Шударга Өрсөлдөөн, Хэрэглэгчийн Төлөө Газар(ШӨХТГ)-аас цагаан сарын баярыг угтан нийслэлийн Чингэлтэй дүүрэгт байрлах “Хүчит шонхор” захын хонины ууцны худалдаа эрхлэгчдийн үйл ажиллагаанд хяналт шалгалт хийж, зарим худалдаа эрхлэгчдэд мөнгөн торгуулийн арга хэмжээ авлаа.

Хонины ууцны худалдаа эрхлэгчид хэрэглэгчдийн эрэлтийг далимдуулан ууцны хэмжээ, хэмжих нэгж болон түүнд хамаарах үнийн талаар хэрэглэгчид худал мэдээлэл буюу бодит байдлаас зөрүүтэй мэдээлэл түгээх замаар үнийг хөөрөгдөн худалдаалж байжээ.

Иймд Хэрэглэгчийн эрхийг хамгаалах тухай хуулийн

• 7 дугаар зүйлийн 7.2-т “… барааныхаа талаар хэрэглэгчид дор дурдсан мэдээлэл өгнө” гэж,
• 7.2.4-т “барааны нэр төрөл, үнэ” гэж,
• 7.2.5-т “барааны хэмжээ, хэмжих нэгж” гэж,

Зөрчлийн тухай хуулийн 10.2 дугаар зүйлийн 2-т “Үйлдвэрлэгч, худалдагч, гүйцэтгэгчийн үүргээ хэрэгжүүлээгүй бол хүнийг таван зуун нэгжтэй тэнцэх хэмжээний төгрөгөөр, хуулийн этгээдийг таван мянган нэгжтэй тэнцэх хэмжээний төгрөгөөр торгоно” гэж заасны дагуу таван зуун нэгжтэй тэнцэх хэмжээний шийтгэлийг ногдууллаа.

Бодит байдалд 37 кг жинтэй хонины ууцыг 46 кг жинтэй гэж худал мэдээлэх, мөн баталгаат жин хэмжүүр байхгүй гэсэн үндэслэлээр тодорхой хэмжээ, хэмжих нэгж болон түүнд хамаарах үнийн талаарх тодорхой мэдээлэл өгөхгүйгээр худалдаалж байсан юм.

Иймд хэрэглэгчдэд хандан өөрийн хэрэгцээнд зориулан аливаа худалдан авалт хийхдээ тухайн бүтээгдэхүүний хэмжээ, хэмжих нэгжийн талаар эрх бүхий байгууллагаас баталгаажуулсан хэмжих хэрэгсэлд хэмжүүлэх замаар үнэн, бодит мэдээлэл авах, нэгж бүтээгдэхүүнд хамаарах үнэ, ханшийн талаар бодит мэдээлэл авсны үндсэн дээр сонголтоо зөв хийх талаар ШӨХТГ-аас сэрэмжлүүллээ.

Хөгжлийн банкны хэргүүдийн урьдчилсан хэлэлцүүлгийн шүүх хурал болж байна.

Шүүх хуралдаанд яллагдагч “Ганхүдэр орд” ХХК-ийн хууль ёсны төлөөлөгч Д.Мандахбаяр, өмгөөлөгч Мөнгөнсүх, “Инжир” ХХК-ийн хууль ёсны төлөөлөгч Б.Батбаатар, “НВЦ” ХХК-ийн хууль ёсны төлөөлөгч Ц.Баатарбилэг, Б.Мөнхбат, “Хааны харгуй” ХХК-ийн хууль ёсны төлөөлөгч Нандинцэцэг, Г.Батдорж тэргүүтэй хүмүүс оролцож байгаа юм.

Зарим яллагдагч болон өмгөөлөгчөөс урьдчилсан хэлэлцүүлгийн шүүх хуралдааныг хойшлуулах хүсэлт гарлаа. Харин шүүх хуралдааны бүрэлдэхүүн урьдчилсан хэлэлцүүлгийг хойшлуулах саналыг хүлээж авсангүй. Өөрөөр хэлбэл, шүүх хуралдаан үргэлжлэхээр болсон гэсэн үг.

“Зөвлөлдөж шийдье” уулзалт хоёр дахь өдрөө Төрийн ордонд болж байна.

Энэ үеэр эдийн засаг, баялгийн сан, төвлөрлийг сааруулах нь сэдвээр Удирдлагын академийн Удирдахуйн ухааны сургуулийн захирал доктор, дэд профессор Б.Баясгалан илтгэл танилцууллаа.

Тэрбээр “1990 оноос хойш хийгдсэн гадаадын шууд хөрөнгө оруулалтын 70 гаруй хувь нь уул уурхайн салбарт хийгдсэн. Монгол Улсын төсвийн орлогын 25 орчим хувийг уул уурхайн салбараас бүрдүүлдэг. Уул уурхайн салбар Монгол Улсын эдийн засагт хүчтэй нөлөө үзүүлдэг. Тус салбараас энэ онд таван их наяд төгрөгийг төсөвт төвлөрүүлэхээр тусгасан.

Манай улсын хувьд хүний хөгжлийн санг байгуулж, удирдаж байсан туршлагатай. Уул уурхайн орлогоос 2.7 хувийг төсвийн тогтворжуулалтын санд, ирээдүйн өв санд 11 орчим хувийг төвлөрүүлэхээр байгаа.

Газрын хэвлийн өгөөжийг үндэсний баялгийн санд төвлөрүүлж иргэддээ тэгш хүртээх ёстой гэсэн өөрчлөлтийг Үндсэн хуульд оруулсан. Энэхүү баялгийн санд төвлөрүүлсэн мөнгийг нийгмийн хамгааллыг сайжруулах, ажлын байрыг нэмэгдүүлэхэд зарцуулах нь зөв үү гэдэг асуултад өнөөдрийн уулзалтаар хариулах ёстой. Үндэсний баялгийн сангийн мөнгөөр нийгмийн хамгааллын салбарт зарцуулбал, үйлчилгээг нь эрс сайжруулж, ядуурлыг богино хугацаанд дорвитой бууруулах боломжтой.

Улс орнууд баялгийн санг хөрөнгө оруулалтын сан хэлбэрээр ажиллуулдаг. Сангийн эх үүсвэрийг хамгийн үр ашигтай төслүүдэд зарцуулдаг. Зарим нэг төслүүдэд гадаад, дотоодын туршлага бүхий мэргэжлийн багуудыг урьж ажиллуулдаг. Удирдлагын ямар ч хэлбэрийг сонгосон хамгийн чухал зүйл хяналт байх ёстой. Эрх бүхий болон харуут бус байгууллагын, иргэдийн хяналт санг үр ашигтай үйл ажиллагаа явуулахад чухал байдаг. Сангийн удирдлагыг ил тод байлгах нь зүйтэй” гэдгийг хэллээ.

Боловсрол, Шинжлэх Ухааны Яам (БШУЯ)-наас боловсролын салбарт баримталсан бодлого, цаашдын зорилгын талаар мэдээлэл өгөх уулзалтыг өчигдөр зохион байгууллаа.

Энэ үеэр гадаадын их, дээд сургуулиудад суралцах оюутнуудын зээл, тэтгэлгийн талаар Боловсрол, Шинжлэх Ухааны сайд Л.Энх-Амгалан мэдээлэл өгөв.

Тэрбээр “Оюутнуудад тэтгэлэг олгох сан байгуулагдаад 30 жил болсон байна. Энэ хугацаанд 1 их наяд төгрөгийн санхүүжилтийг 1.3 сая хүүхдэд олгожээ.

Өнгөрсөн 30 жилийн хугацаанд гадаадад бакалавр, магистр, докторт 3,500 хүүхэд сургасан байна. Энэ тэтгэлгийг зөвхөн эрх мэдэлтнүүдийн хүүхдүүд авах, тэд эх орондоо ирээд зээлээ төлөхгүй, гэрээнийхээ үүргийг биелүүлэхгүй байх зэрэг асуудал гарч буй эсэхэд хардлага үүсэж байна. Тиймээс ч тодорхой хяналт шалгалт хийж байгаа. Энэ жил Сангийн Яамтай хамтарсан шалгалтыг зохион байгуулж, үр дүнг зарлана” хэмээн хэллээ.

“Өнгөрсөн хугацаанд гадаадад тэтгэлгээр суралцсан 3,500 оюутны 1,000 гаруй нь гэрээнийхээ үүргийг биелүүлсэн”

Мөн “Өмнө нь манай дотоод аудитуудын шалгалтын дүн гарч, тодорхой тоо ил болсон. Өнгөрсөн хугацаанд гадаадад тэтгэлгээр суралцсан 3,500 оюутны 1,000 гаруй нь гэрээнийхээ үүргийг биелүүлсэн. Тэд эх орондоо ирээд тав болон түүнээс дээш жил ажилласан гэсэн үг. Тиймээс оюутны зээлээс чөлөөлөгдсөн.

Энэ нь эхэлж авахад тэтгэлэг. Харин гэрээнийхээ үүргийг биелүүлээгүй тохиолдолд зээл гэж ойлгож болно. Тэтгэлэг авсан 2,000 гаруй хүүхдээс 200 гаруй нь одоо гадаадын их, дээд сургуульд суралцаж байгаа. Харин 1,800 хүүхдийн 80 хувь нь эх орондоо ирээд ажиллаж, НДШ-ээ төлж байгаа.

Боловсролын Зээлийн Сангаас тэтгэлэг, зээл авсан оюутнуудын бүх мэдээлэл Монголбанкны зээлийн санд бүртгэгдэх боломжтой болсон” гэлээ.

“Магистр, докторт сурч байгаа оюутнуудыг дэмжих нь улс орны хөгжлийн эрэлт хэрэгцээнд нийцэж байгаа”

Үргэлжлүүлэн “Оюутны зээл авсан хүмүүсийн мэдээлэл хэзээ ил болох вэ хэмээх асуултыг нийгмээс тавьж байгаа.

Өнгөрсөн жил УИХ-аас батлагдсан Мэдээллийн ил тод байдлын тухай хуулиар оюутны зээл авсан хүүхдүүдийн овог, нэрийг ил болох талаар тусгасан байдаг. Гэтэл Хувь хүний нууцын тухай хуулиар тухайн иргэнээс зөвшөөрөл авч, мэдээллийг нь ил тод болгохыг заасан. Өөрөөр хэлбэл, хоёр хуулийн дунд зөрчил гарсан. Тиймээс хаврын чуулганаар дээр дурдсан зөрчлийг арилгах үүднээс хуулийн төслийг өргөн барихаар бэлтгэж байна.

Тухайн зөрчлийг арилгасан тохиолдолд өнгөрсөн 30 жилийн хугацаанд оюутны зээлийн сангаас зээл авсан 1.3 сая иргэний мэдээлэл нийтэд ил болно. Тухайлбал, овог нэр, хэзээ, ямар сургуульд суралцахаар хэр хэмжээний тэтгэлэг авсан, зээлийн эргэн төлөлт зэрэг мэдээллийг зарлана” гэв.

Гадаадын их, дээд сургуульд суралцах хүсэлтэй хүүхдүүд Засгийн газар хоорондын гэрээтэй тэтгэлгээс гадна дараах тэтгэлгийг авна.