Month: February 2023

Харилцаа холбоо, Удирдлагын ухаан, менежментийн салбартаа хүлээн зөвшөөрөгдсөн, олон нийтийн сайн мэдэх Цахилгаан холбооны Болор, Ньютелийн Болор, Мобикомын Болор, Скайтелийн Болор улсад ажилласан 40 жилийнхээ хөдөлмөрийг үнэлүүлэн гавьяат холбоочин цолыг Монгол Улсын Ерөнхийлөгчөөс гардан авлаа.

Холбооны инженер, Техникийн ухааны магистр, Удирдлагын магистр Доржнамжилын Болор нь Холбооны яамны Телефон Радио Ашиглалтын Хороонд Инженер, Албаны ерөнхий инженерээр ажлын гараагаа эхлүүлжээ. Улмаар Монголын Цахилгаан Холбооны инженер, Ньютел, Мобиком, Скайтел компаний гүйцэтгэх захирлаар ажиллаж, менежментийн Сургалт Зөвлөх үйлчилгээний Эн Си Эс, ухаалаг технологийн Смарт Дийл /SmartStore/ компаниудыг үүсгэн байгуулж, удирдан ажиллаж байна.

Тэрээр Олон улсын Банкуудын хөнгөлөлттэй зээлээр хэрэгжүүлсэн, Цахилгаан Холбооны суурь сүлжээг аналоги технологиос тоон технологид шилжүүлэх “Telecom-1”; “Telecom-2”; “Telecom-3”; “MON – 4” төслүүдийг амжилттай удирдаж, Харилцаа холбоо, Мэдээллийн технологийн Худалдаа Үйлчилгээний анхны Нэг цэгийн “TEDY” төвүүдийг үүсгэн бий болгож, дэлхийд тэргүүлэгч Сингапурын “Service Excellence”, “Business Excellence” Бизнесийн Загвар төслүүдийг Монгол улсдаа амжилттай нутагшуулжээ. Бизнесийн үйл ажиллагааг зөв системчлэх үүднээс ISO 9001:2008, ISO 27000, “SKY Re-Branding” төслүүд төслүүдийг үйл ажиллагаандаа нэвтрүүлсэн нь өнөөдөр ч үр өгөөжөө өгсөөр байгаа юм.

Тэрээр олон төслүүдийг амжилттай хэрэгжүүлэхийн хажуугаар ШУТИС-ийн Удирдах Зөвлөлийн гишүүн, Боловсролын Магадлан Итгэмжлэлийн Үндэсний Комиссын гишүүн, MARS-V Төслийн ахлах Зөвлөхөөр ажиллаж, залуу хойч үеэ удирдан чиглүүлж байна.

Монгол Улсынхаа хөгжилд хувь нэмрээ оруулах үүднээс санаачлан, эхлүүлсэн “Сурагчдын Үдийн цай”, “Мэдээллийн технологийн загвар сургууль”, “Ногоон талбай”, “Цахим сургууль” төслүүд нь олон мянган хүүхдийн эрүүл мэндэд эерэг нөлөө үзүүлж, олон зуун инженерүүдийг бэлтгэж, 2500 багш, 20 гаруй мянган сурагчдыг цахим хэрэглээнд сургахад үнэтэй хувь нэмрээ оруулжээ.

Сар шинийн баяраар хилийн боомтуудын ажиллах цагийн хуваарийг танилцуулж байна.

Засгийн газрын 2022 оны 362 дугаар тогтоолын хэрэгжилтийг хангах хүрээнд “Тавантолгой” ХК уурхайгаас олборлосон нүүрсийг Иргэний хуулийн 197 дугаар зүйлийн 197.1, 197.2 дахь хэсэгт заасны дагуу худалдан авагч аж ахуй нэгжүүдэд үнэ хаялцуулах нээлттэй дуудлага худалдааг 2023 оны 2 дугаар сарын 17-ны өдөр анх удаа зохион байгуулж 100.000 тн нүүрсийг 173.3 ам.доллараар борлуулжээ.

Өмнөх жилүүдэд уурхайн ам нөхцөлөөр 1 тонн нүүрсний үнэ 100 хүртэл ам.доллароор худалдаалж байсан бол энэхүү дуудлага худалдаагаар 1 тонн нүүрсийг БНХАУ-ын Ганц мод боомтын хил нөхцөлөөр 173.3 ам.доллар хүргэж дуудлага худалдаа амжилттай болсон байна.

ХОЁР ХҮҮ МИНЬ НАМАЙГ “ТУРК ЯВЖ, ХҮН АВАРНА” ГЭХЭД ИТГЭЖ ЧАДАХГҮЙ ҮЛДСЭН БОЛ НАЙМАН САРТАЙ ОХИН МИНЬ “ААВ АА, БАЯРТАЙ” ГЭЭД ИНЭЭГЭЭД ХОЦОРСОН

Онцгой байдлын ерөнхий газрын дэргэдэх Үндэсний аврах бригад, Зэвсэгт хүчний Жанжин штабын алба хаагчид болон Цэргийн төв эмнэлгийн эмч, сувилагч нарын бүрэлдэхүүнтэй 35 аврагч Турк Улсад үүрэг гүйцэтгэхээр хөдөлсөн юм. Мөн аврах багт ОБЕГ-ын Эрэлч нохойн албаны Марта, Балу гэх дуудлагын нохой багтаж байгаа билээ. Турк Улсад ажиллах эрэн хайх, аврах багийг ОБЕГ-ын дэд дарга, бригадын генерал Б.Ууганбаяр ахалж ажиллах аж. Бид Турк Улсад аврах ажиллагаанд оролцох Үндэсний аврах бригадын Эрэн хайх, аврах ажиллагааны мэргэжилтэн ахлах дэслэгч З.Гүррагчааг Турк Улс руу аврах ажиллагаанд явахаас нь өмнө холбогдож, ярилцсан юм.

-Та хэдэн жил Үндэсний аврах бригадад ажиллаж байна вэ. Өмнө нь гадаад улсад аврах ажиллагаанд оролцож байсан уу?

-Би Үндэсний аврах бригадыг 2005 онд байгуулагдсан цагаас нь хойш тасралтгүй 18 жил ажиллаж байна. Өмнө нь гадаад улсад аврах ажиллагаанд оролцож байгаагүй. Дандаа улсын хэмжээний дуудлагуудад үүрэг гүйцэтгэж байлаа. Би анх удаа гадаад улсад аврах ажиллагааны чиглэлээр үүрэг гүйцэтгэхээр бэлтгэл байдлаа хангаад, албаныхантайгаа онгоцны буудал руу явж байна.

-Танд гэрийнхэн нь юу захиж хэлэв. Мөн Шадар сайд С.Амарсайхан аврах багийнхантай уулзахдаа юуг чухалчилсан бэ?

-Би гурван хүүхэдтэй. Хоёр том нь хүү. Тэд Туркт болсон газар хөдлөлтийн талаар мэдэж байгаа. Тэгээд намайг “Турк явж, хүмүүс аварна” гэхээр үнэн юм уу гээд л гайхаад, итгэж чадахгүй хоцорсон. Найман сартай охин минь юугаа ч мэдэхгүй “Аав аа, баяртай” гээд л инээгээд хоцорсон доо. Харин хань минь надад “Анхаарал, болгоомжтой яваарай, биеэ бодоорой” гэж захисан. Би ямар нөхцөл байдалтай газар руу явж байгаа билээ дээ. Гэрийнхний минь санаа, сэтгэл ямар байх нь ойлгомжтой шүү дээ. Мөн Шадар сайд С.Амарсайхан бидэнд болгоомжтой ажиллаж, үүрэг, даалгаврыг амжилттай биелүүлж, сахилга, хариулцлагатай, албаныхаа нэр хүндийг өргөж ажиллахыг захисан.

-Харин та сэтгэл зүйгээ хэрхэн бэлдсэн бэ. Үүргээ сайн гүйцэтгэж, албаныхаа, улсынхаа нэрийг өргөж явах юм сан гэж бодож байгаа байх?

-Би маш хариуцлагатай байх үүрэг, даалгавар авсан учир албаныхаа, эх орныхоо нэрийг дааж, үүргээ амжилттай гүйцэтгэнэ гэдэгтээ итгэлтэй явна. Айж, сандрахаасаа илүү үүрэг, хариуцлагаа алдахгүй ажиллахыг хичээх болно.

АВРАГЧИД БИЕЭ ДААЖ, ХЭЭРИЙН НӨХЦӨЛД АЖИЛЛАНА

-Үндэсний аврах бригадаас хэдэн аврагч явж байгаа вэ?

-Манай бригадаас 20 алба хаагч аврах ажиллагаанд оролцохоор явж байна. Мөн Зэвсэгт хүчний жанжин штаб, Цэргийн төв эмнэлгийн эмч, сувилагч нар үүрэг гүйцэтгэхээр хамт явж байгаа. Англи, Турк хэлний мэдлэгтэй аврагчидтай явж байгаа учраас санаа зовохгүй байна.

-Аврах багийнхан Турк Улсад хэд хоног үүрэг гүйцэтгэх даалгавартай явж байна вэ?

-Бид Турк Улсад ойролцоогоор 14 хоног үүрэг гүйцэтгэнэ. Гэхдээ нөхцөл байдал хэрхэн өөрчлөгдөхийн таах аргагүй болохоор хэд хоног ажиллах нь тодорхойгүй. Монгол Улсын зүгээс Турк Улсын иргэдэд мах, хувцас, хөнжил, чүдэнд, лаа болон бусад багаж хэрэгсэл хүргэж өгч, тусална.

АЛБАНЫХАА, ЭХ ОРНЫХОО НЭРИЙГ ДААЖ, ХАРИУЦЛАГАТАЙ АЖИЛЛАХЫГ ХИЧЭЭНЭ

-Аврагчид өөрсдийн аюулгүй байдлаа хэрхэн хангасан бэ. Турк Улсад буугаад иргэдэд хамгийн анх ямар тусламж үзүүлэхээр төлөвлөж байна вэ?

-Аврагч бүр өөрсдийнхөө бэлтгэл, бэлэн байдлыг сайтар хангасан. Хүн бүр өөрийгөө хамгаалах хэрэгсэл, багаж, хэрэгсэлтэй яваа. Бид олон улсын аврах багийн хуваарьт орж, хувиарын дагуу үүрэг гүйцэтгэнэ. Аль болох олон хүний амь аварч, тэднийг гэр бүлтэй, элэг бүтэн үлдээхийн тулд л аврах ажиллагаанд явж байна шүү ээ. Аврах багийнхан биеэ даасан байдалтай явж байгаа. Майхан, хөнжил, чүдэнз зэрэг шаардлагатай зүйлээ авсан. Хээрийн нөхцөл байдалд ажиллана гэсэн үг. Тэнд ойр, ойрхон чичирхийлэл мэдрэгдэж байгаа гэх мэдээлэл ирсэн учраас дахин газар хөдлөхийг үгүйсгэх аргагүй.

-Марта, Балу гэх аврагч нохойныхоо талаар ярьж өгөөч. Тэд ямар ажиллагаанд оролцож байсан вэ?

-Хорио, цээрийн үед постуудад үүрэг гүйцэтгэж байсан мөн эрлийн дуудлагад үүрэг гүйцэтгэж байсан нохойнууд. ОБЕГ-ын Эрэлч нохойн албанд зургаан нохой байдаг. Бидэнтэй дөрөв, таван жил хамт үүрэг гүйцэтгэж байгаа нохойнууд болохор гар нийлнэ гэдэгт итгэлтэй байна. Марта дөрвөн настай, Балу гурван настай.

Дөрвөн настай Марта нь Төрийн цэргийн болон хүчний байгууллагуудын үнэрч нохдын уралдаанд 2019 онд тэргүүлж байсан юм. Тэднийг Онцгой байдлын аврагч, нохой сургагч, дэслэгч Б.Баярдаваа хариуцна.

-Сайн яваад ирээрэй, амжилт хүсье.

-Баярлалаа.

ТУРК УЛСАД АВРАХ АЖИЛЛАГААНД ОРОЛЦОХ З.ГҮРРАГЧАА: НЭГ Ч БОЛТУГАЙ ХҮН АВАРЧ, ТЭДНИЙГ ГЭР БҮЛТЭЙ НЬ ЭЛЭГ БҮТЭН БАЙЛГАХЫН ТУЛД АВРАХ АЖИЛЛАГААНД ЯВЖ БАЙНА

Монгол эрдэмтэн, судлаачид Прагийн Амьтны хүрээлэнгийнхний хамтарсан баг Монгол Улсын зүүн хэсэгт тахь нутагшуулах цэг сонгох ажлыг амжилттай дуусгасан байна. Тус баг улирал бүр газар дээр нь очиж ургамал, амьтан, шавьж, шимэгч зэргийг хамруулсан олон талын судалгаа шинжилгээ хийсэн байна. Мөн урьдчилан сонгосон цэгт зайнаас тандах судалгаа хийжээ. Үүний эцэст Дорнод аймгийн Халх гол сумын нутагт оршдог Сүмийн хоолой гэдэг газрыг сонгосон байна. Нийт 1700 км.кв орчим талбайтай энэ газрын ихэнх хэсэг нь Нөмрөг дархан цаазат газрын нутагт багтаж байгаа аж.

Прагийн Амьтны хүрээлэнгийн захирал Мирослав Бобек “Нэлээд өргөн цар хүрээтэй судалгаа хийсний үндсэн дээр бид Сүмийн хоолой, түүний ойр орчим хамгийн тохиромжтой газар гэсэн дүгнэлтэд хүрсэн. Мөн энэ нутагт өвсний гарц сайн, газрын гадаргуугийн байдал тогтоц сайтай, хачиг багатайгаас гадна манай цэгээс хэдэн арван километрийн зайд айлын мал бэлчдэг. Үүнээс илүү тохиромжтой газар олдохгүй” гэж ярьжээ.

Сүмийн хоолой нь Говийн Их Дархан Цаазат газрын Б хэсэг, Хустайн байгалийн цогцолбор газар, Хомын талын байгалийн цогцолбор газрын дараа тахь нутагшуулах дөрөв дэх газар болох бөгөөд Монгол орны зүүн хэсэгт оршдгоороо онцлогтой. Тахь нутагшуулах газрын сонголтоо нэгэнт хийсэн тул одоо “Дорнын тахь” төсөл хэрэгжих шатандаа оржээ.

Прагийн Амьтны хүрээлэнтэй хамтран төсөл хэрэгжүүлэх, “Бид Монголын зэрлэг амьтдыг авран хамгаалахад тусална” ТББ-ын гүйцэтгэх захирал О.Ганбаатар “Бид Монгол Улсын Байгаль орчин, аялал жуулчлалын яам, холбогдох бусад байгууллагуудтай хамтран уг төслийг бэлтгэж ажиллаж байна” гэв. Монгол Улсын төрийн байгууллагууд энэ төслийг талархан дэмжжээ.

Цаашид шаардлагатай гэрээ, албан ёсны зөвшөөрлийг зохих ёсоор бүрдүүлж, Дэгээ гол, Өвөр сүмийн горхины бэлчирт баригдах төслийн төвийн байр, дасгах хашааны зураг төслийн ажлыг эхлүүлэхийн зэрэгцээ тухайн цэгийн судалгааг үргэлжлүүлэх аж. Европ төдийгүй Монгол Улс дахь тахь идээшин, нутагшиж буй бусад газраас тахийг Сүмийн хоолойд 2026 оны зун тээвэрлэх боломжтой болох юм байна.

Гашуунсухайт-Ганцмод боомтоор хоёрдугаар сарын 15-нд нүүрс тээврийн 972 автомашин гарчээ. Нүүрсний тээвэрлэлт он гарснаас хойш тогтмол нэмэгдэж, өдөрт 900-1000-ийн хооронд хэлбэлзэж байгаа аж.

Ганцмод боомтооор энэ сарын 13-наас 15-нд өдөрт дунджаар 957 тээврийн хэрэгслээр нүүрс тээвэрлэсэн нь нэгдүгээр сарын мөн үетэй харьцуулахад 60 орчмоор нэмэгдсэн үзүүлэлт юм.

Тус боомтод Монголын түүхий коксжих нүүрсний үнэ тонн нь 1500-1550 юанийн хооронд хэлбэлзэж буй юм байна.

XVII жарны “Үзэсгэлэн болгогч” хэмээх усан туулай жилийн сар шинийн баярт зориулсан Улс, аймгийн алдар цолтой 256 бөхийн барилдаан өнөөдөр 12.00 цагаас эхэлсэн. Тодруулбал, нэг, хоёрын даваа явагдаж, маргааш 14.00 цагаас гурвын даваанаас үргэлжлэх юм.

Тэгвэл охид бүсгүйчүүдийн анхаарлыг татаад байсан Өвөрмонгол бөх С.Төмөрбаатар сар шинийн барилдаанд зодоглосон ч нэгийн даваанд өвдөг шороодлоо.

Турк, Сирийн газар хөдлөлтийн хохирлыг “Reuters” агентлагаас өнөө өглөө шинэчилснээр нас барагсдын тоо 46456 хүрчээ. Турк улсад 345 мянган барилга байшин нурсан тул амиа алдагсдын тоо цаашид ч нэмэгдэх хандлагатай байна. Нас барагсдын 5800 орчим нь Сири улсад байгаа гэж тооцоолж байна.

Туркийн Гамшиг, онцгой байдлын ерөнхий газрын дарга Юнус Сезер “Дэлхийн 80 орон болон олон улсын 11488 аврах анги гамшгийн бүсэд ирж, тусламж үзүүлсэн. Эрэн хайх, аврах ажиллагаа өчигдөр (2023.02.18) үндсэндээ дууссан” гэж хэлэв. Нийт 430 мянга гаруй хүнийг нүүлгэн шилжүүлсэн бөгөөд 682 мянга гаруй иргэнд 10 мянган турк лирийн мөнгөн тусламж үзүүлжээ.

Газар хөдлөлтийн дараа Туркийн өмнөд хэсэгт 6500 орчим хүүхэд мэндэлсэн байна. Туркийн Эрүүл мэндийн сайд Фахреттин Кожа “Шинэ төрсөн хүүхэд бүр найдвар юм. Хүүхдүүд болон тэдний ээжүүдэд шаардлагатай эрүүл мэндийн үйлчилгээг тасралтгүй үзүүлж байна. Газар хөдлөлтөд нэрвэгдсэн бүс нутагт 10489 жирэмсэн эх байсан. Төрсний дараах хяналтын тоо 10 мянга гаруй байна” гэж хэлжээ.