Нийслэлийн хэмжээнд өнгөрсөн долоо хоногт гал түймрийн 39, аврах ажиллагааны 1 буюу нийт 40 дуудлага бүртгэгдлээ.
Алба хаагчид дуудлагын дагуу ажиллаж, утаажилтын бүсээс 12 иргэнийг гарган, 1.4 тэрбум төгрөгийн өмч хөрөнгийг авран хамгааллаа.
Гал түймрийн 39 дуудлагын шалтгаан нөхцөл нь ил галаас 17, цахилгаан ашиглалтын буруугаас 6, цахилгаан угсралтын буруугаас 3, яндангийн цонолтоос 13 удаа гал түймэр гарсан байна гэж нийслэлийн Онцгой байдлын газраас мэдээллээ.
УИХ дахь МАН-ын бүлгийн ээлжит хурал өнөөдөр /2023.03.27/ хуралдаж, Сонгуулийн тухай хуулийн нэмэлт, өөрчлөлтийн төслийн ажлын хэсгийн мэдээлэлтэй танилцаж, гишүүд саналаа хэллээ.
Хуралдааны шийдвэрийн талаар УИХ дахь МАН-ын бүлгийн дарга Д.Тогтохсүрэн, УИХ-ын гишүүн, УИХ дахь МАН-ын бүлгийн дэд дарга М.Оюунчимэг, Ж.Батжаргал, УИХ дахь МАН-ын бүлгийн ажлын албаны дарга С.Далхаасүрэн нар мэдээлэл өглөө.
Бүлгийн дарга Д.Тогтохсүрэн “Бүлгийн хуралдаанаар УИХ-ын сонгуулийн тухай хуулийн нэмэлт, өөрчлөлтийн төслийн үзэл баримтлалын талаар хэлэлцлээ. УИХ-ын даргын захирамжаар тус хуульд нэмэлт, өөрчлөлт оруулах ажлын хэсэг байгуулагдан ажиллаж байна. Монгол Ардын нам, Ардчилсан нам, Хөдөлмөрийн Үндэсний нам буюу парламентад суудалтай гурван намын төлөөлөл ажлын хэсэгт багтаж ажиллаад, Сонгуулийн тухай хуулийн нэмэлт, өөрчлөлтийн төслийг боловсруулсан.
Монгол Улсын Үндсэн хуулийн 21.4 дэх хэсэгт зааснаар сонгууль явуулахаас нэг жилийн дотор Сонгуулийн тухай хуульд нэмэлт өөрчлөлт оруулахгүй гэж заасан байдаг. Үүний дагуу 2023 оны зургаадугаар сарын 20-ны өдрөөс өмнө Сонгуулийн тухай хуулийг хэлэлцэж батлах учиртай. Иймд тус хуулийн төслийг боловсруулж, өнөөдрийн бүлгийн хуралдаанаар хэлэлцлээ. Сонгуулийн тухай хуулийг өөрчлөхдөө дараах үндсэн таван саналыг дэвшүүлж байгаа.
Үүнд, нэгдүгээрт, УИХ-ын сонгуулийг холимог тогтолцоогоор явуулах нь зүйтэй гэдэгт УИХ-д суудалтай намын бүлгүүд санал нэгдэж байна. Өөрөөр хэлбэл, УИХ-ын гишүүдийн 50 хувийг мажоритар системээр сонгож, үлдсэн 50 хувийг пропорцианаль буюу намын жагсаалтаар сонгуульд нэр дэвшихийг холимог систем гэж нэрлэж байгаа. Холимог системийн дагуу сонгуулийг зохион байгуулах нь зүйтэй гэж үзлээ.
Хоёрдугаарт, УИХ-ын сонгуулийн зардлыг бууруулж, хямд зардлаар сонгууль зохион байгуулах ёстой гэж үзсэн. Ингэхдээ зурагт самбар, ухуулагч шадар туслахуудын тоог цөөлөх зэргээр сонгуулийн зардлыг бууруулах ёстой гэж үзэж байна.
Гуравдугаарт, УИХ-ын сонгуулиар гадаадад амьдарч буй Монгол Улсын иргэдийн саналыг авах талаар хуулийн төсөлд тусгаж байгаа.
Дөрөвдүгээрт, Пропоцианаль системээр сонгуулийг зохион байгуулахад улс төрийн намуудын босго тогтоодог. Улс төрийн намуудын санал авах босгыг 2012 онд таван хувь байсныг бууруулж, гурван хувь болгох нь зүйтэй гэж үзэж байна.
Тавдугаарт, Одоо мөрдөж буй Сонгуулийн тухай хуульд нэр дэвшигчдийн хүйсийн эзлэх 20 хувийг 30-аас доошгүй болгож нэмэгдүүлэх заалтыг оруулахаар тусгасан. Эдгээр таван томоохон агуулгыг Сонгуулийн тухай хуулийн өөрчлөлтөд нэмж тусгахаар хэлэлцлээ.
Бүлгийн уралдаанд Монгол Ардын намын дарга Л.Оюун-Эрдэнэ, Ерөнхий нарийн бичгийн дарга Д.Амарбаясгалан нар оролцож тодорхой мэдээлэл өгсөн. Сонгуулийн тухай хуулийг Засгийн газраас энэ долоо хоногт багтааж саналаа ирүүлбэл, ирэх долоо хоногт УИХ-д өргөн барина” гэв.
Интернэтийн орос хэлээр ярьж буй хэсэг Киев хэдэн арван мянган дрон ашиглан Украиндбайлдаж байгаа Оросын цэргүүд рүү ойрын үед халдах гэж байгаа талаар идэвхтэй хэлэлцэж эхэллээ гэж Америкийн “Forbes” сэтгүүл тэмдэглэв. Учир нь саяхан болтол Украины ерөнхийлөгчийн Тамгын газрын бие даасан зөвлөхөөр ажиллаж байсан Алексей Арестович дроны халдлагын талаар ярьсан бол өнгөрсөн хоёрдугаар сард Украины Жанжин штаб “Дэлхийд анхны нисэгчгүй нисэх онгоцны цохилтын компани” байгуулснаа зарлаж байсан юм.
“Оросын инженер” телеграм суваг Украин видео камер бүхий харьцангуй хямд “FPV” гэх дронуудын зах зээл дээр байсан бүх эд ангиудыг Хятадаас худалдаж авсан (бүрэн бус тооцоогоор 50,000-100,000 ширхэг) аж. Эдгээр дронууд нь ердийн квадрокоптероос жижиг хэмжээтэй бөгөөд уг дроныг 200 км/цаг хүртэл хурдлах боломжтой хүчирхэг хөдөлгүүрээр тоноглосон гэнэ. Энэ дронд гранат хавсарган радио удирдлагатай камиказе робот дрон болгон ашиглах бөгөөд энэ нь видео холбоосоор удирддаг оператороос харьцангуй хол зайд байгаа байг нэлээд нарийвчлалтай онох чадвартай юм байна.
Энэ тактикийг өнгөрсөн оны долдугаар сарын сүүлчээр Украины Зэвсэгт хүчин анх амжилттай ашиглаж байсныг “Forbes” дурссан бөгөөд “FPV” загварын дрон Оросын цэргийн эзэлсэн барилгын хаалгаар орж, дотор нь дэлбэрч байжээ. Энэ явдлаас хойш ийм халдлага газар аваад байгаа юм. Интернэт сүлжээнээс Оросын танкны онгорхой хавхаг руу орж, нуувчинд байгаа орос цэрэгт дрон хэрхэн цохилт өгч байгаа олон видео бичлэгийг түвэггүй олж болно. Форбс сэтгүүлийн мэдээлснээр ийм дронуудын дор хаяж тал хувь нь амжилттай, өөрөөр хэлбэл зорилгодоо хүрч чадаж байгаа бөгөөд алсын удирдлагатай бусад зэвсэг, сумтай харьцуулахад хямд бөгөөд хялбар байдаг гэнэ. Уг нийтлэлд ийм камиказе дроныг бүтээхэд хэдхэн зуун доллар хэрэгтэй байдаг бөгөөд энэ нь ердийн өндөр чанартай квадрокоптероос хамаагүй хямд байдаг аж. Гэтэл Москва Ираны “Шахедс” дроныг тус бүрийн үнэнд 20-50 мянган доллар төлдөг юм байна. Иймээс “Оросын инженер” телеграм суваг Украины 50,000 дроноор хийх дайралт нь урьд өмнө хэзээ ч байгаагүй их хэмжээний хохирлыг Оросын армид үзүүлж магадгүй гэж тэмдэглэжээ. Эдгээр уралдааны зориулалттай жижиг дронууд радиогийн хөндлөнгийн нөлөөнд маш тэсвэртэй байдаг тул тэдгээрийг Оросын радио саатуулагчаар зогсоох боломжгүй юм байна. Иймээс нисдэг камиказе дронуудын давалгаа “бүх байг устгах хүртэл” Оросын байрлалд цохилт өгсөөр байх болно гэж “Forbes” онцолжээ.
Аймаг, сум дүүргийн ИТХ-ын нөхөн сонгуулийг энэ оны зургадугаар сарын 18-ны өдөр 07:00-20:00 цагт зохион байгуулна.
Аймаг, нийслэл, сум, дүүргийн Иргэдийн төлөөлөгчдийн хурлын нөхөн болон дахин сонгууль 17 аймгийн 33 сум, нийслэлийн хоёр дүүрэгт явагдана. Улсын хэмжээнд нийт 46 мандаттай сонгуульд нэр дэвшүүлэх ажиллагаа 2023 оны тавдугаар сарын 4-10-ны өдрүүдэд явагдаж тухайн шатны сонгуулийн хороо шийдвэрээ гаргах юм. Нөхөн сонгуулийн сурталчилгаа 2023 оны зургадугаар сарын 03-наас эхэлнэ.
Нэр бүхий аялагч хар тамхины хэрэгт холбогдсон гэх мэдээлэл нийгмийн сүлжээнд гарсан байна.
Энэ талаар ЦЕГ-аас “Гуравдугаар сарын 24-ний өдөр цагдаагийн байгууллагад “Чингэлтэй дүүргийн нисдэг машины урд байрлах байранд иргэн “З” нь хар тамхи хэрэглээд байна” гэх дуудлага, мэдээлэл бүртгэгдсэн.
Чингэлтэй дүүргийн тавдугаар хороонд оршин суух хаягтай иргэн “З” нь сэтгэцэд нөлөөт бодис болох өвс /мариухан/-ийг хууль бусаар олж авсан, хадгалсан байсныг шалгалтын ажиллагаагаар илрүүллээ.
Мөн тухайн иргэний биологийн дээжид тавьсан сорилоор дээрх мансууруулах төрлийн бодисыг хэрэглэсэн нь урьдчилсан байдлаар тогтоогдсон.
Нарийвчилсан шинжилгээ хийлгэхээр шинжээч томилуулан холбогдох мөрдөн шалгах ажиллагааг явуулж байна” хэмээн мэдээлжээ.
БОАЖЯ, Орчны бохирдлыг бууруулах үндэсний хороо, МҮХАҮТ хамтран хөрсний бохирдлоос сэргийлэх “Жорлон” үндэсний чуулганыг энэ сарын 31-нд зохион байгуулна.
Чуулганаар Засгийн газрын 2020-2024 оны үйл ажиллагааны хөтөлбөрийн зорилтыг хэрэгжүүлэх, 2023-2025 оныг “Монголд зочлох жил” болгон зарласантай холбогдуулан хэлэлцүүлэг өрнүүлнэ.
Тухайлбал, гэр хороолол, аялал жуулчлалын бүс, автозамын дагуух үйлчилгээний цогцолбор, нийтийн ариун цэврийн байгууламжийн тоог нэмэх, хөрсний бохирдлыг багасгах, урьдчилан сэргийлэх, байгальд ээлтэй, стандартын шаардлага хангасан ариун цэврийн байгууламжийн технологийн оновчтой шийдлийг түгээн дэлгэрүүлэх, цаашид хэрэгжүүлэх бодлого, үйл ажиллагааг тодорхойлох юм.
Эргэж ирэхгүй намар” уран сайхны киноны уран бүтээлчид ганзага дүүрэн эх орондоо ирлээ. Киноны хамт олон Швейцар улсын “Festival International du Film de Fribourg” буюу “Фрибургийн Олон Улсын кино наадам”-д оролцсон.
Тус наадамд “Эргэж ирэхгүй намар” кинонд Түнтүүлэй хүүгийн дүрийг бүтээсэн жүжигчин Г.Тэнүүн-Эрдэнэ “Special mention-Best Actor” буюу “Шилдэг эрэгтэй жүжигчин” төрөлд ялалт байгуулж шагнал хүртсэн байна.
“Эргэж ирэхгүй намар” кино дэлхийн хамгийн том “Оскар” кино наадмын урьдчилсан шатанд оролцохоор шалгарсан билээ.
Мөн тус кино Италийн Милан хотын FESCAAAL олон улсын кино фестивалиас “Audience awards” буюу “Үзэгчидийн нэрэмжит шагнал”, MiWorld Young Film Festival-с “BIG ZEBRA” шилдэг киноны шагналыг тус тус хүртжээ.
Эх сурвалж: Монголын үндэсний кино урлагийн зөвлөл
Нийтийн эзэмшлийн зам, талбай, зогсоолд удаан хугацаагаар орхисон машиныг ачиж журамлахаар болжээ.
Тодруулбал, Одоогийн байдлаар 30 гаруй машиныг олж тогтоогоод байна. Замын хөдөлгөөний аюулгүй байдлын тухай хууль, Авто замын тухай хууль, Зөрчлийн тухай хуулийн хүрээнд эдгээр машиныг олж тогтоогоод, эздэд нь мэдэгдэл хүргүүлэх арга хэмжээ авна. Мэдэгдэл хүргүүлснээс хойш долоо хоногийн хугацаанд машинаа аваагүй бол ачиж журамлах юм.
Нийтийн эзэмшлийн зам, талбай, зогсоолд удаан хугацаагаар орхисон автомашинуудыг ачиж журамлах талаар Нийслэлийн Засаг даргын Захиргаа, хууль эрх зүйн асуудал хариуцсан ахлах зөвлөх Д.Мөнх-Эрдэнэ “Удаан хугацаагаар машинаа үлдээснээр дугуй нь хагарах, эд анги нь хулгайд өртөх, өнгө үзэмж нь муудах зэргээр өмчид хохирол учрах, хулгайн гэмт хэрэг гарах шалтгаан болж байна. Нөгөө талаас оношилгоонд ороогүй, авто зам ашигласны төлбөр төлөөгүй зэрэг зөрчлүүд илэрдэг. Эдгээр зөрчлийг арилгах, гэмт хэргээс урьдчилан сэргийлэх, мөн нийтийн эзэмшлийн зам, талбай, зогсоол чөлөөлөхөөр ийм арга хэмжээг авах шаардлага гарсан” гэв.
ОХУ-ын Ерөнхийлөгч В.Путин Бүх Оросын төрийн телевиз, радио нэвтрүүлгийн компани (ВГТРК)-ийн ярилцлагад энэ сарын 25-нд орох үеэр нэгэн мэдэгдэл хийлээ. Тэрээр “Орос улс Беларусийн 10 цэргийн нисэх онгоцыг тактикийн цөмийн зэвсэг тээвэрлэх чадвартай болгох, Беларусийн нутаг дэвсгэрт тактикийн цөмийн зэвсгээ байрлуулах, тактикийн цөмийн зэвсгийг хадгалах, агуулах барих ажлыг ирэх дөрөвдүгээр сарын 3-нд эхэлж, долоодугаар сарын 1 гэхэд дуусгах бодолтой байна” хэмээлээ.
Мөн барууны орнуудаас Украинд нийлүүлэхээр зэхэж буй орчин үеийн танк, хуягт тээврийн хэрэгслийн эсрэг өндөр үр дүнтэй шавхагдсан урантай танкийн сумны асуудлаар байр сууриа илэрхийлж, “барууны орнууд Украин руу 400 танк илгээх бол ОХУ 1600 танк үйлдвэрлэх, тэдгээрээс гурав дахин илүү сум галт хэрэгсэл, арав дахин илүү онгоц фронтод нийлүүлэх чадвартай” хэмээн мэдэгджээ.
Эх сурвалж: iss.gov.mn
Прокурорын байгууллага өнгөрсөн долоо хоногт буюу 2023 оны 3 дугаар сарын 20-ноос 24-ний өдрүүдэд хэрэг бүртгэлтийн 30.971, мөрдөн байцаалтын 3017 хэрэгт хяналт тавьж ажиллав.
Үүнээс Эрүүл мэндийн халдашгүй байдлын эсрэг 91, Өмчлөх эрхийн эсрэг 80, Хүрээлэн байгаа орчны эсрэг 11, Хөдөлгөөний аюулгүй байдал, тээврийн хэрэгслийн ашиглалтын журмын эсрэг 10, Бэлгийн эрх чөлөө халдашгүй байдлын эсрэг 7, Авлига, албан тушаалын эсрэг 4, Нотлох баримтыг хуурамчаар үйлдэх, устгах, Галт зэвсэг, галт хэрэгсэл, тэсэрч дэлбэрэх бодис хууль бусаар эзэмших, Гадаадын тагнуулын алба, байгууллага, иргэнтэй хууль бусаар хамтран ажиллах тус тус 1, нийт 209 хэрэгт яллах дүгнэлт үйлдэн шүүхэд шилжүүлж шийдвэрлэлээ.
Яллах дүгнэлт үйлдэн шүүхэд шилжүүлсэн хэргээс дурдвал:
-Нийслэлийн прокурорын газраас Гашуунсухайт дахь боомтын Хилийн шалган нэвтрүүлэх албаны орлогч даргаар ажиллаж байсан Т, Гашуунсухайт дахь Гаалийн газрын гаалийн улсын байцаагчаар ажиллаж байсан Д.Б, У, Э.Б нар нь эрх мэдэл, албан тушаалын байдлаа урвуулан ашиглаж, нэр бүхий 18 иргэн, аж ахуйн нэгж байгууллагын нүүрс тээвэрлэж явсан тээврийн хэрэгслүүдийн гаргасан зөрчилд арга хэмжээ аваагүй, шалгаж шийдвэрлэх албаны чиг үүргээ хэрэгжүүлээгүй, мөн тээврийн хэрэгслийн мэдээллийг нөхөж бүртгэсэн, дарааллын журам зөрчиж тээвэр хийх зөвшөөрөл олгосон, хилийн бүсэд зогсоож бусдад давуу байдал олгосон, хахууль авсан гэх үйлдэлтэй, нийт 22 хүнд холбогдох эрүүгийн хэрэгт Эрүүгийн хуулийн 22.4 дүгээр зүйлийн 4, 22.5 дугаар зүйлийн 1-т зааснаар яллах дүгнэлт үйлдэн, Өмнөговь аймгийн Ханбогд сум дахь Сум дундын эрүүгийн хэргийн анхан шатны шүүхэд;
-Зам, тээврийн хөгжлийн яамны Авто замын бодлогын хэрэгжилтийг зохицуулах газрын замын ашиглалт, засварын хэлтсийн дарга О нь Улаанбаатар-Дархан чиглэлийн 204.11 км авто замын өргөтгөл, шинэчлэлтийн ажлын гүйцэтгэгчийг сонгон шалгаруулах үнэлгээний хорооны даргаар томилогдон ажиллахдаа эрх мэдэл, албан тушаалын байдлаа урвуулан ашиглаж, бусдад давуу байдал бий болгон, хахууль авсан гэх хэрэгт Эрүүгийн хуулийн 22.4 дүгээр зүйлийн 2, 22.4 дүгээр зүйлийн 4, 22.5 дугаар зүйлийн 1-т зааснаар яллах дүгнэлт үйлдэн, Сүхбаатар дүүргийн эрүүгийн хэргийн анхан шатны шүүхэд;
-Говьсүмбэр аймгийн прокурорын газраас тус аймгийн Баянтал сумын Засаг дарга А нь эрх мэдэл, албан тушаалын байдлаа урвуулан ашиглаж, 30 сая төгрөгийн төсөвт өртөгтэй инженерийн хийцтэй худгийн байршлыг сольж, тогтсон цэгээс 24 км-ийн зайд, өөрийн малыг малалдаг малчингийн өвөлжөөнд өрөмдлөг хийлгэж, өөрт давуу байдал бий болгосон гэх хэрэгт Эрүүгийн хуулийн 22.1 дүгээр зүйлийн 1-т зааснаар яллах дүгнэлт үйлдэн, тус аймаг дахь Сум дундын эрүүгийн хэргийн анхан шатны шүүхэд;
-Хэнтий аймгийн прокурорын газраас иргэн А, Х нар нь Оросын Холбооны Улсад уул уурхайн зориулалттай үйлдвэрлэгдсэн эмульсийн тэсрэх бодисыг худалдан борлуулах зорилготойгоор хадгалсан, тээвэрлэсэн гэх хэрэгт Эрүүгийн хуулийн 20.4 дүгээр зүйлийн 1-т зааснаар яллах дүгнэлт үйлдэн, тус аймаг дахь Сум дундын эрүүгийн хэргийн анхан шатны шүүхэд тус тус шилжүүлсэн байна.