон
• Хан-Уул дүүргийн 17 дугаар хороо буюу Маршал таун, Кинг тауэр орчимд сургууль
• Сүхбаатар дүүргийн есдүгээр хорооны Ногоон нуур орчимд 240 ортой цэцэрлэг
• Материал имфекс хавьцаа болон Баянзүрх дүүргийн 36 дугаар хорооны Үндэсний цэцэрлэгт хүрээлэнгийн хойд талд 960 болон 640 хүүхдийн багтаамжтай сургууль барихаар төлөвлөж холбогдох хөрөнгө оруулалтыг тусгаад байна.

Таван байршилд газрын зөвшилцөлд хүрсэн. Мөн улсын сургууль, цэцэрлэг барих шаардлагатай арван байршил байгаа учраас газар чөлөөлөлтийн мөнгийг төсвийг нэмсэн. Үүнээс гадна тусгай хэрэгцээт 29 дүгээр сургууль болон дотуур байранд нь 4.5 тэрбум төгрөгөөр капитал засвар хийхээр тодотгол оруулсан.

Энэ онд нийслэлээс сургууль цэцэрлэгийн хүртээмжийн асуудалд нийт 146 тэрбум төгрөгийг төсөвлөсөн” гэлээ.

Нийслэлийн онцгой байдлын газарт өнгөрсөн хоногт нийслэлийн хэмжээнд цасанд суусан нэг, гал түймрийн таван дуудлага мэдээлэл иржээ.

Баянзүрх дүүргийн 11 дүгээр хороо, Хонхорын төмөр замын гарамын урд талд автомашинтай цасанд суусан бага насны хүүхэдтэй байгаа гэсэн дуудлагыг 03:02 цагт ирүүлсэн байна. Дуудлагын дагуу Аврах ангийн алба хаагчдыг очиход 10-38 насны найман иргэн Toyota Harrier, Subaru forester маркийн автомашинтай цасанд суусан байсныг машиныг гаргах боломжгүй тул үлдээж, иргэдийг аюулгүй газарт хүргэжээ.

Өнөөдөр ихэнх нутгаар цас орж, цасан шуурга шуурах тул цасанд сууж, төөрч осгохоос сэргийлэн хол, ойрын замд гарахгүй байхыг анхааруулж байна.

Өнгөрсөн хоногт буюу хоёрдугаар сарын 16-нд баруун аймгуудын нутгийн өмнөд болон хойд хэсэг, төвийн аймгуудын ихэнх нутаг, зүүн аймгуудын нутгийн баруун хэсгээр 0.0-17.0 мм цас орсон байна.

Үүнээс хамгийн их нь Ховдын Үенч суманд 17.0 мм, Алтайд 16.0 мм, Байтагт 14.0 мм цас оржээ. Баян-Өлгийн Булган 9.0 мм, Увсын Түргэнд 6.0 мм, Завханы Их Уул, Архангайн Жаргалант, Өндөр-Улаан, Булганы Дашинчилэн 4.0-4.8 мм, бусад нутгаар 0.0-3.5 мм цас орсон байна.