Month: February 2023

Монгол Улсын яаралтай хамгаалах шаардлагатай соёлын биет бус өвийн үндэсний бүртгэлд багтсан “Монгол Жангар хайлах” өвийг сэргээх, хадгалан, хамгаалах, өвлүүлэн үлдээх зорилгоор уран зохиолын оргил гэгдэх “Баатарлаг Жангар” туулийг 1000 туульч хайлах арга хэмжээг энэ сарын 12-нд Говь-Алтай аймагт зохион байгуулах гэж байна.

Тус арга хэмжээний хүрээнд 1000 туульч эл туулийн 17 бүлгийг хайлахаар бэлтгэж буй бөгөөд Алтай ятга, морин хуур, товшуур зэрэг үндэсний хөгжмөөс бүрдсэн 300 гаруй хөгжмийн чуулбар чуулах аж.

Идэрчүүдийн улсын аварга шалгаруулах волейболын тэмцээн Улаанбаатар хотод зохион байгуулагдаж аваргуудаа тодрууллаа.

Тэмцээний эмэгтэйчүүдийн төрөлд алтан медалийн төлөө Хилчин клуб болон Бaянхонгор аймгийн багууд өрсөлдөж “Хилчин” аваргалсан юм. Харин “Залуу Монгол” клуб Дундговь аймгийн багийг хожсоноор хүрэл медалийн эзэд болов.

Эрэгтэйчүүдийн төрөлд “Залуу Монгол-50” клуб алтан медаль хүртэж “Завхан БТСГ” дэд байрт шалгарсан бол хүрэл медалийг “Хэнтийн БТСГ” баг хүртлээ.

Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнийн 2022 оны 12 дугаар сарын 15-ны өдрийн А/17 дугаар тоот тушаалаар баталсан Биеийн тамир, спортын тухай хуулийг шинэчлэх ажлын хэсгийн хоёр дахь хурал өнгөрөгч 3-ны өдөр Биеийн тамир, спортын улсын хорооны хурлын танхимд болов. Тус хурлаар дараах хоёр асуудал хэлэлцлээ. 2022 оны 12 дугаар сарын 16-ны өдрийн ажлын хэсгийн анхны хурлаас хойш Олимп, нийтийн биеийн тамир, спортын Үндэсний хорооны ажлын албанаас зохион байгуулсан ажил, хуулийн төсөлд салбар нэгжүүдээс өгөх санал, иргэд, тамирчин, дасгалжуулагч, арга зүйч нарын бодлыг сонссон тухай танилцуулга хийлээ. Тухайлбал, 2022 оны 1 дугаар сарын 24-ний өдөр “Спортын салбарын төр хувийн хэвшлийн түншлэл”-ийн уулзалт, хэлэлцүүлэг зохион байгуулж, салбарын хувийн хэвшлийн тулгамдсан асуудал, бэрхшээл, цаашид авах арга хэмжээ, хуулийн төсөлд тусгах санал зэргийг компани болон спорт холбоодын удирдлага болох 20 гаруй төлөөлөгчтэй хэлэлцэв. Мөн Сонгинохайрхан, Баянгол болон Баянзүрх дүүргийн Биеийн тамир, спорт хорооны ажил байдалтай газар дээр нь танилцаж биеийн тамир, спортын тухай хуулийн төсөлд тусгах, эрх зүйн орчныг сайжруулах талаар санал солилцож, ажилтнуудад тулгамдаад буй нийгмийн хамгааллын талаар ярилцжээ. Дүүргийн спорт байгууллагуудын санал, хүсэлтийг хүлээн авч, зарим асуудлыг хамтран шийдвэрлэхээр тогтож, ажил хэрэгч уулзалтууд болов.

Хоёрдугаарт, одоогоор үйлчилж буй Биеийн тамир, спортын тухай хуулийн хэрэгжилтийг шалгасан санал дүгнэлт, тодорхой заалтуудад хийсэн үр дагаврын үнэлгээ, хөндлөнгийн байгууллагын хийсэн нийтийн биеийн тамир, спортын тухай иргэдийн ойлголтын тандан судалгаа болон салбарын олон улсын харьцуулсан судалгаа зэрэгт дүн шинжилгээ хийсэн тухай ажлын хэсгийн гишүүдэд танилцуулав. Ажлын хэсэг Биеийн тамир, спортын хуулийн хэрэгжилтийн үр дагаврыг судалж, үзэл баримтлалын түвшинд шинэтгэл хийх практик шаардлага байна гэж үзсэн тул ажлын хэсэг нь дараах 4 чиглэлээр нарийвчилсан судалгаа хийхээр тогтлоо.

– Одоо үйлчилж байгаа хууль нь УИХ-аар баталсан “Алсын хараа 2050”, УИХ-ын Байнгын хорооноос боловсруулсан нийтийн биеийн тамир, спортын салбарт баримтлах бодлогод хэрхэн нийцэж байгааг судлах,

-Нийгмийн бусад чиглэл /соёл, эрүүл мэнд, аялал жуулчлал, боловсрол/-ийн хууль, эрх зүйн орчны шинэчлэлтэй харьцуулах,

-Олон улсын ижил төстэй хуулийн харьцуулсан судалгаа хийх,

-Идэвхтэй хөдөлгөөн, амьдралын хэв маяг хэвшүүлэх бодлогын суурьтай хуулийн шинэ үзэл баримтлал боловсруулах зэрэг эдгээр чиглэлээр зохион байгуулалт, үүрэг даалгаврыг ажлын хэсгийн гишүүдийн дунд хуваарилж өгчээ гэж Биеийн тамир, спортын улсын хорооноос мэдээллээ.

“Хөвсгөлийн залуу математикчид” ТББ-аас жил бүр уламжлал болгон зохион байгуулдаг “Хаврын Их Сорилго-16” Хойд Бүсийн Математикийн Олимпиад Хөвсгөл аймгийн Мөрөн хотод өнгөрсөн амралтын өдрүүдэд болж өндөрлөлөө.

Уг олимпиадыг Мөрөн хотын засаг дарга Д.Идэрмөнхийн дэмжлэгтэйгээр анх удаа бүсийн хэмжээнд зохион байгуулсан ба Хөвсгөл, Дархан-Уул, Орхон аймгийн шилдэг математикч хүүхдүүд өрсөлдсөн чансаа өндөр олимпиад болсон байна. Мөн олимпиадыг Хөвсгөл аймгийн хувийн хэвшлүүд ивээн тэтгэж сурагч, бэлтгэсэн багш нарыг нийт 12,250,000 төгрөгөөр шагнаж урамшууллаа.Сурагчдын шагналыг Д.Зоригт захиралтай “Намуун” брэнд, А.Нарантуяа захиралтай “Лидэр” фарм, М.Болорчулуун захиралтай “Болор макс” компани ивээн тэтгэсэн бол бэлтгэсэн багш нарын шагналыг Т.Туяа захиралтай “Fis Gis” LLC компани тус тус ивээн тэтгэв.

Оюуныг дэмжигч Хөвсгөл аймгийн хувийн хэвшлүүдийг танилцуулбал:

• “Fis Gis” LLC – Барилга, архитектурын зураг сэргээн засах ажлыг Европын холбооны улсуудаас хүлээн авч гүйцэтгэдэг компани.
• “Намуун” брэнд – Нярай хүүхдийн ариутгасан өлгий даавуу болон 0-1 нас хүртэлх хүүхдийн бэлэн хувцас үйлдвэрлэдэг үндэсний үйлдвэрлэл.
• “Лидэр” Фарм – Мөрөн хотод 2 салбар, Хатгал тосгонд нэг салбарт үйл ажиллагаа явуулдаг аймагтаа анхны хүргэлтийн эмийн үйлчилгээг нэвтрүүлсэн 20 жил тасралтгүй үйл ажиллагаа явуулж буй эмийн фарм.
• “Болор Макс” – Хүнсний болон ахуйн хэрэглээний барааны түгээлтийн үйл ажиллагааг явуулдаг бөгөөд Макс Эксит ХХК, Mongolian distribution, We international, Zebra international зэрэг компаниудын гэрээт борлуулагчаар ажиллаж байна.

Катар улсад болсон хөл бөмбөгийн дэлхийн аварга шалгаруулах тэмцээнтэй холбогдуулан тус улс зөвхөн хаяа карт (hayya card)-тай гадаадын иргэдийг хүлээн авч байгаа бөгөөд энэхүү шийдвэрээ 2024 оны нэгдүгээр сарын 24-ний өдөр хүртэл сунгалаа. Иймд зөвхөн дараах нөхцөлийг хангасан хаяа карт (hayya card)-тай гадаадын иргэд Катар улс руу зорчих боломжтой юм. Үүнд:

1. Байрлах газрын /зочид буудал, түрээсийн байр/ баталгаажсан захиалга,
2. Хамгийн багадаа 3 сараас дээш хугацаанд хүчинтэй хугацаатай гадаад паспорт,
3. Эрүүл мэндийн даатгал,
4. Буцах нислэгийн баталгаажсан тийз зэрэг болно.