Month: March 2023

Хөвсгөл аймгийн Ханх сумын Хороо багийн нутаг аймгийн төвөөс зүүн хойд зүгт 341 км, сумын төвөөс баруун урд зүгт 41 км-т орших Хачим хэмээх газарт гуравдугаар сарын 15-ны 12.19 цагт 3.5 магнитудын хүчтэй газар хөдлөлт болжээ. Энэ тухай мэдээллийг ШУА-ийн Одон орон, геофизикийн хүрээлэнгээс мөн өдрийн 12:25 цагт цахим шуудангаар ирүүлсэн байна.

Хөвсгөл аймгийн Онцгой байдлын газраар дамжуулан Ханх сумын Засаг даргын орлогчоос болон иргэдээс тодруулахад газар хөдлөлтийн чичирхийлэл иргэдэд мэдрэгдээгүй бөгөөд учирсан хохиролгүй гэсэн хариу өгсөн хэмээн ОБЕГ-аас мэдээлэв.

Ковер: Хангарди спорт клубын тамирчин Бямбацогтын Энхжин

Байт харваан спортын 15 дахь удаагийн Заалны Улсын Аварга шалгаруулах тэмцээн Гуравдугаар сарын 23-аас 26-ны хооронд Эрдэнэт хотод зохион байгуулагдах гэж байна.

Байт харвааны Заалны Улсын аварга шалгаруулах тэмцээн энэ жил Рекувр болон Компаунд төрлүүдээр U14, U18, U21, насанд хүрэгчид гэсэн ангилалд болно.

Тамирчид “Рекувр” төрөлд ангилал тус бүрт эрэгтэй, эмэгтэй хувийн харваа, багийн харваа, холимог багийн харваагаар өрсөлдөх бол “Компаунд” төрөлд эрэгтэй, эмэгтэй хувийн харваа, эрэгтэй багийн харваа төрлөөр 19 багц медалийн төлөө цэц мэргэнээ сорих юм.

Өнөөдрийн байдлаар орон нутаг болон нийслэлд үйл ажиллагаагаа явуулдаг 24 байгууллагын 330 гаруй тамирчин бүртгүүлжээ.

Энэ жилийн хувьд өмнөх жилүүдээс харьцангуй олон тамирчин оролцох урьдчилсан статистик гарч байгаа тул Монголын байт харвааны холбооны зүгээс тэмцээний үеэр тамирчиддаа чиглэсэн сургалтыг явуулахаар төлөвлөсөн байна.

Тус тэмцээнийг Орхон аймгийн Засаг даргын Тамгын газар, ИТХ, Монголын Байт Харвааны холбоо, Эрдэнэт үйлдвэр ТӨҮГ-ын Хангарди спорт цогцолбор, Орхон аймгийн Биеийн тамир спортын газар хамтран зохион байгуулах юм.

Тэмцээний техникийн зөвлөгөөн энэ сарын 22-ны өдөр 17:00 цагт Орхон аймагт болно.

Мөн МБХХ-ны удирдах зөвлөлийн хурал зохион байгуулах юм байна.

Дашрамд, 2022 оны ЗУАШТ-д байгууллагын дүнгээр Хангарди клуб алтан медаль, Алдар спорт хороо мөнгөн медаль, Орхон аймгийн баг тамирчид хүрэл медаль хүртэж байв. Мөн хувийн шигшээ харвааны төрөлд Алдар спорт хорооны тамирчин, “Токио-2020” олимпын наадмын оролцогч, ОУХМ Б.Отгонболд, Хангарди клубын тамирчин, ОУХМ А.Энхтуяа нар алтан медаль тус тус хүртэж байжээ.

Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх БНТУ-д эрэн хайх, аврах, эмнэлэг, хүмүүнлэгийн тусламжийн үүрэг гүйцэтгэсэн бие бүрэлдэхүүнд төрийн медаль гардуулав.

Төр, засгийн өгсөн үүрэг, даалгаврыг нэр төртэй, мэргэжлийн өндөр түвшинд биелүүлсэн 35 алба хаагчийг “Шударга журам”, “Цэргийн хүндэт” болон “Энхийн төлөө” медалиар шагналаа.

Цаг агаарын хүнд нөхцөл, газар хөдлөлтийн байнгын аюул, эрсдэлийн дор өндөр зохион байгуулалттай, чадварлаг ажиллаж, олон хүний амь нас, эрүүл мэндийг хамгаалсан бие бүрэлдэхүүнд Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх талархал илэрхийлэв.

Онцгой хариуцлагатай, нэр хүндтэй албанд хүчин зүтгэж байгаа алба хаагчид болон тэдний гэр бүл, үр хүүхдүүд, хөдөлмөрийн хамт олонд эрүүл энх, аз жаргал, сайн сайхан бүхнийг хүсэн ерөөв.

Энэ ажиллагаа нь Монгол Улсын хувьд анхны далайцтай, шуурхай, мэргэжлийн түвшний олон улсын эрэн хайх, аврах, эмнэлэг, хүмүүнлэгийн цогц ажиллагаа болон түүхэнд үлдэж байна.

Монгол Улсын баг БНТУ-д үүрэг гүйцэтгэхдээ найман хүн /үүнээс гурван хүүхэд/-ийг нуранги дороос гарган эмнэлгийн анхны тусламж үзүүлж, 19 хүн /үүнээс зургаан хүүхэд/-ий цогцсыг гаргасан юм.

Цэргийн 11 алба хаагчийн бүрэлдэхүүнтэй эмнэлгийн баг 72 хүүхэд, 359 эрэгтэй, 218 эмэгтэй, нийт 649 хүнд эмнэлгийн тусламж, үйлчилгээ үзүүлжээ.

Мөн Монголын ард түмний илгээсэн хүмүүнлэгийн тусламжийн бараа, материалыг холбогдох байгууллагуудад хүлээлгэн өгсөн юм.

ЭМД-ын сангаас өвдөлт намдаах, халуун бууруулах, үрэвслийн эсрэг нийт 20 нэр төрлийн эм, бэлдмэлийг 30-70 хувийн хөнгөлөлттэй үнээр олгож байна.

ЭМДҮЗ-ийн 11 дүгээр тогтоол болон ЭМДЕГ-ын даргын тушаалаар ерөнхий нэршлийн 159, худалдааны нэршлийн 621 эмийг 160 гаруй оношийн хүрээнд 30-100 хувийн хөнгөлөлттэй олгож байгаа билээ.

Та хөнгөлөлттэй эмийн дэлгэрэнгүй жагсаалттай ЭНД дарж танилцана уу.

ОБЕГ-ын харьяа Үндэсний Аврах бригадаас “Хүйтний улиралд усны гүнд шумбалтын дадлага” сургалт бэлтгэлийг Сонгинохайрхан дүүргийн 20 дугаар хорооны “Хилэм ОСТ” ХХК-ийн загас үржүүлгийн хиймэл нуурт зохион байгууллаа.

Дадлага сургалтад Эрэн хайх, аврах салбарын 34 алба хаагч хамрагдсан байна. Алба хаагчид 9-10 метрийн гүнд өдрийн болон шөнийн 42 удаагийн шумбалтийг хийж гүйцэтгэлээ гэж ОБЕГ-ын харьяа Үндэсний аврах бригадаас мэдээллээ.

Жуулчны баазад амарч байсан иргэдийн эд зүйлсийг хулгайлдаг бүлэг этгээдийг цагдаагийн байгууллагаас илрүүлж баривчилсан байна.

Өнгөрсөн оны зургаадугаар сараас есдүгээр сарын хооронд Хөвсгөл, Булган, Архангай, Төв аймгуудад амарч байсан иргэдийн 112 сая төгрөгийн үнэ бүхий үнэт эдлэл, гар утас, мэргэжлийн гэрэл зургийн аппарат, камер зэрэг эд зүйлсийг есөн удаагийн үйлдлээр хулгайлжээ. Тус хэргийг 33-35 насны өмнө нь хулгайлах гэмт хэрэгт ял шийтгэгдэж байсан этгээдүүд бүлэглэн үйлджээ. Хяналт шалгалтын ажиллагаа үргэлжилж байгаа бөгөөд иргэдийг аялал зугаалга, амралт сувиллын газраар үйлчлүүлэхдээ анхаарал болгоомжтой байж, хувийн эд зүйлсээ хулгайд алдахаас сэргийлэхийг цагдаагийн байгууллагаас санууллаа.