Month: January 2024

“Шинэ Сандэй”-ын гадаа  цагаан сарын үзэсгэлэн худалдаа болж байна. Иргэд портерийнхоо тэвшин дээр ууц, гулууз мах зарж байлаа.

Бид энэ удаа  “Шинэ Сандэй” худалдааны төвөөс сурвалжлага бэлтгэлээ.

Тэдгээр хүмүүс дунд хүүхдүүддээ хэлэлгүй тор, даавуун уут зардаг эмээ ч байлаа.

Гадаа талбайн түрээс дунджаар сард 600 мянган төгрөг.  Харин дотор талбайн түрээс маань 350 мянган төгрөг гэв

Энэ талаар Иргэн А “Манай лангуу өдөрт 20 мянган төгрөгийн түрээс төлдөг. Манайх мөн урд байгаа барилга дотор нарийн ногооны  лангуутай. Дөрвөн жилийн өмнө өдөрт 10 мянган төгрөг төлдөг байлаа. Нийтдээ гадаа талбайн түрээс дунджаар сард 600 мянга болдог харин дотор талбайн түрээс маань 350 мянган төгрөг. Мэдээж өдрийн хоол авч идэх гэх мэт урсгал зардлууд бас байгаа.

Энд өглөө эрт ирж машинаа байршуулахын тулд бензин, шатахуун зарцуулна. Хүйтэнд зогсоод ойр ойрхон бие засдаг болох ч асуудал байна. Гадаа хүйтэнд худалдаа хийж байгаа бид эргээд эрүүл мэндээрээ хохирч байна” хэмээн ярилаа.

Харин иргэн С.Төмөрмөнх “Манай асар үнэгүй энд байрлаж байгаа. Учир нь БГД-ээс худалдаа эрхлэх хүсэлтэй хүмүүст үнэгүй олгосон талбай. Гадаа хүйтэнд нийтийн өмчийн талбайг үнэгүй түрээслэлгүй яахав вээ. Бүх асар битүүний өдрийн орой татан буугдана. “Шинэ Сандэй” урд байрлаж байгаа асрууд 500 мянган төгрөгөөр түрээсэлж байгаа. Бидэн шиг хүмүүс бол үнийг нь дийлэхгүй” гэв.

Хүүхдүүддээ хэлэлгүй тор, даавуун уут зарж байна. Тэдэнд төвөг удахыг хүсээгүй

Иргэн Ө хүүхдүүддээ төвөг удахгүйн тулд тэдэнд хэлэлгүйгээр тор, даавуун уут зарж буйгаа хуучилсан юм.

Тэрбээр “Эмээ нь тэтгэврийн зээлтэй. Бага хүүдээ зээл авч өгсөн. Том охиндоо энэ тухай хэлээгүй. Тор, даавуун уут зарахгүй бол ямар мөнгөөрөө цайны сүү, түлээ нүүрс авах, цагаан сар хийх мөнгөө олох билээ. Хүүхдүүд маань намайг зах дээр тор, даавуун уут зардгийг мэдэхгүй. Мэдвэл намайг болиулна шүү дээ. Үр хүүхдүүддээ төвөг удмааргүй байна” хэмээн ярьсан юм.

Иргэн Б.Батбаатар “Манайх Төв аймгаас ирж хэдэн хонио зарж байгаа. Ууц 200-450 мянган төгрөгийн хооронд байна. Тарга тэвээргээсээ хамаараад үнэ хэлбэлзэнэ. Гадаа юмаа зарж байгаа бүх хүмүүс ялгаагүй 20 мянган төгрөг түрээсэнд төлдөг. Өглөө эрт ирээд машинаа байрлуулдаг. Түрээсийн үнэ бол боломжийн байна. Ченжид хямдхан өгч байхаар өөрсдөө ийнхүү зогсоод зарсан нь илүү ашигтай байна шүү дээ. Авч байгаа хүмүүстээ ч арай хямд болно. Учир нь хүн дундаас нь үнэ нэмэхгүй.

Тэр ченжүүд чинь намар идэш хийх үеэр их хэмжээгээр мах хямд аваад зооринд хийгээд хадгалчихдаг. Тэгээд хавар хямдхан авсан махаа үнэтэй зардаг улс шүү дээ. Нөхцөл байдал ийм байхад яаж бид махаа үнэ хүргэж зарж чадахгүй. Иргэд ч хямдхан авах боломжгүй” гэв.

Онцгой байдлын байгууллагын алба хаагчдын хувцас хэрэглэл хангамж, стандартын талаар ОБЕГ-ын Санхүү, ар талын газрын дарга, хурандаа Я.Гантөмөр, Гал түймэртэй тэмцэх газрын хэлтсийн дарга, дэд хурандаа П.Соронзонболд нар мэдээлэл хийлээ.

ОБЕГ-ын Санхүү, ар талын газрын дарга, хурандаа Я.Гантөмөр “Онцгой байдлын байгууллагын хувцас хангалтыг техник, хүн нэг бүрийн хамгаалах хэрэгсэл буюу тусгай зориулалтын хувцас хэрэглэл, өдөр тутмын хувцас хэрэглэл гэж гурав ангилдаг. Онцгой байдлын хэмжээнд Польш, Беларусь, Франц улсын өндөр чанартай техникүүдээр тоноглогдож байна. Улсын төсвийн хөрөнгө оруулалтаар “Toyota” загварын автомашинаар парк шинэчлэлийг хийж байгаа. Хүн нэг бүрийг хамгаалах тусгай зориулалтын хувцас, багаж техникийн хувьд улсын төсөвт тавигдсан мөнгөний хэмжээгээр худалдан авалт зохион байгуулдаг. Өдөр тутмын хувцас хэрэглэлийг улсын төсөвт тавигдсан хөрөнгийн хэмжээгээр алба хаагчдад авч өгдөг. Алба хаагчдын хувцас хэрэглэлд мөрдөгддөг стандарт бий. Өндөр үнэтэй, чанартай хувцас байж болно, энэ хэмжээгээр худалдан авах гэхээр тоо нь багасдаг асуудал тулгардаг. Тийм учраас монгол орны цаг агаарт тохирсон, боломжийн үнэтэй хувцас хэрэглэлийг авахыг зорьж ажилладаг. Онцгой байдлын байгууллага төрийн цэргийн байгууллага. Энэ байгууллагын төсөв, хүч хэрэгслийн мэдээлэл төрийн болон албаны нууцад хамаардаг. Өнгөрсөн оны 7-8 дугаар сард үер болох үеэр улсын Онцгой комисс, Засгийн газраас Онцгой байдлын байгууллагын техник, хувцас хэрэглэлийг нэмэгдүүлэх тогтоол гарч, Сангийн сайд Б.Жавхланд үүрэг болгосон. Энэ хүрээнд улсын төсвийн 15 тэрбум төгрөгөөр тусгай зориулалтын хувцас хэрэглэл, техник тоног төхөөрөмж энэ жил худалдан авалт хийнэ. Тусгай зориулалтын усны хувцас өндөр үнэтэй бөгөөд дотроо хуурай болон нойтон гэж ангилагддаг. Хуурай хувцас нь өндөр үнэтэй учир дөрвөн аврагч тутмын нэг нь усны хувцастай” хэмээлээ.

Харин Гал түймэртэй тэмцэх газрын хэлтсийн дарга, дэд хурандаа П.Соронзонболд “Гал унтраах ажиллагаанд өмсдөг алба хаагчдын иж бүрэн хувцас объектын буюу ахуйн хүрээний, ой, хээрийн гал түймрийн гэж ангилагддаг. Хувцасны хамт хэрэглэгдэж байгаа амьсгалын бие даасан төхөөрөмж, бидний хэлдгээр байлдааны сүх, нэг бүрийн хэрэгсэл, дуулга малгай гээд хамгаалах тусгай хувцасны стандартад ордог. Энэ гурван төрлийн стандартын хамгаалах хувцсыг иж бүрэн хэрэгсэлтэй нь өмсөх журамтай. Гал түймэр унтраах үйл ажиллагаанд хөдөлмөрийн аюулгүй байдал, эрүүл ахуй, гал түймэр унтраах дүрэм, амьсгалын бие даасан төхөөрөмжийг дагаж мөрдөх стандарт, нормын дагуу оролцдог. Хар өнгөтэй нь БНХАУ-д, шаргал өнгийн хувцас нь ОХУ-д үйлдвэрлэгдсэн. ОХУ-аас худалдаж авч байгаа шаргал өнгөтэй хувцас нь хөвөнтэй дотортой, зуны улиралд дотрыг салгадаг. Тус хувцасны гаднах материал нь +400 хэмд тэсвэртэй, үүрэг гүйцэтгэхэд хөдөлгөөнд саад болохгүй. Баг буюу амьсгалын бие даасан төхөөрөмж, баллонтой. Шахсан агаарын баг хэрэглэж байна. Энэ баг нь хүчилтөрөгчийн цэвэр агаараар амьсгалж байгаа учраас ачаалал авах хэмжээнээс шалтгаалаад дунджаар 40 минут ажиллана. Аврагчдад утаатай орчинд сандрах үед амьсгалаа хэрхэн зөв авах талаар сургалтыг тогтмол зохион байгуулдаг. Нийт алба хаагчдын 80%-ийг эдгээр хувцсаар хангасан. Аврагч өөрийн аюулгүй байдлыг хангасны үндсэн дээр гал унтраах ажиллагааг гүйцэтгэх дүрэмтэй. Гал түймэр унтраах үйл ажиллагаа явагдсаны дараа дүрэм, журам, тактикийн алдаа гарсан эсэхээ ярилцдаг. Тэсэрч дэлбэрэх бодис бүхий объект, өндөр барилга, ил задгай газарт гарсан гал түймэрт ямар хошуу, хоолойг яаж хэрэглэхийг гал түймэр унтраах цусаар бичигдсэн дүрэмд заасан байдаг. Гал унтраах болон шуурхай албаны машины жолооч нар гадаа тогтмол үүрэг гүйцэтгэдэг учир өвлийн хээрийн хувцастай байдаг. Объект дотор гал унтраах бол иж бүрэн хувцсыг өмсдөг” гэлээ.

Дүнжингаравын уулзварт болсон ослын үеэр онцгой байдлын гурван алба хаагч харамсалтайгаар амиа насаа алдсан.

Гал унтраах, аврах үүргээ гүйцэтгэж яваад амь эрсэдсэн тэдний гэр бүлд нийслэлээс “Буянт-Ухаа 2” хороололд тус бүр гурван өрөө байр өгөхөөр шийдвэрлэжээ.

Засгийн газрын өнөөдрийн хуралдаанаар дээрх ослын урьдчилсан хохирлыг тооцох, галд өртсөн орон сууцны оршин суугчдыг түрээсийн байранд байрлуулах зэрэг цаашид авах арга хэмжээний талаар хэлэлцэж байна

Нийслэлийн хоёр цэгт 10:00 цагийн байдлаар агаарын чанар маш муу үзүүлэлтийг давлаа.

Тодруулбал Хайлааст, Налайхад агаарын чанарын индекс 500-гаас дээш утгыг заав. Мөн Дамбадаржаа орчимд агаарын чанарын индекс 472 байгаа нь агаарын маш их бохирдолтойг илтгэж байна.

Агаарын чанарын индекс 401-500 байх үед хүн бүр гадаа биеийн хүч шаардсан ямар ч төрлийн ажил хийхээс зайлсхийх гэртээ байх хэрэгтэй. Цэвэр агаарт салхинд гарах хэрэгтэй. Архаг хууч өвчтэй хүмүүс даралтаа тогтмол хянах, эмчийн хяналтад байж эмийг хугацаанд нь уух шаардлагатай. Нүүрстөрөгчийн дутуу исэл их хэмжээгээр гаргадаг эх үүсвэр (тухайлбал автозам)-ээс хол байх хэрэгтэй. Мөн амны хаалт зүүх шаардлагатайг мэргэжлийн байгууллагаас зөвлөдөг.